អ្នក​ការពារ​សិទ្ធិ​មនុស្ស​បារម្ភ​ពី​ការ​ប្រើ​ប្រព័ន្ធ​តុលាការ​ប្រឆាំង​ពួក​គេ

មន្ត្រី​អង្គការ​ការពារ​សិទ្ធិ​មនុស្ស​មិន​មែន​រដ្ឋាភិបាល បង្ហាញ​ការ​ព្រួយ​បារម្ភ​ពី​ការ​កើន​ឡើង​បណ្ដឹង​តាម​ផ្លូវ​តុលាការ ចំពោះ​អាជ្ញាធរ​របស់​រដ្ឋាភិបាល​ដែល​តែង​ប្រើប្រាស់​ប្រព័ន្ធ​តុលាការ​នេះ​ចោទ​ប្រកាន់​ប្រឆាំង​នឹង​អ្នក​ការពារ​សិទ្ធិ​មនុស្ស ស្រប​តាម​នីតិវិធី​ច្បាប់​ក្នុង​ទំនាស់​ដីធ្លី។
ដោយ ម៉ម មុនីរតន៍
2013-05-01
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ចាន់ សុវ៉េត ៣០៥
សកម្មជន​ការពារ​សិទ្ធិ​មនុស្ស​សមាគម​អាដហុក លោក ចាន់ សុវ៉េត (ឆ្វេង) ដើរ​ចេញ​ពី​សាលាដំបូង​រាជធានី​ភ្នំពេញ នៅ​ថ្ង​ទី​២៤ ធ្នូ ឆ្នាំ​២០១២។
RFA/Uon Chhin

ជាក់ស្តែង មន្ត្រី​សមាគម​ការពារ​សិទ្ធិ​មនុស្ស​អាដហុក (Adhoc ) ម្នាក់ ត្រូវ​រង​បណ្ដឹង​តាម​ផ្លូវ​តុលាការ ព្រោះ​ត្រូវ​គេ​រក​ឃើញ​ថា មាន​កំហុស​ពី​បទ​ញុះញង់​តាម​រយៈ​សារព័ត៌មាន ក្នុង​វិវាទ​ដីធ្លី​នៅ​ខេត្ត​ពោធិ៍សាត់ រវាង​ពលរដ្ឋ និង​ក្រុមហ៊ុន អ៊ឹម.ឌី.អេស (MDS) របស់​លោក​ឧកញ៉ា ទ្រី ភាព។

មន្ត្រី​អង្គការ​សង្គម​ស៊ីវិល ហៅ​ការ​ចោទ​ប្រកាន់​តាម​ផ្លូវ​តុលាការ​ប្រឆាំង​នឹង​ក្រុម​អង្គការ​ក្រៅ​រដ្ឋាភិបាល ដែល​ការពារ​សិទ្ធិ​មនុស្ស គឺ​ជា​ផ្នែក​មួយ​បង្ហាញ​ឲ្យ​ឃើញ​ថា កំពុង​ព្យាយាម​គំរាម​កំហែង និង​ជា​សារ​អវិជ្ជមាន​កាន់​តែ​ធ្ងន់ធ្ងរ​សម្រាប់​សង្គម​ប្រជាធិបតេយ្យ ដែល​ពិបាក​នឹង​ធ្វើ​ឲ្យ​ប្រទេស​រីក​លូតលាស់​បាន។

លោក ចាន់ សុវ៉េត អនុប្រធាន​ការងារ​ដីធ្លី​របស់​សមាគម​ការពារ​សិទ្ធិ​មនុស្ស​អាដហុក មាន​ប្រសាសន៍​នៅ​ថ្ងៃ​ទី១ ឧសភា ថា លោក​មាន​ការ​ព្រួយ​បារម្ភ​ពី​សុវត្ថិភាព​នៅ​ពេល​ដែល​ដឹង​ថា​លោក​ត្រូវ​ជាប់​បណ្ដឹង​មួយ​ថ្មី​ទៀត នៅ​ខេត្ត​ពោធិ៍សាត់។ លោក​បន្ត​ថា ការ​ព្យាយាម​ប្រើប្រាស់​ប្រព័ន្ធ​តុលាការ​ពី​សំណាក់​អាជ្ញាធរ​របស់​រដ្ឋាភិបាល ប្រឆាំង​នឹង​ក្រុម​អង្គការ​សង្គម​ស៊ីវិល ព្រោះ​តែ​ការពារ​ផល​ប្រយោជន៍​របស់​ប្រជាពលរដ្ឋ លោក​គិត​ថា នោះ​គឺ​ជា​ចំណុច​រាំង​ស្ទះ​ដល់​ដំណើរ​ការ​កំណែទម្រង់ ដើម្បី​ជំរុញ​ឲ្យ​ក្លាយ​ទៅ​ជា​ប្រទេស​មួយ​អនុវត្ត​នីតិរដ្ឋ និង​ប្រជាធិបតេយ្យ​ដ៏​ពិត​ប្រាកដ។

