លោក គឹម សុខ៖ ការ​សម្រេច​របស់​តុលាការ​កំពូល​ធ្វើ​ទៅ​តាម​ការ​ចង់​បាន​របស់​លោក ហ៊ុន សែន

ដោយ រ៉ាន់ សំណាង
2017-07-05
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
លោក គឹម សុខ (ឆ្វេង) អ្នក​ឃ្លាំ​មើល​សង្គម និង​នយោបាយ និង​លោក​នាយករដ្ឋមន្ត្រី ហ៊ុន សែន (ស្ដាំ)។ RFA
លោក គឹម សុខ (ឆ្វេង) អ្នក​ឃ្លាំ​មើល​សង្គម និង​នយោបាយ និង​លោក​នាយករដ្ឋមន្ត្រី ហ៊ុន សែន (ស្ដាំ)។ RFA
RFA

តុលាការ​កំពូល សម្រេច​បដិសេធ​ចោល​បណ្ដឹង​សាទុក្ខ​ពីរ​ផ្សេង​គ្នា​របស់​មេធាវី ជូង ជូងី ក្នុង​សំណុំ​រឿង​លោក គឹម សុខ នៅ​ព្រឹក​ថ្ងៃ​ទី​៥ កក្កដា ឆ្នាំ​២០១៧។ ចំពោះ​ការ​សម្រេច​របស់​តុលាការ​ជាន់​ខ្ពស់​នេះ អ្នក​វិភាគ​បញ្ហា​សង្គម​ដែល​កំពុង​ជាប់​ឃុំ​ថា ជា​ការ​សម្រេច​ និង​សម្រួល​ទៅ​តាម​ការ​ចង់​បាន​របស់​លោក​នាយករដ្ឋមន្ត្រី ហ៊ុន សែន តែប៉ុណ្ណោះ។ ប៉ុន្តែ​មេធាវី​ដើម​បណ្ដឹង​យល់​ថា​ ការ​និយាយ​នេះ​មិន​មែន​ជា​រឿង​ថ្មី​នោះ​ទេ។

ករណី​លោក គឹម សុខ​ ដែល​កំពុង​ជាប់​ឃុំ​ក្នុង​ពន្ធនាការ​ជាង ៤​ខែ​មក​នេះ​ត្រូវ​បាន​តុលាការ​កំពូល សម្រេច​ទាត់​ចោល​បណ្ដឹង​សាទុក្ខ​មេធាវី ជូង ជូងី ដែល​ស្នើ​សុំ​ឲ្យ​កូន​ក្ដី​ខ្លួន​បាន​នៅ​ក្រៅ​ឃុំ​បណ្ដោះអាសន្ន។ អ្នកស្រី ឃឹម សត្ថាវី ជា​ចៅក្រម​កាត់​ក្ដី​រឿង​នេះ​យល់​ថា ការ​សម្រេច​របស់​សាលាឧទ្ធរណ៍​មិន​អនុញ្ញាត​ឲ្យ​លោក​ គឹម សុខ នៅ​ក្រៅ​ឃុំ​នោះ គឺ​ត្រឹមត្រូវ​តាម​គតិ​ច្បាប់។ ប្រហែល​ជា ២០​នាទី​ក្រោយ​មក​ទៀត​ តុលាការ​កំពូល​ក៏​ប្រកាស​សាល​ដីកា​មួយ​ទៀត ករណី​លោក​ គឹម សុខ ដដែល។ នោះ​គឺ​ជា​សាលដីកា​ប្រកាស​ដោយ​ប្រធាន​ចៅក្រម​ជំនុំជម្រះ លោក សឹង្ហ បញ្ញាវុឌ្ឍ បដិសេធ​ចោល​បណ្ដឹង​សាទុក្ខ​របស់​មេធាវី ជូង ជូងី ​ដែល​ស្នើ​សុំ​ឲ្យ​បំពេញ​កិច្ច​កោះ​ហៅ​ដើម​បណ្ដឹង​មក​សួរ​ត​ទល់​គ្នា​ជាមួយ​ជន​ត្រូវ​ចោទ។ ដើមបណ្ដឹង​ក្នុង​រឿង​នេះ គឺ​លោក​នាយករដ្ឋមន្ត្រី ហ៊ុន សែន ចំណែក​ជន​ត្រូវ​ចោទ គឺ​ជា​លោក គឹម សុខ។

