អតីតអ្នកបើកបររថយន្តក្រុងឲ្យក្រុមហ៊ុនកាពីតូល (Capitol) និងសមាជិកសមាគមកម្មករ និងសេដ្ឋកិច្ចក្រៅប្រព័ន្ធកម្ពុជា ត្រូវបានចៅក្រមសាលាដំបូងរាជធានីភ្នំពេញ សម្រេចដោះលែងឲ្យនៅក្រៅឃុំបណ្ដោះអាសន្នហើយ នៅរសៀលថ្ងៃទី៦ មេសា ក្រោមហេតុផលថាពួកគេមានមុខរបរ និងអាសយដ្ឋានច្បាស់លាស់ និងជាជនស្លូតត្រង់មិនធ្លាប់ប្រព្រឹត្តបទល្មើសពីមុន។
ប្រធានសហភាពការងារកម្ពុជា លោក អាត់ ធន់ ថ្លែងប្រាប់វិទ្យុអាស៊ីសេរី នៅរសៀលថ្ងៃទី៦ មេសា ថា លោក និងមេធាវី បានទទួលដីការបស់ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ ដែលសម្រេចឲ្យដោះលែងអ្នកទាំងពីរនេះឲ្យនៅក្រៅឃុំបណ្ដោះអាសន្ន ដោយដាក់នៅក្រោមការតាមដានរបស់តុលាការ៖ «យើងសាទរចំពោះការដោះលែងនេះ តែតុលាការគួរពិនិត្យឡើងវិញ មុនឃុំខ្លួនអ្នកណាម្នាក់ក្នុងពន្ធនាគារ។ ហើយស្នើឲ្យតុលាការលុបការចោទប្រកាន់តែម្ដង និងដកការចោទប្រកាន់ដល់អ្នកផ្សេងទៀត ដោយចាត់ការជនល្មើសវិញ ស្របតាមច្បាប់ជាធរមាន»។
អតីតអ្នកបើកបររថយន្តក្រុងក្រុមហ៊ុនកាពីតូលលោក នន វណ្ណា និងសមាជិកសមាគមកម្មករ និងសេដ្ឋកិច្ចក្រៅប្រព័ន្ធកម្ពុជា លោក រស់ ស៊ីផៃ ត្រូវបានសមត្ថកិច្ចខណ្ឌ៧មករា ចាប់ខ្លួនកាលពីថ្ងៃទី៦ ខែកុម្ភៈ ក្រោយមានហិង្សាប៉ះទង្គិចជាមួយសមាជិកសមាគមរួមគ្នាដើម្បីអភិវឌ្ឍន៍កម្ពុជា ពេលកំពុងតវ៉ានៅមុខក្រុមហ៊ុនក្រុងកាពីតូល ក្បែរផ្សារអូរឫស្សី។
ពីរថ្ងៃក្រោយមក ពួកគេទាំងពីរ ត្រូវបានបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស ក្រោមបទចោទចំនួន៣ គឺបង្កហិង្សាដោយចេតនា មានស្ថានទម្ងន់ទោស ប្រឆាំងអ្នករាជការ មានស្ថានទម្ងន់ទោស និងបង្កឧបសគ្គរារាំងដល់សណ្ដាប់ធ្នាប់សាធារណៈ។
នៅថ្ងៃដដែលនេះ អនុប្រធានសហព័ន្ធដឹកជញ្ជូននៃសហភាពការងារកម្ពុជា លោក និន កុសល ដែលជាតំណាងអតីតអ្នកបើកបររថយន្តក្រុង ទាំង៤៥នាក់ ដែលថៅកែក្រុមហ៊ុនកាពីតូល បញ្ឈប់ពីការងារនោះ បានជួបអាជ្ញាធរខណ្ឌ៧មករា សុំអនុញ្ញាតបន្តធ្វើកូដកម្មប្រឆាំងនឹងក្រុមហ៊ុននេះ។ លោកបន្តថា អាជ្ញាធរខណ្ឌបានសន្យាជំរុញការដោះស្រាយដល់សាលារាជធានីភ្នំពេញ ជាមួយនឹងថៅកែក្រុមហ៊ុន តែលោកថា បើនៅតែគ្មានដំណោះស្រាយទេ ពួកគេនឹងនៅបន្តការតវ៉ាដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។