លោក ចាន់ សុវ៉េត៖ «មិន​ថា​តែ​ចំពោះ​ខ្ញុំ​ទេ ឲ្យ​តែ​មាន​ការ​ប្ដឹង គឺ​ច្បាស់​ជា​យើង​មាន​ការ​ព្រួយ​បារម្ភ​ហើយ។ ប៉ុន្តែ​ការ​ព្រួយ​បារម្ភ​របស់​យើង​ខ្ញុំ ក្នុង​នាម​សង្គម​ស៊ីវិល ខ្ញុំ​នៅ​តែ​មាន​ការ​ជឿជាក់​ខ្លួន​ឯង​ផ្ទាល់​ថា ខ្ញុំ​ផ្ទាល់​នេះ​មិន​បាន​ប្រព្រឹត្ត​ដូច​អ្វី​ដែល​មាន​ការ​ចោទ​ប្រកាន់​របស់​អាជ្ញាធរ​មូលដ្ឋាន​ឃុំ​ថ្មដា ស្រុក​វាលវែង ខេត្ត​ពោធិ៍សាត់ នោះ​ទេ។ ហើយ​យើង​ខ្ញុំ​ក៏​គិត​ថា វា​ជា​បញ្ហា​មួយ​ដែល​អាច​ជះ​ឥទ្ធិពល​មិន​ល្អ​សម្រាប់​សង្គម​ប្រជាធិបតេយ្យ»

កាល​ពី​ថ្ងៃ​ទី២៥ មេសា សមាគម​ការពារ​សិទ្ធិ​មនុស្ស​អាដហុក បាន​ចេញ​សេចក្ដី​ថ្លែងការណ៍​បង្ហាញ​ក្ដី​បារម្ភ​ចំពោះ​សុវត្ថិភាព​លោក ភួង សុធា អ្នក​សម្រប​សម្រួល​សមាគម​អាដហុក ប្រចាំ​ខេត្ត​ពោធិ៍សាត់។ ការ​ចេញ​សេចក្ដី​ថ្លែងការណ៍​ថ្កោលទោស និង​បង្ហាញ​ការ​ព្រួយ​បារម្ភ​នេះ ធ្វើ​ឡើង​ក្រោយ​ពី​ដឹង​ថា បុគ្គលិក​សមាគម​អាដហុក ប្រចាំ​ខេត្ត​ពោធិ៍សាត់ ត្រូវ​រង​បណ្ដឹង​តាម​ផ្លូវ​តុលាការ​ពី​បទ​ញុះញង់​តាម​រយៈ​សារព័ត៌មាន។

ក៏ប៉ុន្តែ នៅ​ទីបំផុត លោក ចាន់ សុវ៉េត អនុប្រធាន​ការងារ​ដីធ្លី​បញ្ជាក់​ថា អ្នក​ដែល​ជាប់​បណ្ដឹង​ក្នុង​សំណុំ​រឿង​បទ​ញុះញង់​ផ្សាយ​ព័ត៌មាន​មិន​ពិត​នេះ គឺ​ជា​រូប​លោក មិន​មែន​លោក ភួង សុធា នោះ​ទេ។ ទោះ​ជា​បែប​ណា នេះ​ជា​លើក​ទី២ ដែល​លោក ចាន់ សុវ៉េត ត្រូវ​រង​បណ្ដឹង​តាម​ផ្លូវ​តុលាការ។

