ក្រុមគ្រួសារមេឃុំស្រក ស្រុកកំពង់សៀម ខេត្តកំពង់ចាម ស្នើឲ្យតុលាការដោះលែងលោក ស៊ាង ចែត ឲ្យបាននៅក្រៅឃុំ។ ក្រោយពេលដែលលោក ស៊ាង ចែត ជាប់ឃុំ ធ្វើឲ្យក្រុមគ្រួសាររបស់ពួកគាត់កាន់តែជួបការលំបាកក្នុងជីវភាពរស់នៅ។ បន្ថែមពីនេះទៀត ពលរដ្ឋនៅក្នុងឃុំ ក៏នាំគ្នាស្នើឲ្យដោះលែងមេឃុំស្រក ឲ្យមានសេរីភាពឡើងវិញដែរ ដោយពួកគាត់យល់ថា ការឃុំខ្លួនមេឃុំស្រក គឺជារឿងអយុត្តិធម៌។
ស្របពេលតុលាការក្រុងភ្នំពេញ នៅមិនទាន់ជំនុំជម្រះរឿងក្តីពាក់ព័ន្ធមេឃុំស្រក នៅឡើយ ក្រុមគ្រួសារ និងពលរដ្ឋមួយចំនួននាំគ្នាអំពាវនាវឲ្យតុលាការដោះលែងលោក ស៊ាង ចែត ឲ្យនៅក្រៅឃុំ។ ការស្នើនេះ ដោយពួកគាត់ហ៊ានធានាថា មេឃុំស្រក នឹងមិនរត់ទៅណាឡើយ។ ម្យ៉ាងការឃុំខ្លួននេះ ធ្វើឲ្យប៉ះពាល់ដល់ជីវភាពរស់នៅរបស់ក្រុមគ្រួសារមេឃុំផ្ទាល់ និងពលរដ្ឋដែលត្រូវការសេវាសាធារណៈពីសំណាក់លោក ស៊ាង ចែត។
ប្រពន្ធលោកមេឃុំស្រក អ្នកស្រី ស្រេង សុខឃឿន មានប្រសាសន៍ទាំងទឹកមុខស្រពាប់ស្រពោនថា តាំងពីប្ដីរបស់អ្នកស្រីត្រូវបានអង្គភាពប្រឆាំងអំពើពុករលួយនាំខ្លួន និងឃុំខ្លួននៅពន្ធនាគារព្រៃស គឺធ្វើឲ្យគ្រួសារមានការលំបាកខ្លាំង។ អ្នកស្រីថា នៅពេលប្ដីនៅជុំគ្នា ប្ដីអ្នកស្រីអាចដឹកនាំកូនៗនាំគ្នារកស៊ី ឬប្រកបមុខរបរផ្សេងៗក្រោយពេលសម្រាកពីការងារឃុំ ប៉ុន្តែនៅពេលប្ដីគាត់ត្រូវជាប់ឃុំ គ្រួសារអ្នកស្រីមិនមានអ្នកជំហររឹងមាំឡើយ។ ម្យ៉ាង កូនៗត្រូវរៀនសូត្រ មានមនុស្សចាស់នៅក្នុងបន្ទុក និងមានកូនតូច ដោយអ្នកស្រីមិនអាចដើរចោលបាន៖ « បើប្ដីខ្ញុំនៅទៅ អាចរកម៉ូយរកអីឲ្យកូនទាក់ទងទៅដឹកដំឡូងគេទៅ ដល់អត់ពីប្ដីទៅ ខ្ញុំពិបាក »។
លោក ស៊ាង ចែត គឺមនុស្សមានប្រជាប្រិយភាពម្នាក់នៅក្នុងឃុំ និងជាគ្រួសារមួយមានជីវភាពមធ្យម។ លោកជាមេឃុំមកពីគណបក្សប្រឆាំង ហើយលោកជាប់ឆ្នោតជាមេឃុំស្រក កាលពីឆ្នាំ២០១២។ លោកមានអាយុជាង ៤០ឆ្នាំ និងមានកូន ៥នាក់ សុទ្ធតែប្រុស ព្រមទាំងមានឪពុកម្ដាយចំណាស់នៅក្នុងបន្ទុកផង។
