ក្រុមហ៊ុន អូស៊ីអាយស៊ី (OCIC) រងការចោទពីប្រជាពលរដ្ឋជិត ៥០គ្រួសារ ថាបូមខ្សាច់ពន្លិចយកដីប្រជាពលរដ្ឋចំនួន ៣សង្កាត់ ក្នុងខណ្ឌជ្រោយចង្វារ រាជធានីភ្នំពេញ។ បញ្ហានេះ ប្រជាពលរដ្ឋដាក់ពាក្យប្ដឹងសុំឲ្យសាលាដំបូងរាជធានីភ្នំពេញ រក្សាការពារដី និងផ្អាកក្រុមហ៊ុនឈប់បូមខ្សាច់បណ្ដោះអាសន្ន ដើម្បីរកដំណោះស្រាយសិន។
ប៉ុន្តែកាលពីថ្ងៃទី១២ ខែឧសភា ឆ្នាំ២០១៤ តុលាការ បានបដិសេធពាក្យស្នើសុំនោះ ទើបប្រជាពលរដ្ឋប្ដឹងបន្តទៅសាលាឧទ្ធរណ៍បន្តទៀត ហើយត្រូវអង្គជំនុំជម្រះនៃសាលាឧទ្ធរណ៍ បើកសវនាការសាកសួរនៅថ្ងៃទី២២ ខែតុលា ឆ្នាំ២០១៤។
ចៅក្រមជំនុំជម្រះសាលាឧទ្ធរណ៍ លោក ប៉ុល សំអឿន ប្រកាសថា នឹងចេញសេចក្តីសម្រេចរបស់តុលាការនៅថ្ងៃទី២៧ ខែតុលា ទាក់ទងនឹងពាក្យបណ្ដឹងរបស់ប្រជាពលរដ្ឋ សុំឲ្យតុលាការចេញដីការក្សាការពារ ដើម្បីឲ្យក្រុមហ៊ុន អូស៊ីអាយស៊ី ផ្អាកសកម្មភាពបូមខ្សាច់លុបដី និងផ្ទះប្រជាពលរដ្ឋ ដោយពុំផ្តល់សំណងសមរម្យ។
ការគ្រោងប្រកាសរបស់ចៅក្រមសាលាឧទ្ធរណ៍នេះ ធ្វើឡើងក្រោយពីសវនាការសាកសួរដើមបណ្ដឹងមកពីសង្កាត់ជ្រោយចង្វារ សង្កាត់ព្រែកលៀប សង្កាត់ព្រែកតាសេក ដែលប្ដឹងចោទក្រុមហ៊ុន អូស៊ីអាយស៊ី ថាបូមខ្សាច់ពន្លិចដំណាំបំបាត់ភស្តុតាងព្រំប្រទល់ដី តាំងពីឆ្នាំ២០១២ មកដល់បច្ចុប្បន្ន នៅសាលាឧទ្ធរណ៍ នាព្រឹកថ្ងៃទី២២ ខែតុលា។
មេធាវីជួយការពារក្តីឲ្យប្រជាពលរដ្ឋចំនួន ៣សង្កាត់ ដែលរងផលប៉ះពាល់ពីការបូមខ្សាច់ពីសំណាក់ក្រុមហ៊ុន អូស៊ីអាយស៊ី លោក ហុង គឹមសួន ថ្លែងថា ក្រុមហ៊ុន អូស៊ីអាយស៊ី បូមខ្សាច់ចាក់ពន្លិចយកដីរបស់ប្រជាពលរដ្ឋចាប់ពីគល់ស្ពានជ្រោយចង្វារ ទៅទិសខាងជើង គឺចន្លោះទន្លេសាប ទៅផ្លូវជាតិលេខ៦ បានប៉ះពាល់ដីទំហំប្រមាណជិត ៤០០ហិកតារ (៣៨៨ហិកតារ)។ លោកថា ដីទាំងអស់នោះ គឺប្រជាពលរដ្ឋសុទ្ធតែមានប័ណ្ណសម្គាល់ភោគៈ ដែលចេញឲ្យដោយអាជ្ញាធរមូលដ្ឋាន៖ «ការបើកសវនាការនៅព្រឹកនេះ យើងមិនទាន់ដឹងថា តុលាការលោកនឹងសម្រេចយ៉ាងម៉េចទេ យើងរង់ចាំមើលការដេញដោលគ្នាបន្តិចសិន»។
អនុប្រធានភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ លោក អ៊ិន លួន ឲ្យដឹងថា ក្រុមហ៊ុន អូស៊ីអាយស៊ី គឺសាលារាជធានីភ្នំពេញ អនុញ្ញាតឲ្យវិនិយោគ ៩៩ឆ្នាំ នៅតំបន់រណបជ្រោយចង្វារ។ ក្រុមហ៊ុនបូមខ្សាច់ពន្លិចដំណាំអ្នកភូមិ ៣ភូមិ និង ៣សង្កាត់ មានសង្កាត់ជ្រោយចង្វារ ភូមិដើមគរ សង្កាត់ព្រែកលៀប ភូមិកៀនឃ្លាំង និងសង្កាត់ព្រែកតាសេក ភូមិព្រែកតាសេក។ លោកបន្តថា ការបូមខ្សាច់ពន្លិចនោះ បានប៉ះពាល់ដីដាំដំណាំរបស់គាត់ ដែលដាំបន្លែអាជីវកម្មសម្រាប់ផ្គត់ផ្គង់ភោជនីយដ្ឋាន និងសណ្ឋាគារទំនើប ដែលគាត់ទទួលបានប្រាក់ចំណូលក្នុង១ឆ្នាំចាប់ពី ៣ពាន់ ទៅ ៤ពាន់ដុល្លារ។ លោកថា