ច្បាប់នេះបង្កើតឡើងទំនងជាការដាក់សម្ពាធទៅលើក្រុមគណបក្សប្រឆាំង ដែលតែងតែរិះគន់ឥតសំចៃមាត់ចំពោះមន្ត្រីជាន់ខ្ពស់គណបក្សប្រជាជន ដោយភ្ជាប់ទៅនឹងរបបខ្មែរក្រហម។
ច្បាប់ថ្មីដែលមាន ៥មាត្រា ប្រឆាំងការមិនទទួលស្គាល់ការសម្លាប់មនុស្ស និងការធ្វើទារុណកម្មធ្ងន់ធ្ងរក្នុងរបបខ្មែរក្រហម ដែលស្នើដោយលោកនាយករដ្ឋមន្ត្រី ត្រូវបានសភាអនុម័តជាផ្លូវការហើយ ដែលមានសំឡេងគាំទ្រ ៨៦ លើ ៨៦ ដោយពុំមានឧបសគ្គអ្វីឡើយ និងពុំមានសមាជិកណាម្នាក់របស់គណបក្សប្រឆាំង ត្រូវបានគេអនុញ្ញាតឲ្យចូលរួមដើម្បីពិគ្រោះយោបល់ទេ។
ច្បាប់ស្ដីពីការប្រឆាំងមិនទទួលស្គាល់ឧក្រិដ្ឋកម្ម ដែលប្រព្រឹត្តឡើងក្នុងរយៈពេលនៃរបបកម្ពុជាប្រជាធិបតេយ្យ មានត្រា២ ចែងថា រាល់ការមិនទទួលស្គាល់ ឬការសម្រាល ឬការបដិសេធ ឬការជំទាស់អត្ថិភាពនៃឧក្រិដ្ឋកម្ម ឬការលើកតម្កើងឧក្រិដ្ឋកម្មដែលប្រព្រឹត្តឡើងក្នុងរយៈពេលនៃរបបកម្ពុជាប្រជាធិបតេយ្យ ត្រូវផ្ដន្ទាទោសជននោះដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ចាប់ពី ១លានរៀល ទៅ ៤លានរៀល។ បទមិនទទួលស្គាល់ជាសាធារណៈនូវឧក្រិដ្ឋកម្មដែលប្រព្រឹត្តឡើងក្នុងរយៈពេលនៃរបបកម្ពុជាប្រជាធិបតេយ្យ ទោះតាមមធ្យោបាយណាមួយក៏ដោយ ដូចជាតាមរូបភាពសម្ដី តាមលិខិត ឬគំនូរ និងតាមគ្រប់មធ្យោបាយទូរគមនាគមន៍ សោតទស្សន៍សម្រាប់សាធារណជន។
លោក ជាម យៀប អ្នកស្នើច្បាប់ក្នុងចំណោមសមាជិកសភា ៦រូបផ្សេងទៀតមកពីគណបក្សប្រជាជនកម្ពុជា ព្រមានថា ប្រសិនបើលោក កឹម សុខា អនុប្រធានគណបក្សសង្គ្រោះជាតិ ឬបុគ្គលណាមួយដែលហានរិះគន់ ក្រោយពីច្បាប់នេះចូលជាធរមានក្នុងរឿងថាមិនមានរបបកម្ពុជាប្រជាធិបតេយ្យនោះ ពួកគេនឹងត្រូវប្រឈមចំពោះមុខច្បាប់ដោយចៀសមិនផុតឡើយ៖ «ទន្ទឹមនឹងខ្លឹមសារនៃសេចក្ដីស្នើច្បាប់ ក៏មានន័យដើម្បីបញ្ជាក់នូវការពិត អប់រំណែនាំ និងមានវិធានការ ព្រមទាំងដាក់ទោសទណ្ឌចំពោះពលរដ្ឋគ្រប់រូបដែលមិនព្រមទទួលស្គាល់នូវឧក្រិដ្ឋកម្មនៃរបប ប៉ុល ពត»។
កាលពីថ្ងៃទី២៨ ឧសភា គណបក្សសង្គ្រោះជាតិ បានចេញសេចក្ដីថ្លែងការណ៍របស់ខ្លួនគាំទ្រឲ្យមានច្បាប់ប្រឆាំងការមិនទទួលស្គាល់ថាមានរបបប្រល័យពូជសាសន៍ដែរ និងប្រឆាំងមិនឲ្យមានមន្ត្រីសំខាន់ក្នុងរបបខ្មែរក្រហម មកកាន់តំណែងជាមន្ត្រីជាន់ខ្ពស់ក្នុងជួររដ្ឋាភិបាល។ ការបញ្ជាក់នូវជំហរនេះ ធ្វើឡើងមួយថ្ងៃប៉ុណ្ណោះ ក្រោយពេលលោក ហ៊ុន សែន ទាមទារឲ្យសមាជិកសភាដែលភាគច្រើនមកពីគណបក្សរបស់លោក តាក់តែងច្បាប់នេះឡើងភ្លាមៗ កាលពីថ្ងៃទី២៧ ឧសភា។
