ព្រះរាជអាជ្ញាអមតុលាការខេត្តមណ្ឌលគិរី បដិសេធមិនចាត់ការបណ្ដឹងចោទប្រកាន់មេការក្រុមហ៊ុនឯកជនមួយជាកម្មសិទ្ធិរបស់ភរិយាអភិបាលរងខេត្ត ពីបទប៉ុនប៉ងធ្វើមនុស្សឃាតមកលើសកម្មជនសិទ្ធិមនុស្សឡើយ។ សកម្មជនសិទ្ធិមនុស្សជាដើមបណ្ដឹងអះអាងថា ការបដិសេធនេះគឺជាការសម្រេចមិនផ្ដល់យុត្តិធម៌ក្នុងរឿងក្ដីនេះទេ។
សកម្មជនសិទ្ធិមនុស្សសមាគមអាដហុក (Adhoc) ខេត្តមណ្ឌលគិរី នៅថ្ងៃច័ន្ទ ទី២៨ ខែកក្កដា អះអាងថា នឹងរៀបចំប្ដឹងតវ៉ាសេចក្ដីបដិសេធនេះទៅតុលាការសាលាឧទ្ធរណ៍ដើម្បីដំណើរការរឿងក្តីនេះបន្ត។
ការអះអាងនេះធ្វើឡើងបន្ទាប់ពីតំណាងអយ្យការអមសាលាដំបូងខេត្តមណ្ឌលគិរី លោក ឃុត សុភាង កាលពីថ្ងៃទី២២ ខែកក្កដា បានចេញលិខិតជូនដំណឹងតម្កល់ទុកឥតចាត់ការពាក្យបណ្ដឹងរបស់មន្ត្រីសម្របសម្រួលសមាគមអាដហុកខេត្ត លោក សុក រដ្ឋា ដែលបានប្ដឹងមេការក្រុមហ៊ុន វីឡេក ឌីវឺឡុបមែន (Village Development) លោក គង់ សុខុម ដែលបានប្រើប្រាស់រថយន្តដេញបុកសម្លាប់លោក សហការី និងសហគមន៍កំពុងធ្វើដំណើរនៅចម្ងាយ ២០០ម៉ែត្រ ពីច្រកចូលក្រុមហ៊ុនដើម្បីស៊ើបអង្កេតពាក្យប្ដឹងរបស់សហគមន៍ដែលអះអាងថា ក្រុមហ៊ុនរំលោភឈូសឆាយដើមឈើផលិតជ័រទឹក និងព្រៃឈើសហគមន៍។
ថ្លែងជំទាស់នៅនឹងសេចក្ដីជូនដំណឹងនេះ លោក សុក រដ្ឋា ចាត់ទុកការសម្រេចនេះមានភាពលំអៀងទៅលើភាគីក្រុមហ៊ុន និងមិនបានស៊ើបអង្កេតហ្មត់ចត់។ លោកសំដែងសុទិដ្ឋិនិយមថា មន្ត្រីស្ថាប័នអយ្យការសាលាឧទ្ធរណ៍នឹងចាត់ការឲ្យមានការស៊ើបអង្កេតរឿងនេះ និងធ្វើការចោទប្រកាន់ជនពាក់ព័ន្ធប្រើអំពើហិង្សារំលោភសិទ្ធិមនុស្សដើម្បីតុលាការសម្រេចផ្ដន្ទាទោសតាមច្បាប់។
លោក សុក រដ្ឋា៖ «តុលាការត្រូវបើកការស៊ើបអង្កេតឲ្យបានត្រឹមត្រូវមុននឹងតម្កល់រឿងនីមួយៗ អ៊ីចឹងរឿងហ្នឹងកើតឡើងយើងត្រូវតែប្ដឹងដើម្បីស្វែងរកភាពយុត្តិធម៌ចំពោះខ្លួនឯងផង ក៏ដូចប្រជាពលរដ្ឋផងដែរ»។
សកម្មជនសិទ្ធិមនុស្សសមាគមអាដហុក ចំនួនបីនាក់ រួមទាំងប្រជាពលរដ្ឋសហគមន៍ឡៅកា សង្កាត់សុខដុម ក្រុងសែនមនោរម្យ ៩នាក់ កាលពីថ្ងៃទី៨ ខែមករា អះអាងថា ពួកគាត់បានរងការគំរាមពីសំណាក់បុគ្គលិកក្រុមហ៊ុន ខណៈពេលពួកគេចុះស៊ើបអង្កេតពីសកម្មភាពឈូសឆាយកាប់យកដើមឈើផលិតជ័រទឹក ដែលជាមុខរបរប្រពៃណីជនជាតិដើមនៅតំបន់នោះ។
ឆ្លើយតបបញ្ហានេះ ព្រះរាជអាជ្ញាអមតុលាការសាលាដំបូងខេត្តមណ្ឌលគិរី លោក ឃុត សុភាង អះអាងថា ការចោទប្រកាន់នេះមិនមានធាតុផ្សំគ្រប់គ្រាន់អាចដាក់បន្ទុកទៅលើភាគីចុងចោទបាន។ លោកបន្តថា ភាគីដើមចោទអាចប្ដឹងទាស់ការសម្រេចនេះបានតាមការកំណត់នៃច្បាប់៖ «នេះជាការសម្រេចចិត្តរបស់អយ្យការ ពិនិត្យលើធាតុផ្សំបទល្មើសវាអត់មានអយ្យការអាចតម្កល់ឥតចាត់ការ ហើយទុកសិទ្ធិជូនភាគីម្ខាងមានសិទ្ធិប្ដឹងឧទ្ធរណ៍ គាត់មានសិទ្ធិប្ដឹងមួយខែ»។
យ៉ាងនេះក្ដី ប្រធានផ្នែកអង្កេតសមាគមអាដហុក លោក នី ចរិយា ហៅចំណាត់ការរបស់មន្ត្រីអយ្យការថា បម្រើផលប្រយោជន៍សម្រាប់អ្នកមានអំណាចនិងឈ្មួញ។ លោកបន្តថា មេធាវីការពារក្តីសកម្មជននឹងដាក់ពាក្យប្ដឹងទាស់ការសម្រេចមិនចាត់ការនេះ៖ «យើងថាវាគ្មានយុត្តិធម៌សម្រាប់យើង។ យើងដឹងហើយថា តុលាការនេះមិនអាចរកយុត្តិធម៌ឲ្យជនរងគ្រោះបានទេ យើងមិនសង្ឃឹមទេ តាំងពីដើមទីមក ប៉ុន្តែយើងត្រូវតែអនុវត្តនៃជម្រើសតាមផ្លូវតុលាការ»។
សមាគមអាដហុក បានចេញសេចក្ដីថ្លែងការណ៍ថ្កោលទោសយ៉ាងដាច់អហង្កាចំពោះការប៉ុនប៉ងធ្វើឃាតសកម្មជនសិទ្ធិមនុស្ស គឺលោក សុក រដ្ឋា និងសហការីពីររូប គឺលោក ប៊ុន ចន្ថា ឡេ កៅ រួមទាំងប្រជាសហគមន៍ ៩នាក់ផ្សេងទៀត។ សមាគមនេះចាត់ទុកថា នេះគឺជាសកម្មភាពធ្វើទុក្ខបុកម្នេញសកម្មជនការពារសិទ្ធិមនុស្ស និងបានអំពាវនាវសុំឲ្យសមត្ថកិច្ចពាក់ព័ន្ធចាត់វិធានការផ្លូវច្បាប់ និងដាក់ទោសទណ្ឌជនដៃដល់ក្នុងបញ្ហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។