អ្នកច្បាប់ថា សេចក្ដីថ្លែងការណ៍របស់ព្រះរាជអាជ្ញាបង្ហាញពីដំណើរការក្ដីរឿងសំឡេង លោក កឹម សុខា និងកញ្ញា ខុម ចាន់តារាទី ហៅ ស្រីមុំ ថា ខុសវិជ្ជាជីវៈ ដែលមិនត្រឹមត្រូវតាមបច្ចេកទេសរបស់តុលាការ។ ចំណែកអ្នកនាំពាក្យសាលាដំបូងរាជធានីភ្នំពេញ សុំមិនធ្វើអត្ថាធិប្បាយលើសពីសេចក្តីថ្លែងការណ៍នេះទេ។
លោកមេធាវី ជូង ជូងី លើកឡើងថា សេចក្ដីថ្លែងការណ៍របស់សាលាដំបូងរាជធានីភ្នំពេញ ដែលបង្ហាញជាសាធារណៈនូវចម្លើយរបស់កញ្ញា ខុម ចាន់តារាទី ប៉ះពាល់កិត្តិយសកញ្ញា ខុម ចាន់តារាទី និងធ្វើឲ្យប៉ះពាល់ដំណើរការក្ដីនេះទៀតផង។ លោកថា នៅពេលដំណើរការក្តីត្រូវផ្សព្វផ្សាយដូចនេះ យុត្តិធម៌សង្គមមិនអាចរកភាពត្រឹមត្រូវនៃសំណុំរឿងនេះ៖ «ជាគោលការណ៍ច្បាប់ គ្រប់ភាគីដែលចូលទៅដល់រឿងក្ដីត្រូវរក្សាការសម្ងាត់នៃរឿងក្ដី មេធាវីក្ដី ព្រះរាជអាជ្ញាក្ដី ចៅក្រមក្ដី ដែលចូលដល់រឿងក្តីនេះ ត្រូវរក្សាការសម្ងាត់នៃក្តីនោះ មិនមែនស៊ើបអង្កេតមួយតង់ឃើញយកមកផ្សាយជាសាធារណៈ ឃើញមួយតង់យកមកផ្សាយសាធារណៈអ៊ីចឹងទេ គឺបំពានវិជ្ជាជីវៈហើយ»។
លោកមេធាវី ជូង ជូងី មានប្រសាសន៍ថា ការដែលព្រះរាជអាជ្ញាសម្រេចធ្វើសេចក្ដីថ្លែងការណ៍ដែលខុសវិជ្ជាជីវៈ ព្រោះសំណុំរឿងនេះរងឥទ្ធិពលរបស់អ្នកនយោបាយ។
មេធាវីមួយរូបទៀត លោក នូ ទេពីរិទ្ធ យល់ឃើញថា អ្នកមានវិជ្ជាជីវៈនៃការសម្ងាត់របស់ខ្លួនដែលកំពុងចាត់ការ ដែលក្រុមទាំងនោះរួមមាន មេធាវី ព្រះរាជអាជ្ញា និងចៅក្រម៖ «បើយើងនិយាយជាវិជ្ជាជីវៈ ជាមេធាវីវិញមិនអាចនិយាយបានទេ សូម្បីតែឯកសារថតចម្លង ក៏មិនអាចឲ្យភាគីទី៣ ដឹងបានដែរ។ បើរឿងហ្នឹងលេចធ្លាយដោយសារមេធាវីណាមួយដែលប៉ះពាល់ដល់ប្រយោជន៍ នីតិវិធី អាចមានទោសផង»។
សាលាដំបូងរាជធានីភ្នំពេញ កាលពីរាត្រីថ្ងៃទី១៩ ខែមេសា បានចេញសេចក្ដីថ្លែងការណ៍មួយដោយបញ្ជាក់ថា កញ្ញា ខុម ចាន់តារាទី ហៅស្រីមុំ បានសារភាពថា ខ្លួនធ្លាប់មានទំនាក់ទំនងជាមួយលោក កឹម សុខា ហើយទទួលស្គាល់ថា សំឡេងក្នុងខ្សែអាត់ជាសំឡេងរបស់ខ្លួន និងអះអាងថា ការបដិសេធកន្លងមកដោយសារមានការណែនាំពីលោក កឹម សុខា។
សេចក្ដីថ្លែងការណ៍ដដែលបង្ហាញការទំនាក់ទំនងរវាងលោក កឹម សុខា និងកញ្ញា ខុម ចាន់តាទី មានការរៀបចំពីបុគ្គលមួយចំនួន ហើយព្រះរាជអាជ្ញាកំពុងស្រាវជ្រាវដើម្បីអនុវត្តតាមនីតិវិធី។
អ្នកនាំពាក្យសាលាដំបូងរាជធានីភ្នំពេញ លី សុផាន់ណា ថ្លែងយ៉ាងខ្លីថា លោកមិនអាចធ្វើអត្ថាធិប្បាយណាមួយលើសពីសេចក្ដីថ្លែងការណ៍នេះបានទេ៖ «ខ្ញុំបញ្ជាក់ជូនថា អ្វីៗយើងបានធ្វើនៅក្នុងសេចក្ដីថ្លែងការណ៍នោះហើយ»។
គណបក្សសង្គ្រោះជាតិ បដិសេធឆ្លើយតបទាក់ទងរឿងនេះ។ វិទ្យុអាស៊ីសេរី មិនអាចសុំការបំភ្លឺពីកញ្ញា ខុម ចាន់តារាទី បានទេ នៅថ្ងៃទី២០ ខែមេសា។ មួយរយៈពេលចុងក្រោយនេះ នៅពេលមានសំណុំរឿងណាមានការចាប់អារម្មណ៍ពីសាធារណជន គេឃើញសាលាដំបូងរាជធានីភ្នំពេញ បានចេញសេចក្ដីថ្លែងការណ៍ពន្យល់ពីដំណើរការនីតិវិធីរបស់ខ្លួនឲ្យសាធារណជនបានដឹង។
