លោក សម រង្ស៊ី ថា​តុលាការ​បារាំង​សម្រេច​ឲ្យ​លោក​ឈ្នះ​ក្ដី​លោក ហោ ណាំហុង​ជា​ថ្មី​ទៀត

ដោយ​ សុ ជីវី
2016.07.09
សម រង្ស៊ី ៨៥៥ ២០១៦ ប្រធាន​គណបក្ស​សង្គ្រោះ​ជាតិ លោក សម រង្ស៊ី ក្នុង​កម្មវិធី​ទូរទស្សន៍​អាស៊ីសេរី នា​រដ្ឋ​ធានី​វ៉ាស៊ីនតោន សហរដ្ឋអាមេរិក កាល​ពី​យប់​ថ្ងៃ​ទី​៥ កុម្ភៈ ឆ្នាំ​២០១៦។
Photo: RFA

ប្រធាន​គណបក្ស​សង្គ្រោះ​ជាតិ លោក សម រង្ស៊ី អះអាង​ជា​ថ្មី​ទៀត​ថា តុលាការ​ក្នុង​ប្រទេស​បារាំង បាន​សម្រេច​អោយ​លោក​ឈ្នះ​ក្ដី​ក្នុង​សំណុំ​រឿង​បរិហារកេរ្តិ៍​ដែល​ប្ដឹង​ដោយ​អតីត​រដ្ឋមន្ត្រី​ការបរទេស លោក ហោ ណាំហុង។

លោក សម រង្ស៊ី បាន​សរសេរ​នៅ​លើ​ទំព័រ​ហ្វេសប៊ុក (Facebook) របស់​លោក នៅ​ថ្ងៃ​ទី​៩ ខែ​កក្កដា ថា តុលាការ​នៅ​ប្រទេស​បារាំង បាន​កាត់​ក្ដី​ឲ្យ​លោក ហោ ណាំហុង ចាញ់​លោក​ម្ដង​ទៀត​កាល​ពី​ថ្ងៃ​ទី​៨ ខែ​កក្កដា ឆ្នាំ​២០១៦។

កាល​ពី​ដើម​ឆ្នាំ​២០១១ តុលាការ​ប្រទេស​បារាំង បាន​សម្រេច​អោយ​លោក សម រង្ស៊ី ឈ្នះ​ក្ដី​នេះ​ម្ដង​រួច​ហើយ ប៉ុន្តែ​សំណុំ​រឿង​រឿង​ត្រូវ​លោក ហោ ណាំហុង ប្ដឹង​ទៅ​តុលាការ​បារាំង ម្ដង​ទៀត។

លោក ហោ ណាំហុង បាន​ប្ដឹង​លោក សម រង្ស៊ី ពី​បទ​បរិហារកេរ្តិ៍​ក្រោយ​ពី​លោក សម រង្ស៊ី បាន​និយាយ​ថា អតីត​រដ្ឋមន្ត្រី​ការបរទេស​រូប​នេះ គឺ​ជា​អ្នក​ទទួល​ខុសត្រូវ ឬ​មេ​ជំរំ (គុក) បឹងត្របែក នៅ​ក្នុង​របប​កម្ពុជា​ប្រជាធិបតេយ្យ ឬ​ខ្មែរ​ក្រហម។ លោក សម រង្ស៊ី ធ្លាប់​សរសេរ​ដែរ​ថា លោក ហោ ណាំហុង និង​ភរិយា ធ្លាប់​បាន​សហការ​ជាមួយ​ខ្មែរ​ក្រហម​ក្នុង​ការ​សម្លាប់​មនុស្ស​ជា​ច្រើន​ដែល​ជាប់​ ឃុំឃាំង​នៅ​ទី​នោះ។

បើ​ទោះ​ជា​យ៉ាង​ណា លោក ហោ ណាំងហុង អះអាង​ថា លោក និង​សាច់ញាតិ​របស់​លោក​ក៏​ជា​ជនរងគ្រោះ​ក្នុង​របប​ខ្មែរ​ក្រហម​នោះ​ដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។