ក្រោយពេលបូមខ្សាច់ចាក់ពន្លិចដីគាត់មក អ្នកភូមិបាត់បង់ប្រាក់ចំណូលនោះ។ ចំណែកខាងក្រុមហ៊ុន បានកំណត់តម្លៃសំណង ១ម៉ែត្រការ៉េថ្លៃ ១៥ដុល្លារ។ បើម្ចាស់ដីនៅភ្នំពេញ ឬខេត្តផ្សេងៗ ឲ្យថ្លៃមួយម៉ែត្រការ៉េ ៣ ទៅ ៤ដុល្លារ។ លោកថា ដោយសារការចរចាតម្លៃដីពលរដ្ឋមិនអាចទទួលយកបាន ទើបក្រុមហ៊ុនបង្ខំបូមខ្សាច់ពន្លិចយ៉ាងលឿន បំបាត់ភស្តុតាងសម្គាល់ទីតាំងកម្មសិទ្ធិនៃម្ចាស់ដីនីមួយៗនៅតំបន់នោះ៖ «ប៉ុន្តែទឹកហ្នឹងវាអត់ចេញទេ វាត្រូវនៅចាល់ពេញនៅក្នុងបឹងហ្នឹង យើងត្រូវធ្វើស្អីក៏មិនបានដែរ វារំលោភយកទាំងស្រុងតែម្តង។ ឲ្យសងដើម្បីរកដំណោះស្រាយមកឲ្យយើងវិញ ឲ្យក្រុមហ៊ុន អូស៊ីអាយស៊ី ហ្នឹង»។
មន្ត្រីក្រសួងកសិកម្ម អ្នកស្រី ប៊ុន មុំ ជាដើមបណ្ដឹងមួយរូបដែរ ឲ្យដឹងថា ប្រាក់ខែមន្ត្រីរាជការទាប ទើបគាត់ធ្វើចម្ការយកកម្រៃបន្ថែមចិញ្ចឹមជីវិត។ ប៉ុន្តែ ក្រុមហ៊ុន អូស៊ីអាយស៊ី បំផ្លាញជីវភាពរបស់គាត់ពីរស់នៅសមរម្យ មកធ្លាក់ខ្លួនក្រីក្រ ដើរខ្ចីបុលគេច្រើនឆ្នាំមកនេះ។ អ្នកស្រីស្នើសុំឲ្យរាល់ការវិនិយោគ រដ្ឋាភិបាលមិនត្រូវមើលផែនទី ហើយគូសប្លង់យកដីទំហំប៉ុន្មានៗ សម្រេចផ្តល់ទីតាំងឲ្យក្រុមហ៊ុនវិនិយោគនោះទេ៖ «មានការបូមខ្សាច់មកលើហ្នឹង ខ្ញុំក៏ខានប្រកបមុខរបរហ្នឹងទៅ។ ឥឡូវជីវភាពខ្ញុំកាន់តែដុនដាបទៅ។ រាល់ថ្ងៃនេះ ខ្ញុំញ៉ាំតែបបរទេ រស់នៅទាំងត្រដាបត្រដួស។ ហើយមិនត្រឹមតែប៉ុណ្ណឹងទេ ខ្ញុំទៅខ្ចីបុលគេយកមកដោះស្រាយជីវភាពគ្រួសារម្តងម្កាលទៀត»។
នៅក្នុងសវនាការសាកសួរក្នុងសាលាឧទ្ធរណ៍ នាថ្ងៃទី២២ ខែតុលា មិនមានតំណាងក្រុមហ៊ុន អូស៊ីអាយស៊ី ដែលប្រជាពលរដ្ឋប្ដឹងចោទនោះមកចូលរួមទេ ប៉ុន្តែមានមេធាវីរបស់សាលារាជធានីភ្នំពេញ លោក សួន សុផល មកជំនួសវិញ។ លោក សួន សុផល ប្រាប់ទៅចៅក្រមថា សាលារាជធានីភ្នំពេញ ផ្តល់ឲ្យក្រុមហ៊ុន អូស៊ីអាយស៊ី របស់ឧកញ៉ា ពុង ខៀវសែ ម្ចាស់ធនាគារកាណាឌីយ៉ា (Canadiana) វិនិយោគដីនៅជ្រោយចង្វារ ជាតំបន់រណបរាជធានី។ លោកបន្តថា ការបូមខ្សាច់ចាក់លើដីដើមបណ្ដឹងនោះ មិនបានបំបាត់ភស្តុតាងព្រំប្រទល់ដីទេ គឺដីនៅតែជាដី មិនបាត់ទៅណាឡើយ ហើយសាលារាជធានីភ្នំពេញ រង់ចាំប្រជាពលរដ្ឋម្ចាស់ដីដែលស្ម័គ្រចិត្តទទួលយកប្រាក់គោលនយោបាយ។ លោកស្នើសុំឲ្យតុលាការ ច្រានចោលពាក្យស្នើសុំរក្សាការពារដីរបស់ប្រជាពលរដ្ឋ ហើយបើកផ្លូវឲ្យមានការវិនិយោគបន្ត។
មន្ត្រីផ្នែកច្បាប់ នៃអង្គការសិទ្ធិលំនៅឋាន លោក ណន អូននី ឲ្យដឹងថា ក្រុមហ៊ុន អូស៊ីអាយស៊ី និងសាលារាជធានីភ្នំពេញ បានរំលោភច្បាប់ភូមិបាលមាត្រា២៤៩ និង២៥០។ លោកថា សកម្មភាពបូមខ្សាច់របស់ក្រុមហ៊ុន បង្កផលប៉ះពាល់ដល់ការរស់នៅរបស់អ្នកដទៃ ត្រូវមានទោសព្រហ្មទណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។