សាលាដំបូងរាជធានីភ្នំពេញ សាកសួរមនុស្ស ៦នាក់ ដែលជាប់ពាក់ព័ន្ធក្រុមជួញដូរគ្រឿងញៀនដែលបញ្ជាចេញពីពន្ធនាគារ នៅថ្ងៃទី៤ ខែមីនា។ ការសាកសួរនេះ បន្ទាប់ពីកងរាជអាវុធហត្ថចាប់បានជនសង្ស័យជាជនជាតិខ្មែរមួយរូប កាលពីចុងខែកុម្ភៈ និងរកឃើញថា មានទណ្ឌិតកំពុងអនុវត្តទោសក្នុងពន្ធនាគារ ជាជនជាតិខ្មែរផង បរទេសផង ចំនួន ៥នាក់ផ្សេងទៀត បញ្ជាឲ្យចែកចាយ និងជួញដូរគ្រឿងញៀនចេញពីពន្ធនាគារ។
មន្ត្រីកងរាជអាវុធហត្ថលើផ្ទៃប្រទេសកំពុងចាត់វិធានការស្រាវជ្រាវបន្តទៀត ដើម្បីរកបណ្ដាញបញ្ជាឲ្យចែកចាយ និងជួញដូរគ្រឿងញៀនក្នុងរាជធានីភ្នំពេញ។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ថ្លែងថា ក្រុមការងារពាក់ព័ន្ធបានស៊ើបអង្កេតលើក្រុមគ្រឿងញៀនមួយនៅពន្ធនាគារដែលដឹកនាំដោយជនបរទេស ៣នាក់ គឺរយៈពេល ៣ថ្ងៃ បន្ទាប់ពីចាប់បានជនសង្ស័យក្នុងស្រុកម្នាក់ដែលមានថ្នាំញៀនជាប្រភេទមេតំហ្វេតាមីន ជាង ៣គីឡូក្រាម ដែលបានបញ្ជាឲ្យចែកចាយទូទាំងរាជធានីភ្នំពេញ៖ «អាវុធហត្ថយើងគឺឃាត់ពីថ្ងៃទី២៨ (កុម្ភៈ) មក គឺម្នាក់ឈ្មោះ ឌី ធូរ៉ា ហ្នឹង ចាប់បានវត្ថុតាងជាច្រើន ហើយបន្ទាប់មកក៏ស្រាវជ្រាវទៅក៏ឃើញជាប់ពាក់ព័ន្ធជាមួយជន ៥នាក់ទៀត ដែលជាទណ្ឌិត។ យើងកំពុងតែស្រាវជ្រាវបន្តវិធានការដែលយើងត្រូវតែមានការដឹកនាំសម្របសម្រួលពីព្រះរាជអាជ្ញាទើបយើងធ្វើបន្តបាន។ អ៊ីចឹងបានជារយៈពេលនេះយើងទាមទារឲ្យមានការដឹកនាំពីគាត់ ហើយយើងធ្វើការបាននេះ។ លក់នៅក្រៅទេ បញ្ជាពីក្នុងហ្នឹងមកឲ្យអ្នកខាងក្រៅលក់»។
កាលពីថ្ងៃទី២៨ ខែកុម្ភៈ កងរាជអាវុធហត្ថរាជធានីភ្នំពេញ បានបង្ក្រាបក្រុមជួញដូរគ្រឿងញៀនម្នាក់ ឈ្មោះ ឌី ធូរ៉ា អាយុ ៣២ឆ្នាំ នៅក្បែរគល់ស្ពានជ្រោយចង្វារ ខណ្ឌឫស្សីកែវ ដែលមានសារធាតុញៀនប្រភេទម៉ាទឹកកក ទម្ងន់ជាង ៣គីឡូក្រាម និងថ្នាំញៀនមេតំហ្វេតាមីនគ្រាប់ ចំនួនជាង ១០ម៉ឺនគ្រាប់។ កម្លាំងជំនាញនេះបានរកឃើញអ្នកជាប់ពាក់ព័ន្ធមាន ៥នាក់ផ្សេងទៀត ដែលជាទណ្ឌិតកំពុងអនុវត្តទោសក្នុងពន្ធនាគារ ក្នុងនោះមានជនជាតិខ្មែរ ២នាក់ ជនជាតិវៀតណាម ម្នាក់ និងជនជាតិស្បែកខ្មៅ ២នាក់ ដែលចាត់ចែងបញ្ជាចេញពីក្នុងពន្ធនាគារ។