កាលពីថ្ងៃព្រហស្បតិ៍ ម្សិលមិញ ក្រុមអ្នកតំណាងរាស្ត្រគណបក្ស សម រង្ស៊ី និងគណបក្ស សិទ្ធិមនុស្ស បានចេញសេចក្ដីថ្លែងការណ៍មួយ ដោយចាត់ទុកថា សភាបច្ចុប្បន្នអធម្មនុញ្ញភាព ព្រោះគណៈកម្មាធិការអចិន្ត្រៃយ៍នៃរដ្ឋសភា កាលពីថ្ងៃពុធ សម្រេចមិនឲ្យតំណាងរាស្ត្រគណបក្សទាំងពីរ ចំនួន ២៨រូប បានចូលរួមពិភាក្សាអំពីការតាក់តែងច្បាប់ប្រឆាំងការមិនទទួលស្គាល់ឧក្រិដ្ឋកម្មប្រល័យពូជសាសន៍ និងបានបង្កកប្រាក់ខែពួកគេថែមទៀត ព្រោះតែចូលរួមជាមួយគណបក្សសង្គ្រោះជាតិ។
សម័យប្រជុំវិសាមញ្ញ នីតិកាលទី៤ ដែលប្រើរយៈពេលជិត ៣ម៉ោង នៅព្រឹកថ្ងៃទី៧ មិថុនា ការអនុម័តច្បាប់ថ្មីនេះដែលភាគច្រើនជាសមាជិកសភារបស់គណបក្សប្រជាជនកម្ពុជា និងគណបក្សហ៊្វុនស៊ិនប៉ិច។ កិច្ចប្រជុំនេះបានប្រព្រឹត្តទៅដោយពុំមានការពិភាក្សាដេញដោល ឬពិគ្រោះយោបល់អ្វីឡើយ ក្រៅពីការលើកដៃគាំទ្រសេចក្តីស្នើច្បាប់នេះ៖ «សូមគោរពរាយការណ៍ជូនសម្ដេចប្រធាន វត្តមានសមាជិកសមាជិការដ្ឋសភានៅពេលនេះ មានចំនួន ៨៦រូប។ អង្គសភាអនុម័តទទួលពិចារណាលើខ្លឹមសារទាំងមូលនៃសេចក្ដីស្នើច្បាប់នេះ មានចំនួន ៨៦ លើ ៨៦»។
លោក សុក សំអឿន នាយកអង្គការក្រុមអ្នកច្បាប់ការពារសិទ្ធិកម្ពុជា ពន្យល់ថា ក្នុងករណីសមាជិកសភាមកពីគណបក្សនយោបាយណាមួយ ត្រូវបានគេបញ្ឈប់ ឬដើរចេញពីសភា ព្រោះហេតុផលអ្វីមួយ មិនគ្រប់ចំនួននៃអាសនៈនៅក្នុងសភានោះ បានន័យថា ច្បាប់ដែលអនុម័តនោះនឹងក្លាយជាអធម្មនុញ្ញភាព ឬភាពមិនស្របច្បាប់ ឬថាពុំមានវិសាលភាពក្នុងការគ្របដណ្ដប់ចំពោះការអនុវត្ត និងពុំមានឥទ្ធិពលអ្វីឡើយ។ ប៉ុន្តែ ថាបើសមាជិកនៃគណបក្សនយោបាយណាមួយខកខានមិនបានចូលរួមទៅវិញ គឺការអនុម័តនោះ គេត្រូវធ្វើឡើងអាចតាមរូបមន្ត ៥១ បូក ១ ឬ ២ ភាគ ៣ ជាដើម។ ហើយច្បាប់នោះមិនរាប់ថាមានបញ្ហាអ្វីនោះទេ៖ «បើសិនជាដេញចេញ អាហ្នឹងវាបញ្ហាប៉ះពាល់ដល់កូរ៉ុម ១២០ ជារដ្ឋសភា យល់នៅ។ តែបើសិនពួកហ្នឹង ដូចថាសម្រេចដេញចេញ មានន័យថា តំណាងរាស្ត្រលែងមាន ១២០នាក់ទៀតទេ។ អាហ្នឹងអត់មានបញ្ហាទៀតទេ អានេះស៊ីសងនៅលើកូរ៉ុមវិញអ្ហា»។
ទោះជាបែបណា គេគិតថា សភាហាក់ប្រញាប់ប្រញាល់បំផុតក្នុងការពន្លឿនសេចក្ដីព្រាងច្បាប់នេះឲ្យចេញជារូបរាងឡើង។ ទន្ទឹមនឹងសេចក្ដីស្នើច្បាប់ផ្សេងទៀត ដែលគេគិតថាចាំបាច់នោះ តែត្រូវយឺតយ៉ាវទៅវិញ ដូចជា ច្បាប់លក្ខន្តិកៈនៃចៅក្រម និងវិសោធនកម្មនៃច្បាប់ឧត្ដមក្រុមប្រឹក្សានៃអង្គចៅក្រមជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។