កាលពីល្ងាចថ្ងៃទី២៤ មេសា អង្គភាពប្រឆាំងអំពើពុករលួយ នាំលោក ស៊ាង ចែត មកអង្គភាពដើម្បីសាកសួរបន្តជុំវិញរឿងទឹកប្រាក់ ២លានរៀល ឬស្មើប្រមាណ ៥០០ដុល្លារ បម្រុងនឹងប្រគល់ឲ្យក្រុមគ្រួសារអ្នកនាង ខុម ចាន់តារាទី ហៅ ស្រីមុំ។
រហូតដល់ថ្ងៃទី២៥ មេសា អង្គភាពប្រឆាំងអំពើពុករលួយ បានរៀបចំធ្វើសន្និសីទកាសែតជុំវិញការឃាត់ខ្លួនមេឃុំស្រក ក្នុងនោះប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បញ្ជាក់ថា ការអញ្ជើញលោក ស៊ាង ចែត ទៅសាកសួរនៅអង្គភាពដើម្បីបន្តនីតិវិធី និងរហូតឈានទៅឃាត់ខ្លួន គឺយោងទៅតាមចម្លើយរបស់មេឃុំរូបនោះ ដោយមិនអាស្រ័យលើលិខិតចំហរបស់អ្នកនាង ស្រីមុំ តែមួយនោះឡើយ ហើយសំណុំរឿងនេះក៏បានបញ្ជូនទៅតុលាការបន្តទៀត។
នៅថ្ងៃទី២៧ ខែមេសា សាលាដំបូងរាជធានីភ្នំពេញ បានសម្រេចបញ្ជូនមេឃុំ ស៊ាង ចែត ទៅឃុំខ្លួនបណ្ដោះអាសន្ននៅពន្ធនាគារព្រៃស ពាក់ព័ន្ធនឹងបទចោទសូកប៉ាន់សាក្សីតាមមាត្រា៥៤៨ នៃក្រមព្រហ្មទណ្ឌ។
ម្តាយបង្កើតរបស់លោក ស៊ាង ចែត គឺអ្នកស្រី យ៉ន ស៊ីម ដែលមានវ័យជាង ៧០ឆ្នាំ មានប្រសាសន៍ទាំងទឹកភ្នែកថា រាល់យប់ អ្នកស្រីសម្រាន្តមិនលក់ឡើយ ព្រោះចេះតែស្រមៃឃើញកូនរបស់គាត់រស់នៅជុំគ្នា។ អ្នកស្រីថា នៅពេលលោក ស៊ាង ចែត រស់នៅក្បែរ អ្នកស្រីមានប្រាក់គ្រាន់បានទៅវត្តរៀងរាល់ថ្ងៃសីល ប៉ុន្តែចាប់ពីពេលលោកមេឃុំរូបនេះត្រូវបានគេចាប់ខ្លួន គាត់មិនបានទៅវត្តទៀតទេ ដ្បិតមិនសូវមានប្រាក់ និងមិនមានចិត្តស្ងប់ផង៖ « ខ្ញុំដេកទឹកភ្នែករាល់ថ្ងៃ សព្វថ្ងៃហ្នឹងនោះ ខ្ញុំនឹកកូនខ្ញុំធ្លាប់នៅជួបជុំគ្នា ហើយកូនខ្ញុំទៅបាត់ »។
ចំណែកប្រជាពលរដ្ឋនៅក្នុងឃុំស្រក រួមទាំងម្តាយអ្នកនាង ខុម ចាន់តារាទី ផង ក៏ចង់ឲ្យតុលាការដោះលែងលោក ស៊ាង ចែត ឲ្យនៅក្រៅឃុំ ព្រមទាំងស្នើឲ្យឆាប់បញ្ចប់រឿងមួយនេះ។
