មន្ត្រីសិទ្ធិមនុស្ស និងជនសង្ស័យដែលជាសកម្មជនបក្សប្រឆាំងក្នុងសំណុំរឿងកាប់រុករានដីព្រៃបម្រុងទុក ឬព្រៃសហគមន៍ រិះគន់ចៅក្រមសាលាដំបូងខេត្តពោធិ៍សាត់។ ការរិះគន់នេះ គឺបន្ទាប់ពីក្រុមប្រឹក្សាជំនុំជម្រះបើកសវនាការសួរដេញដោលលើជនសង្ស័យម្នាក់ កាលពីថ្ងៃ២៨ ខែតុលា ហើយក្រុមអ្នកឃ្លាំមើលសិទ្ធិមនុស្ស និងជនសង្ស័យថា មានភាពមិនប្រក្រតី។
បើពុំមានអ្វីប្រែប្រួលទេ ប្រធានក្រុមប្រឹក្សាជំនុំជម្រះក្នុងសំណុំរឿងនេះ គឺលោក ម៉ៅ ស៊ីណា នឹងសម្រេចសេចក្ដីផ្ដន្ទាទោស ឬមិនផ្ដន្ទាទោសលើលោក សោម សារាវុត ដែលជាអនុប្រធានទី២ នៃគណៈកម្មាធិការប្រតិបត្តិស្រុកក្រគរ គណបក្សសង្គ្រោះជាតិ និងជាសមាជិកសមាគមគ្រូបង្រៀនកម្ពុជាឯករាជ្យ នៅរសៀលថ្ងៃទី២ ខែវិច្ឆិកា ឆ្នាំ២០១៥។ ជនសង្ស័យគិតថា សាលក្រមនោះនឹងមានអយុត្តិធម៌ចំពោះខ្លួន។
ជនសង្ស័យដែលរដ្ឋបាលព្រៃឈើពោធិ៍សាត់ ប្ដឹងចោទថា បានកាប់ព្រៃសហគមន៍ គឺលោក សោម សារាវុត ថ្លែងនៅថ្ងៃទី៣០ ខែតុលា ថា ចៅក្រមមិនទទួលយកការបកស្រាយរបស់លោក ហើយទទួលយកការចោទប្រកាន់ដោយមិនត្រឹមត្រូវរបស់អាជ្ញាធរ និងតំណាងរដ្ឋបាលព្រៃឈើ។
លោកបន្តថា លោកនឹងមិនចូលស្ដាប់ការប្រកាសសាលក្រមនោះទេ ហើយលោកក៏មិនគេចខ្លួនដែរបើតុលាការសម្រេចផ្ដន្ទាទោសរូបលោកដាក់ពន្ធនាគារនោះ៖ «គេ (ដើមបណ្ដឹង) មានឌីសទូរទស្សន៍បាយ័នមួយ ដែលគេថតបាន កាលពីឆ្នាំ២០១២ ឬ២០១៣ ហ្នឹង! ខ្ញុំបានដឹកនាំប្រជាពលរដ្ឋក្នុងសហគមន៍របស់ខ្ញុំដែលត្រូវគេរំលោភដីធ្លីហ្នឹងតវ៉ានៅលើដីរបស់ខ្លួន នៅពេលគេចុះដាប់ដុតបំផ្លាញរបង ស្រែចម្ការ និងដំណាំផ្សេងៗ ហើយគេថតបានខ្ញុំនៅពេលនោះ ស្រាប់តែគេចោទថា ខ្ញុំប្រាកដជាបានកាប់រានដីព្រៃរបស់គេហ្នឹងមែន»។
លោក សោម សារាវុត ត្រូវខណ្ឌរដ្ឋបាលព្រៃឈើពោធិ៍សាត់ ដាក់ពាក្យបណ្ដឹងទៅតុលាការកាលពីឆ្នាំ២០១៣ ដោយចោទពីបទកាប់រុករានដីព្រៃបម្រុងទុក។ បណ្ដឹងនេះធ្វើឡើងក្រោយពីរដ្ឋាភិបាលចេញសេចក្ដីជូនដំណឹងកំណត់ដីទំហំ ៥០០ហិកតារ នៅចំណុចអន្សរក្ដាម ធ្វើជាព្រៃសហគមន៍។ ការកំណត់ដីសហគមន៍ដោយផ្អែកលើរបាយការណ៍របស់អាជ្ញាធរមូលដ្ឋាននេះ បានប៉ះពាល់ដល់ដីអ្នកភូមិអន្សរក្ដាម នៃឃុំស្នាអន្សា ចំនួន ៦៤គ្រួសារ ប៉ុន្តែពួកគេបានដោះដូរដីចេញជាបន្តបន្ទាប់ហើយ។