អ្នកតាមដានស្ថានការណ៍នយោបាយនៅកម្ពុជា លោក កែម ឡី យល់ថា ទោះរឿងនេះពិត ឬមិនពិតក្តី ប៉ុន្តែរដ្ឋាភិបាលត្រូវដាក់ឧបករណ៍ថងសំឡេងពលរដ្ឋគ្រប់គ្នា និងចាត់ការតាមផ្លូវច្បាប់គ្រប់រឿងទាក់ទងរឿងនេះ។ លោកថា អ្វីដែលកើតឡើងពេលនេះ ព្រោះបក្សកាន់អំណាចចង់ផ្ដួលបក្សប្រឆាំងមុនការបោះឆ្នោត៖ «រឿងរបៀបអ៊ីចឹងៗ ទោះពិតក៏ដោយ មិនពិតក៏ដោយ ជាក្រមសីលធម៌របស់បុគ្គល អ្នកណាប្រព្រឹត្តអ្នកនោះអាប់កិត្តិយសអីអ៊ីចឹងទៅ។ ប៉ុន្តែបើយើងចាត់វិធានការ ត្រូវរៀបចំថតសំឡេងគ្រប់មនុស្ស ហើយអ្នកណាមានកំហុសត្រូវធ្វើអ៊ីចឹងដូចៗគ្នា»។
សាលាដំបូងរាជធានីភ្នំពេញ បានចេញដីកាកោះហៅកញ្ញា ខុម ចាន់តារាទី ទៅឆ្លើយបំភ្លឺបន្ថែមនៅថ្ងៃទី២៧ ខែមេសា និងកញ្ញា ធី សុវណ្ណថា នៅថ្ងៃទី២៩ ខែមេសា ទាក់ទងការដាក់ពាក្យប្ដឹងរបស់កញ្ញា ធី សុវណ្ណថា អំពីអំពើបរិហារតាមរយៈខ្សែអាត់សំឡេងផ្សព្វផ្សាយក្នុងប្រព័ន្ធផ្សព្វផ្សាយ និងបណ្ដាញសង្គម។
លោក កែម ឡី យល់ថា លោក កឹម សុខា អាចប្រឈមនឹងការចាប់ខ្លួន ខណៈលោកកំពុងមានអភ័យឯកសិទ្ធិ ឬមិនចាប់ខ្លួន គឺអាស្រ័យទៅលើលោកនាយករដ្ឋមន្ត្រី ហ៊ុន សែន។ ភ្លាមៗនេះដែរ សារព័ត៌មានក្នុងស្រុកបានចុះផ្សាយថា លោក កឹម សុខា បានចាកចេញពីប្រទេសកម្ពុជា។ ប៉ុន្តែមន្ត្រីជាន់ខ្ពស់គណបក្សសង្គ្រោះជាតិ លោក សុន ឆ័យ លោក យឹម សុវណ្ណ និងលោក អេង ឆៃអ៊ាង ថា ពួកលោកមិនបានដឹងថា លោក កឹម សុខា នៅក្នុងស្រុក ឬចេញក្រៅស្រុកនោះទេ។
មន្ត្រីសិទ្ធិមនុស្សថា តុលាការកម្ពុជាកំពុងធ្វើឲ្យប៉ះពាល់ដល់សង្គម
មន្ត្រីសិទ្ធិមនុស្ស និងអ្នកច្បាប់មើលឃើញថា តុលាការកម្ពុជា កំពុងជជីករឿងបុគ្គលឯកជនជាងរឿងអំពើនិទណ្ឌភាពដែលកំពុងធ្វើឲ្យប៉ះពាល់ដល់សង្គម។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព មានប្រសាសន៍ក្នុងវេទិកាអ្នកស្តាប់វិទ្យុអាស៊ីសេរី កាលពីយប់ថ្ងៃទី២០ មេសា ថា តុលាការព្យាយាមចាត់វិធានការលើរឿងបុគ្គលឯកជន ដូចជារឿងកញ្ញា ខុម ចាន់តាទី ហៅស្រីមុំ ជាដើម ចំណែករឿងនិទណ្ឌភាពជាច្រើនដែលកើតមានកន្លងមក តុលាការមិនបានចាត់វិធានការទេ ឬក៏ធ្វើការយឺតជាទីបំផុត។ អ្នកស្រីបន្តថា សិទ្ធិបុគ្គលរបស់កញ្ញា ខុម ចាន់តាទី ត្រូវបានគេរំលោភបំពានយ៉ាងធ្ងន់ធ្ងរ ហើយនីតិវិធីរបស់តុលាការជុំវិញរឿងនេះ គឺអាចមានជាប់ពាក់ព័ន្ធនឹងរឿងនយោបាយ។
មន្រ្តីសិទ្ធិមនុស្សរូបនេះ ចង់ឲ្យអ្នកនយោបាយបញ្ចប់រឿងនេះ និងសុំឲ្យតុលាការធ្វើការដោយឯករាជ្យ ព្រមទាំងស្នើឲ្យសមត្ថកិច្ច ធ្វើការតាមតួនាទីដោយផ្ដល់យុត្តិធម៌ដល់ពលរដ្ឋឲ្យទទួលបានសិទ្ធិស្មើគ្នាចំពោះមុខច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។