មន្ត្រីសង្គមស៊ីវិលស្នើឲ្យអាជ្ញាធរមានសមត្ថកិច្ច បន្ថែមចំណាត់ការ ឬដកហូតលិខិតឆ្លងដែនរបស់លោក ផែង វណ្ណៈ ទុកជាបណ្ដោះអាសន្នសិន ស្របពេលគណៈកម្មការជំនាញកំពុងស្រាវជ្រាវលើរូបលោក។ ទាក់ទងសំណើនេះ មន្ត្រីជាន់ខ្ពស់នៃក្រសួងមហាផ្ទៃ យល់ថា សំណើនេះជាយោបល់ល្អ។
សំណើរបស់សង្គមស៊ីវិលបែបនេះ ចង់ឲ្យសមត្ថកិច្ចអនុវត្តការងារដើម្បីកុំឲ្យមានស្តង់ដារពីរផ្សេងគ្នារវាងមន្ត្រីគណបក្សប្រឆាំង និងមន្ត្រីបម្រើការងារនៅក្នុងស្ថាប័នរដ្ឋ និងក្នុងពេលក្រសួងមហាផ្ទៃ បានបញ្ឈរជើងលោក ផែង វណ្ណៈ។ ម្យ៉ាងវិញទៀត សង្គមស៊ីវិលមិនចង់មានករណីដូចអតីតអភិបាលក្រុងបាវិត លោក ឈូក បណ្ឌិត នៅពេលតុលាការរកឃើញថា មានទោស ប៉ុន្តែបែរជាលោក ឈូក បណ្ឌិត រត់គេចចេញទៅក្រៅស្រុកបាត់។
អ្នកសម្របសម្រួលបណ្ដាញរួបរួមដើម្បីគណនេយ្យភាពសង្គមនៅអាស៊ីបូព៌ា និងប៉ាស៊ីហ្វិក ប្រចាំកម្ពុជា លោក សន ជ័យ និយាយថា អាជ្ញាធរគួរពិចារណាការអនុវត្តការងាររបស់ខ្លួនលើករណីលោក ផែង វណ្ណៈ ឲ្យដូចករណីលោក មាជ សុវណ្ណារ៉ា ខណៈដែលតុលាការរកមិនទាន់ឃើញកំហុស ប៉ុន្តែតុលាការបញ្ជាឲ្យដកលិខិតឆ្លងដែនរបស់លោកទុក។ លោកបន្តថា វិធានការបែបនេះអាចទប់ស្កាត់មិនឲ្យមានការរត់ចេញទៅក្រៅប្រទេស ប្រសិនបើលោក ផែង វណ្ណៈ ប្រព្រឹត្តករណីដូចអ្វីដែលក្រសួងមហាផ្ទៃ កំពុងតែសង្ស័យនោះ៖ «អាជ្ញាធរគួរពិចារណាក្នុងការអនុវត្តឲ្យបានដូចគ្នាទៅ យ៉ាងណាក៏ដោយ ឲ្យតែស្ថិតក្នុងការស៊ើបអង្កេត អ្នកណាក៏ដោយ ត្រូវតែចាត់វិធានការផ្លូវរដ្ឋបាលដូចគ្នា កុំឲ្យរត់ចោលស្រុក»។
លោក ស ខេង រដ្ឋមន្ត្រីក្រសួងមហាផ្ទៃ បានសម្រេចបញ្ឈរជើងលោក ផែង វណ្ណៈ ដែលមានតួនាទីជាអនុប្រធានការិយាល័យនាយកដ្ឋានសន្តិសុខផ្ទៃក្នុង មកនាយកដ្ឋានបុគ្គលិកកាលពីពេលថ្មីៗនេះ។ ការសម្រេចដូចនេះ ព្រោះលោក ផែង វណ្ណៈ មានជាប់ពាក់ព័ន្ធ ៣ករណីដែលត្រូវស៊ើបអង្កេត គឺករណីគំរាមសម្លាប់លោក កឹម សុខា ករណីបរិហារកេរ្តិ៍អ្នកស្រី កែវ ម៉ាលី សមាជិកព្រឹទ្ធសភាពីគណបក្សប្រជាជនកម្ពុជា និងលោក សៀក សុជាតិ នាយរងសេនាធិការចម្រុះ និងនាយកទីចាត់ការព្រំដែននៃកងយោធពលខេមរភូមិន្ទ តាមបណ្ដាញសង្គមហ្វេសប៊ុក (Fecebok) និងករណីមួយទៀត ជារឿងផ្ទាល់ខ្លួនរបស់លោក ផែង វណ្ណៈ។
