មេបញ្ជាការកងរាជអាវុធហត្ថស្រុកបវេល ខេត្តបាត់ដំបង រងការចោទប្រកាន់ថា បានបើកឡានចូលទៅឈប់មុខផ្ទះប្រជាពលរដ្ឋមួយគ្រួសារ បន្ទាប់មកចុះពីលើរថយន្តចូលទៅក្នុងផ្ទះចាប់បោចសក់អូសយុវជនម្នាក់មកខាងក្រៅ យកអាវុធភ្ជង់ក្បាលវាយនឹងស្វាយកាំភ្លើង បណ្ដាលឲ្យបែកក្បាលដោយពុំមានមូលហេតុច្បាស់លាស់។ ករណីហិង្សានេះ ក្រុមគ្រួសារជនរងគ្រោះកំពុងស្វះស្វែងរកយុត្តិធម៌តាមផ្លូវច្បាប់ ដោយបានដាក់ពាក្យបណ្ដឹងទៅតុលាការ។
គ្រួសារជនរងគ្រោះបានដាក់ពាក្យបណ្ដឹងទៅតុលាការខេត្តបាត់ដំបង នៅថ្ងៃទី២ ខែឧសភា ឆ្នាំ២០១៤ ដោយចោទប្រកាន់មេបញ្ជាការប៉េអិមស្រុកបវេល ម្នាក់ពីបទប្រើអំពើហិង្សា អាវុធភ្ជង់ និងវាយនឹងស្វាយកាំភ្លើងទៅលើប្រជាពលរដ្ឋម្នាក់ដោយពុំមានមូលហេតុច្បាស់លាស់ បណ្ដាលឲ្យជនរងគ្រោះរបួសបែកក្បាល។
ប្រជាពលរដ្ឋឈ្មោះ យួម យឿត អាយុ ៥០ឆ្នាំ រស់នៅភូមិត្រពាំងក្បាលស្វា ឃុំឃ្លាំងមាស ស្រុកបវេល ខេត្តបាត់ដំបង។ លោកថ្លែងនៅថ្ងៃទី២ ខែឧសភា ថា កាលពីម៉ោង ៩ និង ៣០នាទីយប់ ថ្ងៃទី២៦ ខែមេសា ឆ្នាំ២០១៤ មេបញ្ជាការកងរាជអាវុធហត្ថស្រុកបវេល ឈ្មោះ សុខ ជាសំណាង បានបើកឡានទៅឈប់នៅផ្ទះរបស់គាត់។ បន្ទាប់មក លោក សុខ ជាសំណាង បានចុះពីលើរថយន្តចូលទៅក្នុងផ្ទះ ចាប់ក្របួចសក់ក្មួយរបស់គាត់ឈ្មោះ មិន ស៊ីថា ហៅក្ដឹប អាយុ ២១ឆ្នាំ ដែលកំពុងអង្គុយមើលទូរទស្សន៍ យកកាំភ្លើងខ្លីភ្ជង់ក្បាលអូសចេញមកក្រៅផ្ទះ បន្ទាប់មកវាយនឹងស្វាយកាំភ្លើងបណ្ដាលឲ្យរបួសបែកក្បាល៖ «ពេលវាយក្មួយខ្ញុំបែកក្បាលហើយ ស្រែកហៅខ្ញុំ អា យឿត។ ដល់ខ្ញុំងើបពីដេកចេញមក អាកៃកាំភ្លើងភ្ជង់ខ្ញុំនៅមាត់ទ្វារ ភ្ជង់ខ្ញុំហើយខ្ញុំគេចទៅចង្ក្រានបាយ ហើយប្រពន្ធខ្ញុំចេញ កាំភ្លើងខ្លីនៅតែភ្ជង់កាន់ជាប់ ប្រពន្ធខ្ញុំមកជួបនិយាយប្រហែលជិតកន្លះម៉ោង ក្រោយមកបើកឡានចេញទៅផ្ទះគាត់វិញ»។
