ចៅក្រមសាលាដំបូងរាជធានីភ្នំពេញលោក លាង សំណាត់ សម្រេចឃុំខ្លួនជនជាតិជប៉ុនម្នាក់ និងខ្មែរពីរនាក់ នៅពន្ធនាគារព្រៃស ពាក់ព័ន្ធករណីជួញដូរផ្លូវភេទ នារីខ្មែរ១០នាក់ ទៅប្រទេសជប៉ុន។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា ឲ្យដឹងថា បន្ទាប់ពីពិនិត្យសំណុំរឿង ភស្តុតាង និងសួរចម្លើយជនជាប់សង្ស័យទាំង៣នាក់នេះ នៅថ្ងៃទី៧ កុម្ភៈ អយ្យការសម្រេចបើកការស៊ើបសួរ ដោយចោទប្រកាន់ទៅលើបុគ្គលទាំងនេះពីបទ ជ្រើសរើសដោយមិនស្របច្បាប់សម្រាប់កេងប្រវ័ញ្ច តាមមាត្រា១២ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
មាត្រា១២ ចែងពីការជ្រើសរើសដោយមិនស្របច្បាប់នៅក្នុងច្បាប់នេះ មានន័យថា ការបញ្ចុះបញ្ចូល ការជួល ឬការឱ្យជនណាមួយបម្រើការក្រោមទម្រង់នៃការកេងប្រវ័ញ្ចផ្សេងទៀត តាមមធ្យោបាយបោកបញ្ឆោត បំពានដោយអំណាច ការបង្ខាំងខ្លួន ការប្រើប្រាស់កម្លាំង ការគំរាមកំហែង ឬមធ្យោបាយបង្ខិតបង្ខំផ្សេងទៀត។ ជននោះនឹងត្រូវផ្ដន្ទាទោសដាក់ពន្ធនាគារពី ៧ ដល់១៥ ឆ្នាំ។ ប៉ុន្តែបើជនរងគ្រោះជាអនីតិជន ឬអំពើល្មើសប្រព្រឹត្តឡើង ដោយមន្ត្រីសាធារណៈដែលបំពានដោយអំណាចរបស់ខ្លួនមកលើជនរងគ្រោះ ឬអំពើល្មើសប្រព្រឹត្តឡើងដោយក្រុមមានការចាត់តាំងនោះ ជនប្រព្រឹត្តនឹងត្រូវផ្ដន្ទាទោសដាក់ពន្ធនាគារពី ១៥ ដល់២០ឆ្នាំ។
ជនជាប់សង្ស័យ ទាំង៣នាក់នេះ ម្នាក់ជាជនជាតិជប៉ុនឈ្មោះ ហ៊្វូគុយ ស៊ូស៊ូមុ (Fukui Susumu) មានមុខរបរជាប្រធានភោជនីយដ្ឋានជប៉ុន ឈ្មោះ ហ្គីណេស និងបម្រើការងារនៅក្រុមហ៊ុនដឹកជញ្ជូនថ្ងៃរះ ចំណែកប្រពន្ធឈ្មោះ លឹម លក្ខិណា ហៅ អាណែត ជាជនជាតិខ្មែរ និងឈ្មោះ សេង ចាន់ឌី ធ្វើការនៅភោជនីយដ្ឋានហ្គីណេស។
កាលពីខែសីហា ឆ្នាំ២០១៦ ជនជាតិជប៉ុន និងប្រពន្ធបានឃោសនា បោកបញ្ឆោតនារីខ្មែរចំនួន ១០នាក់ ឲ្យទៅធ្វើការនៅភោជនីយដ្ឋាននៅប្រទេសជប៉ុន ដោយបានសន្យាផ្ដល់ប្រាក់ខែពី ៣ពាន់ដុល្លារ ទៅ ៥ពាន់ដុល្លារ និងចេញថ្លៃសោហ៊ុយធ្វើឯកសារ និងការធ្វើដំណើរ។ ពេលទៅដល់ប្រទេសជប៉ុន នារីខ្មែរទាំងនេះត្រូវបានគេដកហូតលិខិតឆ្លងដែន រួចនាំឲ្យទៅបម្រើនៅក្នុងភោជនីយដ្ឋានឈ្មោះ អ៊ីកាហុ នៅខេត្តហ្គុនម៉ា (GUNMA) និងបង្ខំឲ្យរួមភេទជាមួយភ្ញៀវជប៉ុន។
លុះខែមករា ឆ្នាំ២០១៧ នារីខ្មែររងគ្រោះទាំងនេះ ត្រូវបានស្ថានទូតខ្មែរនៅទីនោះ បានជួយសង្គ្រោះ និងបញ្ជូនមកកម្ពុជាវិញ ក្រោយពីទទួលដំណឹងពីពួកគេតាមរយៈហ្វេសប៊ុក (Facebook)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។