គ្រួសារក្មេងជំទង់មួយរូបចោទប្រកាន់ទៅចៅក្រមស៊ើបសួរនៃតុលាការខេត្តរតនគិរី ថាមិនបានឃុំខ្លួនជនជាប់ចោទបីនាក់ដែលបានបោកបញ្ឆោតរំលោភផ្លូវភេទបូកទៅលើកូនស្រីរបស់គាត់តែម្នាក់ដែលនាងមានស្មារតីមិនពេញលេញ។ ចំណែកមន្ត្រីតុលាការអះអាងថា តុលាការមានភស្តុតាងបញ្ជាក់ថា បុរសទាំងបីនាក់មិនបានរំលោភទៅលើក្មេងស្រីនោះទេ។
មន្ត្រីឃ្លាំមើលសិទ្ធិមនុស្សនៅថ្ងៃអាទិត្យ ទី៤ ខែឧសភា អំពាវនាវសុំឲ្យក្រសួងយុត្តិធម៌ ស៊ើបអង្កេតទៅលើភាពមិនប្រក្រតីក្នុងរឿងក្ដីនេះដើម្បីផ្តល់យុត្តិធម៌ដល់ក្រុមគ្រួសារក្មេងស្រី។
កាលពីថ្ងៃទី២៥ ខែមេសា កន្លងទៅនេះចៅក្រមស៊ើបសួរតុលាការខេត្តរតនគិរី លោកស្រី ជ័យ មាលា បានសម្រេចឃុំខ្លួនជនជាប់ចោទម្នាក់ក្នុងចំណោមជនជាប់ចោទ ៤នាក់ ដែលអធិការប៉ូលិសក្រុងបានលុង ឃាត់ខ្លួនពីបទរួមគំនិតគ្នាបោកបញ្ឆោតក្មេងស្រីអាយុ ១៧ឆ្នាំ ឲ្យផឹកស្រាស្រវឹង ហើយរួមភេទម្ដងម្នាក់តាមរយៈមេខ្យល់ជាស្ត្រីម្នាក់ ជាអ្នកបបួលក្មេងស្រីនោះឲ្យស្គាល់បុរសទាំងបីនាក់។
មន្ត្រីសម្របសម្រួលសមាគមអាដហុក ខេត្តរតនគិរី លោក ឆាយ ធី បញ្ជាក់ថា រឿងក្តីនេះមន្ត្រីអយ្យការបានចេញដីកាចោទប្រកាន់បុរសបីនាក់ពីបទចាប់រំលោភ និងស្ត្រីមេខ្យល់ ពីបទរួមគំនិតនិងចាប់បង្ខាំងមនុស្ស ក៏ប៉ុន្តែចៅក្រមស៊ើបសួរសម្រេចឃុំខ្លួនតែស្ត្រីមេខ្យល់។ ចំណែកជនជាប់ចោទបីនាក់ទៀតចៅក្រមមិនបានឃុំខ្លួនទេ។
លោកបន្តថា ម្តាយក្មេងស្រីចាត់ទុកថា ករណីនេះជារឿងមិនត្រឹមត្រូវ និងស្នើសុំមកសមាគមជួយអន្តរាគមន៍ទៅស្ថាប័នពាក់ព័ន្ធជួយរកយុត្តិធម៌ក្នុងរឿងក្ដីនេះ៖ «បញ្ហាករណីរំលោភរវាងបុរសហើយនិងនារីទើបពេញវ័យ មានការណាត់ជួបដោយមេខ្យល់ ដែលពេលនោះមានការបង្អកស្រាឲ្យនារីរងគ្រោះហ្នឹងស្រវឹងខ្លាំងរហូតដល់ភ្លេចខ្លួន ហើយបានធ្វើការរួមភេទ»។
ដូចគ្នានេះដែរ ម្តាយក្មេងស្រីមានប្រសាសន៍បញ្ជាក់ថា អ្នកស្រីរន្ធត់ចិត្តណាស់នៅពេលជនជាប់ចោទរំលោភកូនស្រីគាត់បីនាក់មិនត្រូវបានឃុំខ្លូន។ អ្នកស្រីបង្ហាញភាពអស់ជំនឿទៅលើមន្ត្រីតុលាការក្នុងការស្វែងរកយុត្តិធម៌ជូនប្រជាពលរដ្ឋ ជាពិសេសកូនគាត់ជាក្មេងមិនមានស្មារតីពេញលេញ៖ «ខ្ញុំមិនដឹងថាម៉េចទេ ដល់អ៊ីចឹងខ្ញុំដូចអស់ជំនឿលើច្បាប់។ អ្នកខាងយកវាទៅ គឺអាយុជាង ៣០ ហើយអ្នកប្រព្រឹត្តលើវាក៏អាយុជាង ៣០ ហើយក្មេងនិយាយទៅស្មារតីតាំងពីអាយុជាង ១០ឆ្នាំនិយាយស្តីទៅវាភ័យ ភ័ន្តភាំង ខ្ញុំក៏ឲ្យឈប់រៀនទៅ»។
