ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ លោក សំរិទ្ធិ សុផល សម្រេចតម្កល់សាលក្រមរបស់តុលាការក្រុងភ្នំពេញ ទុកជាបានការដដែល ជុំវិញរឿងក្ដីមេបក្សប្រឆាំង។
លោក សម រង្ស៊ី ត្រូវបានមន្ត្រីជំនិតរបស់លោក ហ៊ុន សែន ប្ដឹងដោយចោទប្រកាន់ថា មេបក្សប្រឆាំងរូបនេះ បានបរិហារកេរ្តិ៍លោកនាយករដ្ឋមន្ត្រី ដោយចោទថា បានទិញទឹកចិត្តអ្នកក្រីក្រឲ្យចុចចូលចិត្ត (Like) ហ្វេសប៊ុក (Facebook) និងទិញ Like ឲ្យមានចំនួនកើតឡើងជាងហ្វេសប៊ុក របស់លោក សម រង្ស៊ី។
ការប្រកាសសាលដីកាដែលធ្វើឡើងកាលពីព្រឹកថ្ងៃទី៩ ខែកុម្ភៈ ត្រូវបានមេធាវីការពារក្ដីឲ្យលោក សម រង្ស៊ី ចាត់ទុកថា ជាសេចក្ដីសម្រេចដែលធ្វើឡើងដ៏តក់ក្រហល់ ជាពិសេសជាងនេះទៀត សាលដីកានេះ ជាការផ្ដល់ភាពអយុត្តិធម៌បន្ថែមទៀតដល់កូនក្ដីរបស់ខ្លួន។
លោក សំ សុគង់ ដែលជាមេធាវីការពារឲ្យមេបក្សប្រឆាំង បង្ហាញការសោកស្ដាយដែលក្រុមប្រឹក្សាជំនុំជម្រះសាលាឧទ្ធរណ៍នៅតែរក្សាបទចោទប្រឆាំងលោក សម រង្ស៊ី ដូចសាលក្រមរបស់តុលាការក្រុងភ្នំពេញ ដែរនោះ។ លោកចាត់ទុកថា ការសម្រេចនេះ គឺបានផ្ដល់ភាពអយុត្តិធម៌ដល់កូនក្ដីរបស់ខ្លួន គឺលោក សម រង្ស៊ី។ យ៉ាងណាក៏ដោយ មេធាវីរូបនេះបញ្ជាក់ជំហរថា នឹងប្ដឹងបន្តទៀតប្រឆាំងសាលដីកានេះទៅតុលាការកំពូល៖ «ដោយសារយើងឃើញសាលដីកានេះជាសាលដីកាកំបាំងមុខ កាត់ទោសចំពោះមុខ ហើយយើងនឹងរៀបចំពេលវេលាមួយសមស្របទៅតាមការកំណត់របស់ច្បាប់។ ដោយសារច្បាប់គេទុកកំណត់រយៈពេល ១ខែ ចាប់ពីថ្ងៃទទួលដំណឹងអំពីសាលដីកា អ៊ីចឹងយើងនឹងរៀបចំបណ្ដឹងសាទុក្ខនេះឲ្យទៅតាមកំណត់របស់ច្បាប់»។
លោក សំរិទ្ធិ សុផល ដែលជាប្រធានក្រុមប្រឹក្សាជំនុំជម្រះនៃសភាស៊ើបសួរសាលាឧទ្ធរណ៍ បានប្រកាសសាលដីកាដ៏ឆាប់រហ័ស និងប្រើពេលយ៉ាងខ្លី។ ក្នុងពេលប្រកាសសាលដីកាដែលមានវត្តមានតែដើមបណ្ដឹងរដ្ឋប្បវេណី គឺលោក សោម សឿន ដែលជាមន្ត្រីស្និទ្ធរបស់លោក ហ៊ុន សែន នោះ ដោយឡែកលោក សំ សុគង់ ដែលជាមេធាវីលោក សម រង្ស៊ី វិញគឺមកចូលរួមស្ដាប់ការប្រកាសសាលដីកាមិនទាន់ពេលឡើយ។
បើទោះជាបែបណា លោក សោម សឿន តំណាងដើមបណ្ដឹងពីខាងបក្សប្រជាជនកម្ពុជា មានសុទិដ្ឋិនិយមថា សេចក្ដីសម្រេចរបស់ចៅក្រមនៅពេលនេះ ធ្វើឲ្យលោក និងលោក ហ៊ុន សែន ពេញចិត្តពេញថ្លើម។ លោកបន្តថា តុលាការពិតជាបានផ្ដល់ភាពត្រឹមត្រូវ និងជួយរកយុត្តិធម៌ដល់រូបលោកជាជនរងគ្រោះមែន៖ «ខ្ញុំពេញចិត្តណាស់ដែលសាលាដំបូងរាជធានីភ្នំពេញ ក៏ដូចជាសាលាឧទ្ធរណ៍នៅថ្ងៃនេះបានប្រកាសសាលក្រមផ្ដន្ទាទោសលោក សម រង្ស៊ី អំពីបរិហារកេរ្តិ៍ជាសាធារណៈដែលប្រើប្រាស់ឈ្មោះរបស់ខ្ញុំក្នុងនាមជាប្រធានក្រុមការងារគេហទំព័រហ្វេសប៊ុក របស់គណបក្សប្រជាជនកម្ពុជា»។
ជុំវិញភាពចម្រូងចម្រាសនេះ កាលពីខែវិច្ឆិកា ឆ្នាំ២០១៦ តុលាការក្រុងភ្នំពេញ បានផ្ដន្ទាទោសលោក សម រង្ស៊ី ដោយពិន័យលុយចំនួន ១០លានរៀល និងបង់សងជំងឺចិត្តទៅដើមបណ្ដឹងចំនួន ១៥លានរៀល តាមមាត្រា ៣០៥ និង មាត្រា ៥១០ នៃក្រមព្រហ្មទណ្ឌ។
អង្គហេតុនៃរឿងក្ដីនេះ កាលពីខែមីនា ឆ្នាំ២០១៦ លោក សម រង្ស៊ី រងការចោទថា បានបង្ហោះនៅលើហ្វេសប៊ុក របស់លោកដោយចោទប្រកាន់លោកនាយករដ្ឋមន្ត្រី និងលោក សោម សឿន ជាមន្ត្រីស្និទ្ធនឹងលោក ហ៊ុន សែន ថាបានព្យាយាមទិញទឹកចិត្តអ្នកក្រីក្រអោយចុច Like និងទិញ Like ឲ្យមានចំនួនកើតឡើងជាងហ្វេសប៊ុក របស់លោក សម រង្ស៊ី។
គិតមកដល់ពេលនេះ លោក សម រង្ស៊ី ដែលត្រូវបានរដ្ឋាភិបាលបិទផ្លូវមិនឲ្យវិលចូលប្រទេសវិញ ត្រូវហ៊ុមព័ទ្ធទៅដោយសំណុំរឿងតាមផ្លូវតុលាការប្រហែល ៨រឿងក្តីទៅហើយ។
ជុំវិញការប្រកួតប្រជែងគ្នាដណ្ដើមប្រជាប្រិយភាពតាមការចុច Like ហ្វេសប៊ុកនេះ លោក សោម សឿន តំណាងឲ្យដើមចោទបានចំអកឲ្យមេបក្សប្រឆាំងថា ពីពេលនេះទៅ លោក សម រង្ស៊ី បានរបូតកៅអីដែលគេតែងហៅថា ជានាយករដ្ឋមន្ត្រីហ្វេសប៊ុក បើធៀបទៅនឹងចំនួន Like របស់លោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។