ដោយឡែកគ្រួសារលោក សោម សារាវុត និងពលរដ្ឋចំនួន ២០គ្រួសារផ្សេងទៀត មិនព្រមដោះដូរដីចេញ ហើយទាមទារដីទំហំ ៦៣ហិកតារ នៅចំណុចភូមិអន្សរក្ដាម ដោយអះអាងថា បានកាន់កាប់ និងអាស្រ័យផលតាំងអំឡុងឆ្នាំ១៩៨៣។ ក្រោយពីដីតំបន់នេះកាត់ចូលជាព្រៃសហគមន៍នៅឆ្នាំ២០១១ អាជ្ញាធរមូលដ្ឋាន និងមន្ត្រីជំនាញរដ្ឋបាលព្រៃឈើ បានការពារដោយរករឿងចោទប្រកាន់តាមគ្រប់រូបភាពចំពោះពលរដ្ឋណាដែលទៅកាប់រុករានព្រៃនៅតំបន់នោះ។
ប្រធានក្រុមប្រឹក្សាជំនុំជម្រះសំណុំរឿងនេះ គឺលោក ម៉ៅ ស៊ីណា បដិសេធមិនអត្ថាធិប្បាយអ្វីឡើយ នៅថ្ងៃទី៣០ ខែតុលា ដោយលោកប្រាប់ថា កំពុងបើកឡាន។
ទាក់ទងបញ្ហានេះប្រធានផ្នែកបច្ចេកទេសស៊ើបអង្កេត នៃអង្គការការពារសិទ្ធិមនុស្សលីកាដូ (LICADHO) គឺលោក អំ សំអាត ដែលបានចូលស្ដាប់សវនាការនេះផ្ទាល់ថ្លែងថា នៅក្នុងសវនាការកាលពីថ្ងៃទី២៨ ខែតុលា មានភាពមិនប្រក្រតីមួយចំនួនដូចជា របាយការណ៍ស៊ើបអង្កេតលើទីតាំងកើតហេតុបែរជានៅនឹងដៃដើមបណ្ដឹង ចៅក្រមមានភាពស្និទ្ធស្នាលជាមួយដើមបណ្ដឹង និងសវនាការបានជាង ១ម៉ោងទើបប្រធានចៅក្រមស្នើឲ្យអ្នកចូលរួមស្ដាប់សវនាការបង្ហាញអត្តសញ្ញាណជាដើម។
លោកថា បញ្ហាទាំងអស់នេះហើយដែលអាចធ្វើឲ្យប៉ះពាល់ដល់ដំណើរការជំនុំជម្រះរឿងក្ដី៖ «រឿងនេះដូចជាចម្លែកថា ការផ្ដល់ព្រៃសហគមន៍នេះថា ក្រុមហ៊ុនថាអ្នកផ្ដល់ ហើយរដ្ឋបាលព្រៃឈើថា រដ្ឋាភិបាលជាអ្នកផ្ដល់ឲ្យ ហើយមិនបានកំណត់ទីតាំងណាច្បាស់លាស់ទេទុកឲ្យខាងរដ្ឋបាលព្រៃឈើ និងអាជ្ញាធរមូលដ្ឋានរកដីទុកសម្រាប់ជាព្រៃសហគមន៍ហ្នឹងទៅវិញ»។
យ៉ាងណាមេឃុំស្នាអន្សា លោក មោក កោ ធ្លាប់បញ្ជាក់ថា អាជ្ញាធរមូលដ្ឋាន រួមនឹងអាជ្ញាធរថ្នាក់ជាតិ បានពិនិត្យមើលគ្រប់លទ្ធភាពក្នុងការដោះស្រាយ ប៉ុន្តែលោក សោម សារាវុត នៅតែមិនព្រមទទួលយក។ លោកថា ការពិតអ្នកដែលមិនព្រមទទួលយកការដោះដូរមានតែ ៦គ្រួសារប៉ុណ្ណោះ ប៉ុន្តែបានបំបែកឈ្មោះទៅជា ២១គ្រួសារដើម្បីតវ៉ា។ ប៉ុន្តែដីដែលកំពុងទាមទារនោះ គឺជាប្រភេទដីព្រៃដែលមិនអាចផ្ដល់ជូនបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។