ឆ្លើយតបការចោទប្រកាន់នេះ ចៅក្រមស៊ើបសួរលោកស្រី ជ័យ មាលា អះអាងថា ក្នុងនាមជាចៅក្រមលោកស្រីមានអង្គហេតុគ្រប់គ្រាន់ក្នុងការសម្រេចមិនឃុំខ្លួនជនជាប់ចោទទាំងបី។ លោកស្រីបន្តជនជាប់ចោទត្រូវដាក់ឲ្យនៅក្រោមការត្រួតពិនិត្យតាមផ្លូវតុលាការដើម្បីស៊ើបអង្កេតបន្ត។
ជាមួយគ្នានេះដែរ មេធាវីការពារក្តីឲ្យជនជាប់ចោទទាំងបួននាក់ លោក ម៉ៅ សារី ថ្លែងបញ្ជាក់ថា លោកបានស្នើសុំឲ្យក្មេងស្រី និងជនជាប់ចោទឆ្លើយបំភ្លឺទល់មុខគ្នានៅចំពោះមុខចៅក្រមស៊ើបសួរ។ចម្លើយក្មេងស្រីនិងជនជាប់ចោទបញ្ជាក់មានភាពស៊ីចង្វាក់គ្នាដែលបង្ហាញថា ជនជាប់ចោទមិនបានរំលោភក្មេងស្រីនោះទេ។
លោកបញ្ជាក់ថា ក្មេងស្រីនេះអាយុ ១៨ឆ្នាំ ឋិតក្នុងវ័យទទួលខុសត្រូវនៅចំពោះមុខច្បាប់៖ «ស្តាប់មើលចម្លើយភាគីទាំងអស់ឃើញថា គឺថាមិនមែនកើតចេញពីការរំលោភទេ គឺកើតចេញពីការព្រមព្រៀង ហើយពួកគាត់ដេកនៅផ្ទះសំណាក់។ មនុស្សសម្រេចចិត្តឈានជើងចូលដល់ផ្ទះសំណាក់ បានន័យថា មានកិច្ចព្រមព្រៀងណាមួយហើយ»។
ទាក់ទិនរឿងក្តីនេះដែរ ព្រះរាជអាជ្ញារងអមតុលាការខេត្តរតនគិរី លោក ជា សុភ័ក្រ បញ្ជាក់ដែរថា លោកបានធ្វើពាក្យប្ដឹងទាល់ពីដីកាសម្រេចរបស់ចៅក្រមស៊ើបសួរក្នុងរឿងក្ដីនេះទៅអគ្គព្រះរាជអាជ្ញាសាលាឧទ្ធរណ៍រួចហើយ។ លោកកត់សំគាល់ថា បានចេញដីកាចោទប្រកាន់បុរសបីនាក់ពីបទរំលោភផ្លូវភេទ និងស្ត្រីមេខ្យល់ជាប់ចោទពីបទរួមគំនិត និងបង្ខាំងមនុស្ស បន្ទាប់ពីប៉ូលិសបានបញ្ជូនសំណុំរឿងក្តីនេះមកមន្ត្រីស្ថាប័នអយ្យការ។
ទោះជាយ៉ាងនេះក្តី អធិការប៉ូលិសក្រុងបានលុង លោក ឯម វុន បញ្ជាក់ថា ក្នុងសៀវភៅគ្រួសាររបស់ក្មេងស្រីឲ្យដឹងថា ក្មេងស្រីនៅខ្វះពីរខែបានគ្រប់អាយុ ១៨ឆ្នាំ ដូច្នេះតាមក្រមនីតិវិធីព្រហ្មទណ្ឌចាត់ទុកក្មេងស្រីជាអនីតិជន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។