ប្រជាពលរដ្ឋនៅភូមិល្ពាក លោក ឆេង ធី រៀបរាប់ពីអត្តចរិតមេឃុំស្រក ថាជាមនុស្សល្អ ចេះជួយទុក្ខធុរៈអ្នកភូមិ ពិសេសពលរដ្ឋក្រីក្រដែលជួបការលំបាកដូចជារូបលោក ជាដើម។ លោកបន្តថា នៅពេលមេឃុំត្រូវបានគេចាប់ខ្លួន ធ្វើឲ្យពលរដ្ឋនៅក្នុងឃុំមួយចំនួនតក់ស្លុត ដោយអាណិតចំពោះមេឃុំ ពីព្រោះពលរដ្ឋយល់ថា ការចាប់ខ្លួននេះជារឿងអយុត្តិធម៌។ លោកថា ក្រោយពេលចាប់លោក ស៊ាង ចែត ធ្វើឲ្យការងារឃុំមួយចំនួនត្រូវរាំងស្ទះទៀតផង៖ « ការសំណូមពររបស់ខ្ញុំដល់រាជរដ្ឋាភិបាលជាម្ចាស់ទឹកម្ចាស់ដី ជាកូនចៅដែលនៅខាងក្រោមនេះ មានការលំបាកដោយសារការចាប់មេឃុំនេះ អ៊ីចឹងអស់សង្ឃឹម »។
ស្រដៀងគ្នានេះ ពលរដ្ឋមួយរូបទៀត អ្នកស្រី ឡុង ធីម ឲ្យដឹងថា នៅក្នុងភូមិគេមិនសូវជជែកគ្នារឿងលោកមេឃុំប៉ុន្មានទេ ព្រោះនៅពេលពួកគាត់នាំគ្នានិយាយរឿងចាប់ខ្លួននោះ ពលរដ្ឋមានតែនាំគ្នាស្រក់ទឹកភ្នែកអាណិតមេឃុំ និងក្រុមគ្រួសារលោកប៉ុណ្ណោះ។ អ្នកស្រីថែមទាំងបួងសួងដល់ទេវតាឲ្យតុលាការដោះលែងមេឃុំខ្លួន ឲ្យមានសេរីភាពឡើងវិញ ហើយពួកគាត់នាំគ្នាធានាថា លោក ស៊ាង ចែត នឹងមិនរត់គេចខ្លួនឡើយ។ ជាងនេះ អ្នកស្រីថាពលរដ្ឋកំពុងជួបគ្រោះរាំងស្ងួត និងកំពុងខ្វះទឹកប្រើប្រាស់ទៀតផង ប្រសិនតុលាការដោះលែងមេឃុំ គឺលោកអាចជួយដោះស្រាយបញ្ហាប្រឈមរបស់អ្នកភូមិបានខ្លះ៖ « ខ្ញុំធ្វើស្អី គឺមិនដែលយកលុយ មានតែជួយថែម អាណិត។ ដូចជារូបអ្នកងាប់ជួយលុយ ជួយក្ដារ ជួយនំបញ្ចុក។ គ្នាដើរជួយគ្រប់កន្លែង »។
ជាមួយគ្នានេះ ម្តាយអ្នកនាង ខុម ចាន់តារាទី គឺអ្នកស្រី ស៊ាន លន ដែលរស់នៅក្បែរផ្ទះមេឃុំប្រមាណ ៣០០ម៉ែត្រនោះ មានប្រសាសន៍ទាំងដែលអ្នកស្រីមិនចង់រៀបរាប់ផង កាលពីថ្ងៃទី១៣ ឧសភា ដោយបញ្ជាក់ពីជំហររបស់ខ្លួនថា ការចាប់លោក ស៊ាង ចែត គឺជារឿងអយុត្តិធម៌ ហើយអ្នកស្រីស្នើឲ្យតុលាការដោះលែង និងឆាប់បញ្ចប់រឿងមួយនេះ៖ « អារម្មណ៍នៅតែពិបាកអ៊ីចឹង។ ថ្ងៃណាឃ្លានៗ ថ្ងៃណាអត់ឃ្លានៗ នឹកឃើញកូនអ៊ីចឹងទៅអត់បាយអត់ទឹកទៅ »។
