តុលាការខេត្តស្ទឹងត្រែងសម្រេចឃុំអ្នកកាសែត៣នាក់ចោទពីបទកំហែងទារប្រាក់
2014.07.23
ចៅក្រមស៊ើបសួរនៃតុលាការខេត្តស្ទឹងត្រែង លោក ឡេង វណ្ណរិទ្ធ សម្រេចចេញដីកាឃុំខ្លួនអ្នកកាសែតបីនាក់នៅពន្ធនាគារខេត្ត នៅថ្ងៃពុធ ទី២៣ ខែកក្កដា។
អ្នកកាសែតទាំងបីនាក់នោះរួមមាន ចាងហ្វាងកាសែតនាគរាជ លោក គឹម សុវណ្ណរិទ្ធ អ្នកយកព័ត៌មានកាសែតសង្គមខ្មែរ លោក ម៉ម ម៉ុន និងអ្នកយកព័ត៌មានកាសែតជាតិខ្មែរ លោក គឹម ស៊ីនឿន ត្រូវបានសមត្ថកិច្ចកងរាជអាវុធហត្ថខេត្តស្ទឹងត្រែង ចាប់ខ្លួនកាលពីថ្ងៃទី២០ ខែកក្កដា ដោយសារតែអ្នកកាសែតទាំងបីនាក់ព្យាយាមថតរូបគំនរឈើរបស់មន្ត្រីអាវុធហត្ថ កំពុងព្យាយាមដឹកចេញពីព្រៃ ក្រោមហេតុផលដឹកជញ្ជូនឈើទៅឲ្យមេបញ្ជាការផ្ទៃប្រទេស លោក សៅ សុខា។
មន្ត្រីអាវុធហត្ថខេត្តបានចោទក្រុមអ្នកកាសែត ថាកំហែងទារប្រាក់ ៥០០ដុល្លារពីការដឹកជញ្ជូនឈើនោះ ក៏ប៉ុន្តែអ្នកកាសែតអះអាងថា មិនបានកំហែងយកប្រាក់ទេ គឺពួកគេសុំប្រាក់ចាក់សាំងឡានតែប៉ុណ្ណោះ។
មេធាវីការពារក្តីអ្នកកាសែត លោក ម៉ៅ សារី ហៅចំណាត់ការឃុំខ្លួនរបស់ចៅក្រមស៊ើបសួរថា មិនមានអង្គហេតុកើតឡើងត្រឹមត្រូវ គ្មានភស្តុតាង គឺមានតែដើមចោទជាសមត្ថកិច្ចកងរាជអាវុធហត្ថជាដើមចោទ និងជាអ្នកកសាងសំណុំរឿងខ្លួនឯង។ លោកអះអាងថា នឹងដាក់ពាក្យប្ដឹងទាស់ដីកាសម្រេចនេះនៅតុលាការសាលាឧទ្ធរណ៍ ដើម្បីផ្តល់យុត្តិធម៌ដល់កូនក្តីលោក៖ «យើងមានអាសយដ្ឋានច្បាស់លាស់ ហើយព្យសនកម្មនៃបទល្មើសមិនបណ្ដាលឲ្យមានភាពក្តៅក្រហាយដល់ជនរងគ្រោះធ្ងន់ធ្ងរពេកទេ ព្រោះគ្រាន់តែជាលក្ខណៈចោទប្រកាន់ មិនទាន់រកឃើញពិតជាមានអង្គហេតុហ្នឹងកើតឡើងផងហ្នឹង ប៉ុន្តែបើសិនមានអង្គហេតុ អ្នកហ្នឹងទារលុយកើតចេញពីការដឹកឈើ អ៊ីចឹងអ្នកដឹកឈើក៏ខុសច្បាប់ដែរ ព្រោះអ្នកដឹកឈើមានច្បាប់មកពីណា។ ក្នុងរឿងនេះ តុលាការមិនគួរឃុំទេ តុលាការគួរដាក់ក្រោមការត្រួតពិនិត្យតាមផ្លូវតុលាការសិនទៅ ចាំស៊ើបអង្កេតតាមក្រោយ»។
វិទ្យុអាស៊ីសេរី មិនអាចសុំការអធិប្បាយពីចៅក្រមស៊ើបសួរ លោក ឡេង វណ្ណរិទ្ធ បានទេនៅថ្ងៃទី២៣ ខែកក្កដា ដោយសារលោកមិនទទួលទូរស័ព្ទហៅចូលជាច្រើនលើក។
យ៉ាងនេះក្តី មន្ត្រីឃ្លាំមើលសិទ្ធិមនុស្សសមាគមអាដហុក (adhoc) លោក ហូ សំអុល កត់សម្គាល់ថា ការចេញដីកាឃុំខ្លួនអ្នកកាសែតរបស់ចៅក្រមស៊ើបសួរ ទំនងក្រោមឥទ្ធិពលអ្នកមានអំណាច។ លោកបន្តថា រឿងក្តីនេះអាចទាក់ទិននឹងសមត្ថកិច្ចកងរាជអាវុធហត្ថដឹកជញ្ជូនឈើខុសច្បាប់ ក៏ប៉ុន្តែមន្ត្រីតុលាការមិនចោទប្រកាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