ចៅក្រមស៊ើបសួរនៃសាលាដំបូងខេត្តកំពង់ស្ពឺ លោក ឆឹម ឬទ្ធី មានប្រសាសន៍នៅថ្ងៃទី៦ កុម្ភៈ ថា លោកបានបិទការស៊ើបអង្កេតសំណុំរឿងបាតុកម្មនៅរោងចក្រ សាប្រ៊ីណា រួចហើយ ក្រោយពីសាកសួរថ្នាក់ដឹកនាំសហជីពសេរីកម្មករ ៥នាក់ចុងក្រោយ កាលពីថ្ងៃទី៥ កុម្ភៈ។
លោកបន្តថា តុលាការមិនអាចរំលងនីតិវិធីស៊ើបសួរបានទេ ដរាបណាជនជាប់ចោទទាំងអស់ត្រូវចូលមកបំភ្លឺនៅតុលាការ។ ចំពោះការចូលបំភ្លឺរបស់ថ្នាក់ដឹកនាំសហជីពសេរីកម្មករ ៥នាក់ កាលពីថ្ងៃទី៥ កុម្ភៈ តុលាការបានសាកសួរពីអង្គហេតុខ្លះ ហើយសម្រេចចេញដីកាដាក់ពួកគេឲ្យស្ថិតក្រោមការត្រួតពិនិត្យរបស់តុលាការ ដោយមិនបានឃុំពួកគេក្នុងពន្ធនាគារទេ។
បន្ថែមលើនេះ លោកបញ្ជាក់ថា លោកនឹងត្រៀមរៀបចំបញ្ជូនសំណុំរឿង ស៊ើបអង្កេតរួចនេះទៅចៅក្រមជំនុំជម្រះនៅពេលខាងមុខ តែមិនទាន់កំណត់ពេលឲ្យច្បាស់នៅឡើយ៖ «វាអត់មានអីធ្ងន់ធ្ងរទេ ព្រោះមានការសម្របសម្រួលខាង ភាគីរោងចក្រហ្នឹង ខាងនេះនឹង គឺបានធ្វើចប់សព្វគ្រប់រួចហើយ គឺបានព្រមព្រៀងគ្នាច្រើន ហើយបណ្ដឹងអាជ្ញាហ្នឹងក៏ព្យាយាមពន្លត់តាមផ្លូវតុលាការហ្នឹងដែរ»។
ថ្នាក់ដឹកនាំសហជីពសេរីកម្មករ ៥នាក់ ដែលចូលបំភ្លឺនៅតុលាការនោះ រួមមាន លោក យ៉ាន់រ័ត្ន កែវពិសី លោក ថន ថុល អ្នកស្រី សំ ស្រីមុំ។ អ្នកទាំង៣ ជាអគ្គលេខាធិការរងសហជីពសេរីកម្មករ។រីឯ ២នាក់ទៀត ជាសមាជិកសហជីពសេរីកម្មករប្រចាំរោងចក្រ សាប្រ៊ីណា។
ជុំវិញរឿងនេះ លោក យ៉ាន់រ័ត្ន កែវពិសី ដែលចូលខ្លួនបំភ្លឺនៅតុលាការ សង្ឃឹមថាការចូលបំភ្លឺរបស់គាត់នេះ នឹងអាចជំរុញឲ្យរឿងក្តីនេះឲ្យឆាប់ចប់ ក្រោយពីមានព័ត៌មានលេចឮថា ក្រុមហ៊ុនបានដកពាក្យបណ្ដឹងលើពួកគាត់៖ «ក្រោយមកខាងរដ្ឋាភិបាលជាមួយក្រុមហ៊ុន បានឲ្យ ៨នាក់ នៅក្នុងឃុំហ្នឹងនៅក្រៅឃុំដែរ អ៊ីចឹងរឿងហ្នឹងបញ្ចប់ហើយ»។
កាលពីថ្ងៃដើមខែមិថុនា ឆ្នាំ២០១៣ កម្មកររោងចក្រកាត់ដេរ សាប្រ៊ីណា ស្ថិតក្នុងខេត្តកំពង់ស្ពឺ ជិត ២ពាន់នាក់ បានធ្វើកូដកម្មទាមទារដំឡើងប្រាក់ខែគោលបន្ថែម។ កូដកម្មនោះបានឈានទៅដល់ការប្រើអំពើហិង្សា ធ្វើឲ្យកម្មការិនីរោងចក្រ ២នាក់រលូតកូន និងកម្មករជាច្រើនរងរបួស។
ភ្លាមនោះ ក្រុមហ៊ុនបានប្ដឹងថ្នាក់ដឹកនាំសហជីពសេរីកម្មករ ១៦នាក់ ទៅតុលាការ។ ក្នុងនោះមាន ៨នាក់ ត្រូវបានតុលាការឃុំខ្លួនក្នុងពន្ធនាគារ ពីបទផ្ដើមគំនិតក្នុងអំពីហិង្សាដោយចេតនា មានស្ថានទម្ងន់ទោស និងផ្ដើមគំនិតក្នុងអំពើធ្វើឲ្យខូចខាតដោយចេតនា មានស្ថានទម្ងន់ទោស។ អ្នកទាំង ៨នាក់នោះ ត្រូវតុលាការខេត្តកំពង់ស្ពឺ សម្រេចដោះលែងឲ្យនៅក្រៅឃុំ ស្ថិតក្រោមការត្រួតពិនិត្យរបស់តុលាការ កាលពីខែតុលា ឆ្នាំ២០១៣ ក្រោយពីបានឃុំខ្លួន ៤ខែរួចមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។