ពាក់ព័ន្ធទៅនឹងការរកឃើញថា ទណ្ឌិតដែលកំពុងអនុវត្តទោសក្នុងពន្ធនាគារបានបញ្ជាឲ្យចែកចាយគ្រឿងញៀនចេញពីពន្ធនាគារនេះ អនុប្រធាននាយកដ្ឋានអប់រំកែប្រែនៃអគ្គនាយកដ្ឋានពន្ធនាគារក្រសួងមហាផ្ទៃ លោក សន កែវ មានប្រសាសន៍ថា មេបញ្ជាឲ្យចែកចាយគ្រឿងញៀននេះ គឺពួកគេកំពុងអនុវត្តទោសក្នុងមណ្ឌលអប់រំកែប្រែទី១ ឬពន្ធនាគារព្រៃស។ ជុំវិញបញ្ហានេះ ក្រុមការងារនិងធ្វើការស៊ើបអង្កេតលើភាពធូររលុងក្នុងពន្ធនាគារនេះ៖ «ធម្មតាយើងត្រូវមានក្រុមការងារដើម្បីស៊ើបអង្កេតបន្តទៀត»។
ព្រះរាជអាជ្ញារងសាលាដំបូងរាជធានីភ្នំពេញ លោក ហ៊ឹង ប៊ុនថន បានសាកសួរជនជាប់ចោទលើសំណុំរឿងនេះ នៅថ្ងៃទី៤ មីនា ហើយបញ្ជូនសំណុំរឿងនេះបន្តទៅចៅក្រមស៊ើបសួរ លោក ឃី ឆៃ។
ទាក់ទងទៅនឹងសំណុំរឿងជួញដូរគ្រឿងញៀនដូចគ្នានេះដែរ តុលាការកំពូល នៅព្រឹកថ្ងៃទី៤ ខែមីនា បានសម្រេចលើកពេលសវនាការជំនុំជម្រះលើសំណុំរឿងអតីតយោធាផ្កាយ២ ឈ្មោះ ចាន់ ឫទ្ធីឌី និងគូកនម្នាក់ទៀតពាក់ព័ន្ធករណីជួញដូរគ្រឿងញៀនជិត ៥គីឡូក្រាម។ ការលើកពេលជម្រះនេះ ដោយសារមេធាវីរបស់ជនជាប់ចោទឈ្មោះ ឌៀប ស៊ុនឡាយ ស្នើសុំតុលាការសិក្សាសំណុំរឿងការពារកូនក្ដីរបស់ខ្លួន។
អតីតយោធាផ្កាយ២ លោក ចាន់ឫទ្ធីឌី និងជនជាប់ចោទមួយរូបទៀត ឈ្មោះ ឌៀប ស៊ុនឡាយ បានប្ដឹងសាទុក្ខទៅតុលាការកំពូល បន្ទាប់ពីសាលាដំបូងរាជធានីភ្នំពេញ និងសាលាឧទ្ធរណ៍ផ្ដន្ទាទោសពួកគេដាក់ពន្ធនាគារក្នុងម្នាក់ ២០ឆ្នាំ ពីបទជួញដូរដោយខុសច្បាប់នូវសារធាតុញៀន ប្រព្រឹត្តនៅភូមិអូរអណ្ដូងទី១ សង្កាត់ព្រែកប្រា ខណ្ឌមានជ័យ រាជធានីភ្នំពេញ កាលពីខែសីហា ឆ្នាំ២០១២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។