លោកស្រី ឡាំង សេន អាយុ ៣៨ឆ្នាំ ត្រូវជាភរិយារបស់ លោក យួម យឿត បញ្ជាក់ថា នៅមុនការប្រើអំពើហិង្សា លោក សុខ ជាសំណាង បានទៅដល់ផ្ទះរបស់គាត់ស្រែករកឈ្មោះ ឆានី។ បន្ទាប់មកចូលទៅក្នុងផ្ទះឃើញក្មួយរបស់គាត់កំពុងអង្គុយមើលទូរទស្សន៍ ក៏ចាប់ក្របួចសក់ទាញយកទៅវាយតែម្ដង៖ «វាយនឹងកាំភ្លើងខ្លី គាត់មុនហ្នឹងគាត់មកអូសក្មួយខ្ញុំហ្នឹង គាត់យកដៃមួយចំហៀងកាន់សក់ក្មួយខ្ញុំអូស ហើយគាត់យកកាំភ្លើងភ្ជង់ក្បាលក្មួយខ្ញុំទៀត វាយបីកាំភ្លើងខ្លី ខ្ញុំក៏មិនតបតអីដែរ ខ្ញុំនៅស្ងៀម ហើយគាត់លែងក្មួយខ្ញុំ ទៅគាត់បកមករកប្ដីខ្ញុំវិញ មកស្រែកហៅ អា យឿត បីមាត់ក៏ប្ដីស្ទុះពីដេក ងើបដើរចេញមកមាត់ទ្វារ គាត់អាកៃកាំភ្លើងភ្ជង់»។
លោកស្រី ឡាំង សេន បន្តថា ដោយមានការភ័យខ្លាច ប្ដីរបស់គាត់បានរត់គេចចេញ ចំណែកឯឈ្មោះ សុខ ជាសំណាង ជាមេប៉េអិមស្រុកបវេល នៅតែយកកាំភ្លើងភ្ជង់លើរូបលោកស្រីថែមទៀត៖ «កាំភ្លើងនៅភ្ជង់រហូត ខ្ញុំក៏និយាយស្រួលដែរថា អ្នកអើយអ្នកឯងស្ដាប់ខ្ញុំសិនរឿងឈ្មោះ ឆានី មិនមែននៅក្នុងគ្រួសារខ្ញុំទេ គាត់ក៏ឆ្លើយមកវិញ ខ្ញុំមិនចង់និយាយជាមួយអ្នកឯងទេ ខ្ញុំចង់និយាយជាមួយ អា យឿត ខ្ញុំថា ប្ដីខ្ញុំក៏មិនពាក់ព័ន្ធអីដែរអ្នកឯងរកវាទៅខ្ញុំមិនដឹងទេ គាត់ថា មានគេប្រាប់ខ្ញុំថា អា ឆានី នៅផ្ទះអ្នកឯង ហើយក្មួយខ្ញុំក៏បានឆ្លើយជាមួយគាត់ខ្ញុំមិន អា ឆានី ទេ ខ្ញុំ អា ក្ដឹប ទេ»។
ជនរងគ្រោះឈ្មោះ មិន ស៊ីថា ហៅ ក្ដឹប បញ្ជាក់ថា នៅយប់កើតហេតុនោះ រូបគាត់កំពុងអង្គុយមើលទូរទស្សន៍នៅផ្ទះម្ដាយមីងរបស់ខ្លួន។ ស្រាប់តែមន្ត្រីកងរាជអាវុធហត្ថឈ្មោះ សុខ ជាសំណាង ទៅស្រែកហៅរកឈ្មោះ ឆានី ចំនួនពីរទៅបីមាត់៖ «នៅពេលគាត់មករក អា ឆានី ខ្ញុំកំពុងអង្គុយលើសាឡុងមើលទូរទស្សន៍ហ្នឹង គាត់ចាប់បោចសក់ខ្ញុំចេញមកក្រៅ ខ្ញុំឆ្លើយថា ខ្ញុំមិនមែន អា ឆានី ទេ ខ្ញុំប្អូន អា ឆានី ឈ្មោះ អា ក្ដឹប គាត់ថា អា ក្ដឹប ក៏អា ក្ដឹប ទៅ ស្រាប់តែចាប់ទាញសក់យកមកវាយបីដងចំបង្ហើយ ពេលគេលែងខ្ញុំវិញខ្ញុំរត់ឲ្យបងបិទថ្នាំឲ្យ»។
កាលពីយប់ថ្ងៃទី២៦ ខែមេសា មេបញ្ជាការកងរាជអាវុធឈ្មោះ សុខ ជាសំណាង បានជិះរថយន្តទៅឈប់នៅផ្ទះជនរងគ្រោះស្រែកហៅរកឈ្មោះ ឆានី ដែលត្រូវជាក្មួយរបស់ម្ចាស់ផ្ទះឈ្មោះ យួប។ ពេលនោះឈ្មោះ ក្ដឹប ត្រូវជាប្អូនរបស់ឈ្មោះ ឆានី បានចេញទៅជួប ក៏ត្រូវ លោក សុខ ជាសំណាង ដកកាំភ្លើងខ្លីវាយចំក្បាល បណ្ដាលឲ្យរបួសបែកក្បាល។ បន្ទាប់មក ឈ្មោះ សុខ ជាសំណាង បានស្រែករកឈ្មោះ យឿត នៅឯណា។ ក្រោយមកក៏មានការភ្ជង់កាំភ្លើងទៅលើម្ចាស់ផ្ទះ។
