បន្ទាប់ពីបើកសវនាការអសាធារណៈ លើបណ្ដឹងសុំនៅក្រៅឃុំរបស់មេធាវីការពារអ្នកទាំង២រួចមក ចៅក្រមសាលាដំបូងរាជធានីភ្នំពេញ លោក លាង សំណាត់ បានចេញដីកាចំនួន២ផ្សេងគ្នា បង្គាប់អោយដោះលែងអ្នកទាំងពីររូបនោះ មានឈ្មោះ ប៊ូ សារិទិ្ធ អាយុ ២៧ឆ្នាំ និង យ៉ន សុខជា អាយុ ១៧ឆ្នាំ។ ប៉ុន្តែ ក្នុងដីកាពុំបានលើកឡើងថា អ្វីជាមូលហេតុនៃការសម្រេចអោយអ្នកទាំង២ បាននៅក្រៅឃុំឡើយ។
មេធាវីការពារ អ្នកស្រី សាម សុគន្ធា មានប្រសាសន៍ថា ចៅក្រមបានជូនដំណឹងមេធាវីអោយចូលសវនាការនៅសាលាដំបូង នៅខណៈដែលសំណុំរឿងសុំនៅក្រៅឃុំនេះបានបន្តទៅសាលាឧទ្ធរណ៍ទៅហើយនោះ។ អ្នកស្រីបន្តថា ក្រុមមេធាវីក៏មានចម្ងល់នឹងករណីនេះដែរ ប៉ុន្តែបានចាត់ទុកនេះអាចជាឆន្ទានុសិទ្ធិរបស់ចៅក្រម ដែលលោកអាចសម្រេចបើកសវនាការក្នុងករណីចាំបាច់ណាមួយ។
អ្នកស្រីមេធាវីអោយដឹងទៀតថា ពេលនេះក្រុមគ្រួសារជនជាប់ចោទ និងតំណាងអង្គការមិនមែនរដ្ឋាភិបាល បានទៅដល់ពន្ធនាគារក្នុងខេត្តកំពង់ចាម ដើម្បីរត់ការឯកសារអោយមានការដោះលែងអ្នកទាំង២។
លោក អំ សំអាត មានប្រសាសន៍ថា នេះជាសញ្ញាល្អមួយសម្រាប់សកម្មជនសិទ្ធិមនុស្ស និងកម្មករចំនួន ២១នាក់ផ្សេងទៀត ដែលកំពុងជាប់ឃុំនៅពន្ធនាគារត្រពាំងផ្លុង។
អ្នកទាំងពីរ គឺឋិតក្នុងចំណោមក្រុមកម្មករ និងអ្នកការពារសិទ្ធិមនុស្សទាំង ២៣នាក់ ដែលត្រូវបានចាប់ខ្លួនកាលពីដើមខែមករា អំឡុងពេលមានបាតុកម្មរបស់ក្រុមកម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។