មន្ត្រីជាន់ខ្ពស់នៃអង្គការសិទ្ធិមនុស្សលីកាដូ (LICADHO) លោក អំ សំអាត យល់ថា ការដកហូតលិខិតឆ្លងដែនលោក ផែង វណ្ណៈ មុនតុលាការចោទប្រកាន់ធ្វើឲ្យប៉ះពាល់សិទ្ធិរបស់លោក ផែង វណ្ណៈ ប៉ុន្តែក្នុងរយៈពេលនៃការស៊ើបអង្កេត តុលាការ ឬស្ថាប័នពាក់ព័ន្ធគួរតែដកហូតទុកមួយរយៈសិន។ លោក អំ សំអាត បន្តទៀតថា ក្នុងករណីលោក ផែង វណ្ណៈ កំពុងជាប់បណ្ដឹងនៅតុលាការដូចនេះ តុលាការអាចស្នើសុំដកហូតលិខិតឆ្លងដែនលោក ផែង វណ្ណៈ បាន៖ «អាជ្ញាធរត្រូវតែចាត់វិធានការមិនអនុញ្ញាតឲ្យចេញទៅក្រៅប្រទេសទេក្នុងពេលស៊ើបអង្កេត»។
លោក ផែង វណ្ណៈ មិនអធិប្បាយបញ្ហានេះទេ ដោយនិយាយថា ទុកឲ្យគណៈកម្មការជំនាញក្រសួងមហាផ្ទៃ ជាអ្នកពន្យល់។ លោក ផែង វណ្ណៈ និងមន្ត្រីនៅក្រសួងព័ត៌មាន លោក ព្រំ សាន កំពុងជាប់បណ្ដឹងនៅសាលាដំបូងរាជធានីភ្នំពេញដែរ គឺករណីបរិហារកេរ្តិ៍អ្នកស្រី កែវ ម៉ាលី សមាជិកព្រឹទ្ធសភាពីគណបក្សប្រជាជនកម្ពុជា និងលោក សៀក សុជាតិ នាយរងសេនាធិការចម្រុះ និងនាយកទីចាត់ការព្រំដែននៃកងយោធពលខេមរភូមិន្ទ តាមហ្វេសប៊ុក។
ដោយឡែកអ្នកនាំពាក្យក្រសួងមហាផ្ទៃ លោក ខៀវ សុភ័គ ថា សំណើរបស់សង្គមស៊ីវិលជាគំនិតល្អគួរយកមកពិចារណា។ ប៉ុន្តែលោកមិនបានដឹងពីដំណើរការនៃការស៊ើបអង្កេតករណីលោក ផែង វណ្ណៈ នោះទេ ដោយថា រឿងនេះកំពុងស្ថិតក្នុងដៃគណៈកម្មការជំនាញរបស់ក្រសួងមហាផ្ទៃ៖ «រឿងនេះអាស្រ័យលើគណៈកម្មការស៊ើបអង្កេត ប៉ុន្តែយោបល់នេះ គួរយកទៅពិចារណាដែរ»។
វិទ្យុអាស៊ីសេរី មិនអាចសុំការបំភ្លឺពីលោក ឆៃ ស៊ីណារិទ្ធិ ប្រធាននាយកដ្ឋានកណ្ដាលសន្តិសុខក្រសួងមហាផ្ទៃ និងជាសមាជិកគណៈកម្មការជំនាញរបស់ក្រសួងមហាផ្ទៃ ដែលកំពុងស្រាវជ្រាវករណីលោក ផែង វណ្ណៈ បានទេ នៅថ្ងៃទី២៤ ខែតុលា។ អ្នកនាំពាក្យក្រសួងមហាផ្ទៃ លោក ខៀវ សុភ័គ ថា ក្នុងពេលដែលតុលាការរកមិនទាន់ឃើញថា លោក ផែង វណ្ណៈ មានកំហុស ច្បាប់មិនអនុញ្ញាតឲ្យមានការដកហូតអត្តសញ្ញាណប័ណ្ណ ឬលិខិតឆ្លងដែននោះទេ ព្រោះខុសទៅនឹងរដ្ឋធម្មនុញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។