វិទ្យុអាស៊ីសេរី មិនអាចទាក់ទងមេបញ្ជាការកងរាជអាវុធហត្ថឈ្មោះ សុខ ជាសំណាង ដើម្បីបញ្ជាក់ជុំវិញបញ្ហានេះបានទេ នៅថ្ងៃទី២ ខែឧសភា ឆ្នាំ២០១៤។
ប៉ុន្តែ មន្ត្រីនាំពាក្យកងរាជអាវុធហត្ថលើផ្ទៃប្រទេស លោកវរសេនីយ៍ឯក ខេង ទីតូ បញ្ជាក់ថា លោកពុំទាន់បានទទួលរបាយការណ៍ជុំវិញករណីជាផ្លូវការទេ គឺគ្រាន់តែបានដឹងតាមសារព័ត៌មានដែលបានចុះផ្សាយប៉ុណ្ណោះ។ លោកបន្តថា បើសិនជាករណីស៊ើបអង្កេតរកឃើញការពិតនោះ មេបញ្ជាការកងរាជអាវុធហត្ថស្រុកបវេល រូបនោះ នឹងត្រូវទទួលទោសតាមបទបញ្ជាផ្ទៃក្នុងរបស់អង្គភាពកងរាជអាវុធហត្ថ។
មន្ត្រីសម្របសម្រួលសមាគមអាដហុក លោក យិន ម៉េងលី ថ្លែងថា តាមការស៊ើបអង្កេតប្រមូលភស្តុតាងរកឃើញថា មន្ត្រីកងរាជអាវុធហត្ថមិនគប្បីធ្វើដូច្នេះទេ។ លោកបន្តថា ក្នុងសាច់រឿងនេះ មន្ត្រីកងរាជអាវុធហត្ថបានរំលោភចូលទៅក្នុងលំនៅឋានរបស់ជនរងគ្រោះនៅម៉ោងជាង ៩យប់។ ករណីទី២ មន្ត្រីកងរាជអាវុធហត្ថបានប្រើហិង្សាវាយនឹងកាំភ្លើងទៅលើជនរងគ្រោះឈ្មោះ មិន ស៊ីថា បណ្ដាលឲ្យរបួសបែកក្បាល និងករណីទី៣ មន្ត្រីកងរាជអាវុធហត្ថរូបនោះបានយកកាំភ្លើងភ្ជង់ទៅលើឪពុកមារបស់ឈ្មោះ មិន ស៊ីថា៖ «អ៊ីចឹងនេះជាបទល្មើសដែលមានចែងនៅក្នុងក្រមព្រហ្មទណ្ឌរបស់យើង ហេតុអីបានជាគាត់ធ្វើរបៀបនេះ ដែលគាត់ជាមន្ត្រីអនុវត្តច្បាប់ ធ្វើឲ្យប្រជាពលរដ្ឋមានការភិតភ័យ អ៊ីចឹងចំណុចនេះដែលធ្វើឲ្យជនរងគ្រោះគាត់មិនត្រូវការសំណង គាត់ចង់ឲ្យមន្ត្រីអនុវត្តច្បាប់ហ្នឹងឲ្យបានត្រឹមត្រូវ គាត់សុខចិត្តប្ដឹងឲ្យធ្វើតាមច្បាប់ ដើម្បីឲ្យប្រជាពលរដ្ឋគាត់មានជំនឿទុកចិត្ត»។
មន្ត្រីសិទ្ធិមនុស្សដដែលបន្តថា ទោះបីរឿងនេះជារឿងបុគ្គល ប៉ុន្តែករណីនេះបានប៉ះពាល់ទៅដល់អង្គភាព ធ្វើឲ្យមានឈ្មោះមិនល្អទៅដល់ស្ថាប័នរបស់រដ្ឋ។ ហើយបញ្ហានេះ ទាមទារឲ្យមានការអនុវត្តវិធានការផ្លូវច្បាប់ឲ្យបានម៉ឺងម៉ាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។