ក្រោយ​ពី​ស្ដាប់​ការ​ប្រកាស​សាលដីកា ហើយ​ត្រូវ​បាន​ឆ្មាំ​ពន្ធនាគារ​នាំ​ខ្លួន​ទៅ​គុក​ព្រៃ​ស​វិញ លោក គឹម សុខ​ និយាយ​ថា ការ​សម្រេច​របស់​តុលាការ​កំពូល​លើ​សំណុំ​រឿង​ទាំង​ពីរ​នេះ គឺ​ជា​រឿង​អយុត្តិធម៌​សម្រាប់​រូប​លោក។ លោក​ហៅ​សាលដីកា​នោះ​ថា ជា​ការ​សម្រេច​ ហើយ​សម្រប​សម្រួល​ផ្លូវ​ច្បាប់​ទៅ​តាម​ការ​ចង់​បាន​របស់​លោក​នាយករដ្ឋមន្ត្រី​ ហ៊ុន សែន តែ​ប៉ុណ្ណោះ។

ការ​លើក​ឡើង​របស់​​អ្នក​វិភាគ​រូប​នេះ ត្រូវ​បាន​មេធាវី​របស់​លោក ហ៊ុន សែន គឺ​លោក​ គី តិច​ យល់​ថា មិន​មែន​ជា​រឿង​ថ្មី​ទេ ដែល​លោក គឹម សុខ តែង​តែ​ចោទ​ថា ដើម​បណ្ដឹង​មាន​អំណាច​ មាន​ឥទ្ធិពល​បញ្ជា​ទៅ​តុលាការ ហើយ​តុលាការ​ធ្វើ​តាម​អំណាច​របស់​ដើម​បណ្ដឹង។ លោក គី តិច បញ្ជាក់​ថា បើ​លោក ហ៊ុន សែន ប្រើ​អំណាច​មក​លើ​ប្រព័ន្ធ​តុលាការ នោះ​ពុំ​ចាំ​បាច់​ពឹង​លោក​ជា​មេធាវី​ប្ដឹង​ទៅ​តុលាការ​នេះ​ទេ៖ «សម្ដេច​អត់​បាន​ប្រើ​សិទ្ធិ​និង​អំណាច​របស់​គាត់ ជា​ប្រធាន​គណបក្ស​ប្រជាជន អំណាច​ជា​ប្រមុខ​រដ្ឋាភិបាល​ទេ នៅ​ក្នុង​រឿង​នេះ។ សូម្បី​តែ​សម្ដេច​ចេញ​មក​ខ្លួន​ឯង ក៏​សម្ដេច​អត់​មក​ដែរ សម្ដេច គឺ​សម្ដេច​ប្រគល់​សិទ្ធិ​មក​ឲ្យ​ខ្ញុំ ដូច​ពលរដ្ឋ​សាមញ្ញ​ទូទៅ គឺ​ថា ពឹង​មេធាវី​ឲ្យ​ធ្វើ​បណ្ដឹង ធ្វើ​គ្រប់​នីតិវិធី​មក​តុលាការ»

ខណៈ​ឆ្នាំ​ពន្ធនាគារ​បណ្ដើរ​លោក គឹម សុខ ជាមួយ​ជន​ត្រូវ​ចោទ​ផ្សេង​ទៀត​ទៅ​រថយន្ត​ដឹក​​ទៅ​គុក​វិញ ប្អូន​ប្រុស​លោក គឹម សុខ គឺ​លោក គឹម សែង ដែល​ព្យាយាម​ហុច​បាយ​ទឹក​ឲ្យ​បង​របស់​ខ្លួន​ម្ដង​ជា​ពីរ​ដង​នោះ មិន​ត្រូវ​បាន​ឆ្នាំ​គុក​អនុញ្ញាត​ឲ្យ​ហុច​បាយ​ទឹក​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

Sam Dach Dek Kol Sen is only brave behind the scenes, he dares not confront any educated people, he dates only challenge face to face with those who are not educated and easy to intimidate. Shame on him and the CPP that has such a timid leader!!!

Jul 05, 2017 02:20 AM

គេហទំព័រ​ទាំងមូល