ក្រុមស្ត្រីតស៊ូមតិក្នុងរឿងដីធ្លីនៅសហគមន៍បុរីកីឡា ដាក់ពាក្យបណ្ដឹងចូលសាលាដំបូងរាជធានីភ្នំពេញ នៅថ្ងៃទី១១ មីនា ប្ដឹងចោទប្រកាន់មន្ត្រីសាលាខណ្ឌ៧មករា ៣នាក់ ក្នុងនោះមានប្រធានសន្តិសុខរបស់ខណ្ឌនេះម្នាក់ផង ពីបទប្រើហិង្សាប្រឆាំងក្រុមអ្នកភូមិកាលពីខែកុម្ភៈ។
ក្រុមស្ត្រីសហគមន៍បុរីកីឡា បានប្ដឹងលោក សោម សុវណ្ណ អភិបាលខណ្ឌ៧មករា លោក លឹម សុភា អភិបាលរង និងលោក ប្រាក់ ហាក់ ប្រធានសន្តិសុខខណ្ឌ ពីបទបានប្រើហិង្សាទៅលើស្ត្រីមានផ្ទៃពោះ ចាស់ជរា និងកុមារ ដែលបន្តជ្រកក្រោមតង់ និងសំយាបអាគារ ក្រោយពីក្រុមហ៊ុនរបស់អ្នកស្រី ស៊ុយ សុផាន វិនិយោគនៅតំបន់នោះ។
តំណាងស្ត្រីសហគមន៍បុរីកីឡា លោកស្រី ឆាយ គឹមហ៊ន ព្រមាននៅមុខតុលាការ បន្ទាប់ពីដាក់បណ្ដឹងរួចថា ពួកគាត់ទុករយៈពេល ៧ថ្ងៃ គិតចាប់ពីថ្ងៃដាក់សំណុំរឿងប្រឆាំងមន្ត្រីសាលាខណ្ឌ៧មករា ហើយបើមិនត្រូវបានតុលាការចាត់វិធានការដូចលើកមុនៗទេ ក្រុមអ្នកតស៊ូមតិនឹងប្រមូលម្ដុំគ្នា រៀងរាល់ថ្ងៃនៅខាងមុខសាលាដំបូងរាជធានីភ្នំពេញ ដើម្បីដាក់សម្ពាធឲ្យពន្លឿននីតិវិធីពិនិត្យ និងដោះស្រាយសំណុំរឿងនេះ។
ពាក់ព័ន្ធនឹងបញ្ហានេះ កាលពីថ្ងៃទី១៤ កុម្ភៈ កងសន្តិសុខខណ្ឌ៧មករា ប្រមាណ ៣០នាក់ ដែលចុះបញ្ជាផ្ទាល់ដោយអភិបាលខណ្ឌ អភិបាលរងខណ្ឌ និងប្រធានសន្តិសុខ បង្ក្រាបទៅលើក្រុមអ្នកបុរីកីឡា ដែលនៅសេសសល់បន្តក្រាញននៀលមិនចាកចេញពីអាគារបុរីកីឡាជាន់ទី៩ ដោយសារពួកគេមិនអាចទ្រាំរស់នៅដោយរង់ចាំពុំមានដំណោះស្រាយអស់ជាច្រើនឆ្នាំរួចមក។
ចំណែកស្ត្រីកំពុងមានផ្ទៃពោះជិតគ្រប់ខែ លោកស្រី ហាស់ សុខចិន្តា ថ្លែងថា លោកស្រីត្រូវកងសន្តិសុខខណ្ឌ៧មករា វាយធ្វើបាបស្ទើរបាត់បង់កូនដែលនៅក្នុងផ្ទៃ កាលពីថ្ងៃទី១៤ កុម្ភៈ ក្រោមគោលការណ៍បង្ក្រាបក្រុមអនាធិបតេយ្យ។
អភិបាលខណ្ឌ៧មករា លោក សោម សុវណ្ណ អះអាងថា លោកពុំមានការព្រួយបារម្ភណាមួយចំពោះបណ្ដឹងប្រឆាំងនឹងលោករបស់អ្នកភូមិបុរីកីឡាទេ។ លោកបន្តថា ការបើកយុទ្ធនាការកាលពីថ្ងៃទី១៤ កុម្ភៈ គឺជាកាតព្វកិច្ចរបស់អាជ្ញាធរមានសមត្ថកិច្ចប៉ុណ្ណោះ ហេតុនេះ វាពុំមែនជាសម្ពាធសម្រាប់លោកឡើយ។
