រដ្ឋសភាធ្វើសិក្ខាសាលា"ការរៀបចំសេចក្ដីព្រាងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៦"
2015.05.19
កំណើនសេដ្ឋកិច្ចរបស់ប្រទេសកម្ពុជា ត្រូវបានគេចាត់ទុកថា មានលំនឹងនៅក្នុងឆ្នាំ២០១៤ គឺ ៧%។ ក្នុងទិសដៅរក្សាអត្រាកំណើននេះ រដ្ឋសភាកំពុងស្វែងយល់បន្ថែមទៀតពីការកសាងក្របខ័ណ្ឌគោលនយោបាយ សម្រាប់ការរៀបចំសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៦។
អគ្គលេខាធិការដ្ឋានរដ្ឋសភា សហការជាមួយអង្គការមិនមែនរដ្ឋាភិបាល អង្គការអុកស្វាម (Oxfam) និងធនាគារអភិវឌ្ឍន៍អាស៊ី អេ.ឌី.ប៊ី (ADB) រៀបចំសិក្ខាសាលាមួយ នៅថ្ងៃទី១៩ ឧសភា ដើម្បីស្វែងយល់ពីការកសាងក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៦។
ប្រធានរដ្ឋសភា លោក ហេង សំរិន ថ្លែងបើកសិក្ខាសាលាថា គោលបំណងនៃសិក្ខាសាលានេះ គឺដើម្បីឱ្យភាគីពាក់ព័ន្ធទាំងអស់មានសមាជិករដ្ឋសភា ព្រឹទ្ធសភា បានស្វែងយល់កាន់តែច្បាស់បន្ថែមទៀត អំពីកម្មវិធីគោលនយោបាយយុទ្ធសាស្ត្រថវិកា និងការងារបច្ចេកទេសនៃការកសាងថវិកាជាតិ៖ «ដូច្នេះការរៀបចំសិក្ខាសាលានេះ ពិតជាមានសារសំខាន់ និងសមស្របបំផុតសម្រាប់យើងទាំងអស់គ្នា ជាពិសេសសមាជិកព្រឹទ្ធសភា រដ្ឋសភា ដែលជាអ្នកតំណាងឱ្យប្រជាពលរដ្ឋនៅតាមមណ្ឌល ក៏ដូចប្រជាពលរដ្ឋទូទាំងប្រទេស ដែលមានតួនាទីដ៏សំខាន់ក្នុងការធ្វើឱ្យប្រាកដថា សេចក្ដីព្រាងច្បាប់ថវិកាឆ្នាំ ២០១៦ មានលក្ខណៈសុក្រឹត គ្រប់ជ្រុងជ្រោយ និងឆ្លើយតបទៅនឹងតម្រូវការជាក់ស្ដែងរបស់ពលរដ្ឋម្ចាស់ឆ្នោត»។
ទន្ទឹមគ្នានេះ អង្គការសង្គមស៊ីវិល និងគណបក្សប្រឆាំងរិះគន់ថា ការអនុវត្តជាក់ស្ដែងចំពោះការចូលរួមរបស់ពលរដ្ឋនៅក្នុងការរៀបចំថវិកា និងខ្វះតម្លាភាព ហើយទាមទារឱ្យកែលម្អបញ្ហានេះចាប់តាំងពីថ្នាក់មូលដ្ឋាន។
តំណាងក្រុមការងារថវិកានៃអង្គការមិនមែនរដ្ឋាភិបាល អ្នកស្រី គឹម ណាតាសា ថ្លែងថា ច្បាប់នៅមានកម្រិតដែលមិនបានចែងអំពីកាតព្វកិច្ច និងការចូលរួមរៀបចំថវិកា ទាំងនៅថ្នាក់ជាតិ និងថ្នាក់មូលដ្ឋាន៖ «យើងមើលឃើញថា បញ្ញត្តិច្បាប់ទាក់ទងតម្លាភាពនៅមានកម្រិតដោយសារមានកង្វះខាតនូវចំណុចជាក់លាក់ ដើម្បីធានាថា មានការអនុវត្តដោយមានប្រសិទ្ធភាព។ យើងឃើញថា ព័ត៌មានថវិកាមួយចំនួនអត់ទាន់បានផ្សព្វផ្សាយឱ្យទូលំទូលាយ មានឯកសារថវិកាមួយចំនួនមិនសូវបានចូលលម្អិត ហើយមួយទៀតរបាយការណ៍ស្ដីពីការអនុវត្តថវិកាមិនសូវទៀងទាត់ ឬទាន់ពេលវេលា»។
មន្រ្តីនាំពាក្យរដ្ឋសភា លោក ឈាង វុន និងជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន ឆ្លើយតបថា រដ្ឋាភិបាលមាននីតិវិធីធ្វើការច្បាស់លាស់ ហើយបានធ្វើកិច្ចការទាំងនេះ៖ «ជួបប្រជាពលរដ្ឋតាមមូលដ្ឋានថ្នាក់ក្រោមជាតិ យើងបីខែយើងទៅជួបម្ដងអ្នកតំណាងរាស្ត្រ។ ប្រជាពលរដ្ឋត្រូវការអី ជួបអ្នកតំណាងរបស់ខ្លួន ជួបនិយាយគ្នា ហើយនាំពាក្យហ្នឹងមកចូលរួមរដ្ឋសភា។ ថវិកាហ្នឹងក៏អ៊ីចឹងដែរ ពេលធ្វើថវិកា អ្នកតំណាងរាស្ត្រទាំងអស់ចុះទៅមណ្ឌលរបស់ខ្លួនជួបប្រជាពលរដ្ឋ ហើយសួរឃុំសង្កាត់ទាំងអស់ថា តើត្រូវធ្វើអីខ្លះ។ អ៊ីចឹងហើយយើងត្រូវធ្វើកិច្ចការហ្នឹង»។
រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បង្ហាញថា កំណើនសេដ្ឋកិច្ច ប្រទេសកម្ពុជារក្សាបានកំណើនសេដ្ឋកិច្ចក្នុងរង្វង់ ៧% ក្នុងមួយឆ្នាំៗ។ រាជរដ្ឋាភិបាលកម្ពុជាកំពុងរំពឹងថានឹងសម្រេចបានកំណើនសេដ្ឋកិច្ចក្នុងរង្វង់ ៧%ទៀត នៅឆ្នាំ ២០១៥នេះ និងឆ្នាំ ២០១៦។ ទោះជាយ៉ាងនេះក្ដី តំណាងរាស្ត្រក្នុងសិក្ខាសាលា នៅតែព្រួយបារម្ភអំពីផលប៉ះពាល់នៃសេដ្ឋកិច្ចខ្នាតតូចរបស់ពលរដ្ឋ ដោយសារតែបំណុល និងការប្រាក់ថ្លៃដដែល។ ប្រធានគណៈកម្មការទី ២ រដ្ឋសភា លោក ជាម យៀប ថ្លែងថា ទន្ទឹមនឹងលទ្ធផលសម្រេចបានកន្លងមក រាជរដ្ឋាភិបាលក៏ទាមទារឱ្យកែលម្អ ពង្រឹងសមត្ថភាព និងការគ្រប់គ្រងស្ថាប័នឱ្យកាន់តែមានប្រសិទ្ធភាពថែមទៀត ព្រមទាំងកែទម្រង់ស៊ីជម្រៅលើការគ្រប់គ្រងហិរញ្ញវត្ថុសាធារណៈ៕