កាល​ពី​ខែ​កុម្ភៈ លោក​ត្រូវ​បាន​ចៅក្រម​ស៊ើប​សួរ​នៃ​សាលា​ដំបូង​រាជធានី​ភ្នំពេញ លោក ឆែ វីរៈ សម្រេច​លើកលែង​ការ​ចោទ​ប្រកាន់ និង​ដាក់​ឲ្យ​ស្ថិត​ក្រោម​ការ​ឃ្លាំ​មើល​ដោយ​តុលាការ។ កាល​ពី​ខែ​សីហា ឆ្នាំ​២០១២ លោក ចាន់ សុវ៉េត ត្រូវ​បាន​សាលា​ដំបូង​រាជធានី​ភ្នំពេញ ចោទ​ប្រកាន់​ពី​បទ​ជួយ​ជន​ជាប់​ចោទ​ក្នុង​សំណុំ​រឿង​បង្កើត​តំបន់​អបគមន៍​ប្រឆាំង​រដ្ឋាភិបាល​នៅ​ស្រុក​ឆ្លូង ខេត្ត​ក្រចេះ។

វិទ្យុ​អាស៊ីសេរី ពុំ​អាច​ស្នើសុំ​ការ​បញ្ជាក់​លើ​បញ្ហា​ប្ដឹង​នេះ​ពី​មេ​ឃុំ​ថ្មដា ស្រុក​វាលវែង ខេត្ត​ពោធិ៍សាត់ លោក ព្រំ ង៉ុន ដែល​ជា​ដើម​បណ្ដឹង​តំណាង​ឲ្យ​ក្រុមហ៊ុន អ៊ឹម.ឌី.អេស របស់​លោក​ឧកញ៉ា ទ្រី ភាព និង​ព្រះរាជ​អាជ្ញា​លោក តាន់ ស៊ីហាក់តេជៈ បាន​ទេ នៅ​ថ្ងៃ​ទី១ ឧសភា ដោយ​ពុំ​មាន​អ្នក​ទទួល​ទូរស័ព្ទ។

ទោះ​ជា​បែប​ណា មន្ត្រី​សិទ្ធិ​មនុស្ស​ប្រចាំ​ខេត្ត​ពោធិ៍សាត់ អះអាង​ថា តុលាការ​តម្កល់​សំណុំ​រឿង​ក្ដី​នេះ​ទុក​ឥត​ចាត់​ការ​នៅ​ឡើយ។

មូលហេតុ​ដែល​ឈាន​ដល់​ការ​ប្ដឹង​ផ្ដល់​តាម​ផ្លូវ​តុលាការ​នេះ កើត​ឡើង​នៅ​បន្ទាប់​ពី​ដី​ទំនាស់​ប្រហែល ៣០​ហិកតារ ក្នុង​ចំណោម​ដី​ជាង ៤​ពាន់​ហិកតារ នៅ​ស្រុក​វាលវែង ខេត្ត​ពោធិ៍សាត់ មាន​ជម្លោះ​រវាង​ពលរដ្ឋ​ចំនួន ២០​គ្រួសារ ក្នុង​ចំណោម​គ្រួសារ​សរុប ៣០០​គ្រួសារ ជាមួយ​នឹង​ក្រុមហ៊ុន អ៊ឹម.ឌី.អេស របស់​លោក​ឧកញ៉ា ទ្រី ភាព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

NO MORE CPP, NO MORE HUNSEN, NO MORE ENY PROBLEM, NO MORE SUFFER IN CAMBODIA.

May 02, 2013 10:42 AM

Peuv

Cambodia will never be a state with justice. How can you tame a tiger to take care of the sheep? It is just the law of nature these two elements do not blender. How can Hun Sen, a dictator, be a leader of democratic nation? Rights and freedom are part of democracy and are the enemy of the dictator. Dictators do not survive without chaos and lawlessness. Chhouk Bandit is an example of injustice and puppet court of law under Hun Sen. Chhouk Bandit, connected wit Hun Sen, shot and wounded three factor workers and yet he still enjoys his freedom while Mam Sunangdo, who seeks rights and freedom for people, is thrown in jail after Hun Sen issues a statement of sentencing. The court of law is determined by on Hun Sen’s lips.

May 01, 2013 03:34 PM

អ្នក​អាន​អនាមិក

FOE END ENY PROBLEME CPP HAVE TO STEP OFF THEIR POWER.

May 01, 2013 11:28 AM