ក្នុងពេលកន្លងទៅ ភាគីជម្លោះទាំងសង្ខាងគឺរវាងសហគមន៍បុរីកីឡា និងអ្នកស្រី ស៊ុយ សុផាន តែងប្តឹងផ្តល់គ្នាទៅវិញទៅមកតាមផ្លូវតុលាការជាហូរហែ។ ក៏ប៉ុន្តែសាលាដំបូងរាជធានីភ្នំពេញ តែងទម្លាក់ចោលបណ្តឹងប្រឆាំងអ្នកស្រី ស៊ុយ សុផាន របស់សហគមន៍បុរីកីឡាជានិច្ច។ ចំណែកបណ្តឹងរបស់អ្នកស្រី ស៊ុយ សុផាន វិញ យ៉ាងយូរ ៥ថ្ងៃ តុលាការពន្លឿនក្នុងការចាត់វិធានការយ៉ាងមានប្រសិទ្ធភាពប្រឆាំងក្រុមអ្នកភូមិ រហូតមានជាប់ពន្ធនាគារថែមទៀតផង។
មេធាវីការពារក្ដីរបស់អង្គការក្រុមការងារពិសេសសិទ្ធិលំនៅឋាន លោក ណម មូលី ចាត់ទុកថា វាពុំមែនទើបតែលើកទីមួយទេ ដែលបណ្ដឹងរបស់ប្រជាពលរដ្ឋប្រឆាំងមន្ត្រីមានអំណាច និងអ្នកមានលុយស្ដុកស្ដម្ភ មិនត្រូវបានតុលាការអើពើ និងចាត់វិធានការនោះ។ លោកបន្តថា នៅក្នុងសង្គមកម្ពុជា អ្នកមានឥទ្ធិពលតែងមានប្រៀបជាងអ្នកតូចទាបជាដរាប។ លោកចាត់ទុកថា នេះក៏ព្រោះតែប្រព័ន្ធតុលាការនៅកម្ពុជា នៅមិនទាន់មានឯករាជភាពពិតប្រាកដ។
ភ្ជាប់នឹងបញ្ហានេះ កាលពីថ្ងៃទី២៥ កុម្ភៈ លោកនាយករដ្ឋមន្ត្រី ហ៊ុន សែន បានទទួលស្គាល់ថា នៅក្នុងសង្គមពិតជាមិនអាចទទួលបានយុត្តិធម៌ស្មើគ្នាមែន។ ក្នុងន័យនេះ លោក ហ៊ុន សែន បានប្រៀបធៀបទៅនឹងសង្គមនៅក្នុងពិភពលោកទាំងមូលថា ប្រទេសដែលមានការអភិវឌ្ឍអន់ជាង តែងក្លាយជាអ្នករងគ្រោះ មិនខុសពីប្រជាពលរដ្ឋក្រីក្រយ៉ាងដូច្នោះដែរ។
សង្គមស៊ីវិល ដែលឃ្លាំមើលការរំលោភសិទ្ធិមនុស្ស ចាត់ទុកថា បើយ៉ាងដូច្នេះមែន រដ្ឋាភិបាលគប្បីពង្រឹងប្រព័ន្ធយុត្តិធម៌ ឲ្យបានប្រសើរ។ហើយបើដូចអ្វីដែលលោកនាយករដ្ឋមន្ត្រីលើកឡើង នោះជាការគួរឲ្យព្រួយបារម្ភ និង ភ័យខ្លាច។ជាពិសេស ប្រទេសដែលខ្វះប្រព័ន្ធយុត្តិធម៌ ឬ អនុវត្តប្រព័ន្ធយុត្តិធម៌មិនបានពេញលេញ ប្រៀបដូចផ្ទះគ្មានជញ្ជាំងដូច្នោះដែរ។
ជម្លោះកើតពីការសង់អាគារមិនគ្រប់ចំនួនតាមគម្រោង គិតមកដល់ពេលនេះបានបន្តអូសបន្លាយមានរយៈពេលជាង ២ឆ្នាំហើយ ចាប់តាំងពីការបណ្ដេញទាំងបង្ខំប្រឆាំងក្រុមសហគមន៍បុរីកីឡាកាលពីថ្ងៃទី៣ មករា ឆ្នាំ២០១២។ ហើយជម្លោះដ៏រ៉ាំរ៉ៃនេះ សហគមន៍បុរីកីឡា ត្រូវជាប់បណ្ដឹងតាមផ្លូវតុលាការ និងឃុំខ្លួនក្នុងពន្ធនាគារអស់ជាច្រើនខែ តាមបណ្ដឹងរបស់អ្នកស្រី ស៊ុយ សុផាន ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។