អ្នកស្រីបន្ថែមទៀតថា មកទល់ពេលនេះ គាត់មិនបានដឹងថា អ្នកនាង ខុម ចាន់តារាទី ហៅ ស្រីមុំ រស់នៅទីណាទេ? ហើយក៏មិនបានដឹងសុខទុក្ខយ៉ាងណាឡើយ ពីព្រោះមិនបានទាក់ទងគ្នាជាយូរមកហើយ។ អ្នកស្រីបញ្ជាក់ថា តាំងពីពេលមានរឿងអាស្រូវកើតឡើង អ្នកស្រីមានជំងឺសម្រាន្តមិនលក់ រហូតទាមទារឲ្យអ្នកស្រីប្រើថ្នាំជំនួយជារៀងរាល់យប់ ទើបអាចសម្រាន្តបាន។ មិនតែប៉ុណ្ណោះ អ្នកស្រីមិនហ៊ានដើរចេញទៅឆ្ងាយៗឡើយ ព្រោះខ្មាសគេដោយសាររឿងរ៉ាវដែលបានកើតឡើង ព្រមទាំងទាញគ្រួសារអ្នកស្រីឲ្យកាន់តែមានជីវភាពលំបាក។
ទាក់ទងសំណុំរឿងលោក ស៊ាង ចែត នេះដែរ កាលពីថ្ងៃទី១១ ឧសភា សាលាដំបូងរាជធានីភ្នំពេញ បានសម្រេចលើកពេលជំនុំជម្រះ ក្រោមហេតុផលថា មន្ត្រីតុលាការជាប់រវល់ ហើយសំណុំរឿងនេះក៏បានលើកទៅថ្ងៃទី១៨ ឧសភា។
យ៉ាងណាក៏ដោយ មេធាវីការពារក្តីរបស់មេឃុំស្រក គណបក្ស សម រង្ស៊ី ដែលកំពុងជាប់ឃុំ គឺលោក សំ សុគង់ ធ្លាប់លើកឡើងថា នឹងដាក់ពាក្យស្នើសុំទៅតុលាការឲ្យកូនក្តីរបស់ខ្លួនបាននៅក្រៅឃុំបណ្ដោះអាសន្ន ដោយមានការធានាពីក្រុមគ្រួសារ និងលោកមេឃុំផ្ទាល់។
ទាក់ទងបញ្ហានេះ មន្ត្រីសម្របសម្រួលអង្គការការពារសិទ្ធិមនុស្សលីកាដូ (LICADHO) ខេត្តកំពង់ចាម លោក ប៊ូ វីរៈ យល់ថា ដោយសាររឿងនេះពាក់ព័ន្ធរឿងនយោបាយផង ទើបធ្វើឲ្យគេពិបាកបន្តិច ប៉ុន្តែបើតាមផ្លូវច្បាប់ តុលាការអាចដោះលែងលោក ស៊ាង ចែត ឲ្យនៅក្រៅឃុំបាន ពីព្រោះគាត់មានទីលំនៅច្បាស់លាស់ និងមានការធានាពីប្រជាពលរដ្ឋ ព្រមទាំងក្រុមគ្រួសារមេឃុំផ្ទាល់៖ « ជាយោបល់ខ្ញុំ គឺអាច ព្រោះគាត់មានមេធាវីហើយ មានប្រាក់តម្កល់ហើយ គាត់ធានាថាមិនរត់គេចពីការកោះហៅរបស់តុលាការទេ គួរតែឲ្យគាត់នៅក្រៅឃុំ »។
លោកមើលឃើញថា ការឃុំខ្លួនមេឃុំស្រក គឺមិនអាចធ្វើឲ្យរាជរដ្ឋាភិបាលចំណេញអ្វីឡើយ ប៉ុន្តែវាបណ្ដាលឲ្យប៉ះពាល់ជាច្រើន រួមមានក្រុមគ្រួសារមេឃុំផ្ទាល់ និងប្រជាពលរដ្ឋជាច្រើន ដែលកំពុងត្រូវការសេវារដ្ឋបាលពីលោក ស៊ាង ចែត ផ្ទាល់ និងការដឹកនាំប្រចាំថ្ងៃក្នុងឃុំរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។