តុលាការកំពូល ប្រកាសសាលដីកានៅថ្ងៃទី១៣ ខែមីនា មិនអនុញ្ញាតឲ្យមន្ត្រីសិទ្ធិមនុស្សអាដហុក (ADHOC) ៤រូបនៅក្រៅពន្ធនាគារ តាមបណ្ដឹងជំទាស់នឹងការឃុំខ្លួនហួសកាលកំណត់នោះទេ។ មន្ត្រីសិទ្ធិមនុស្សទាំង ៤រូប សម្ដែងការខកចិត្តចំពោះសាលដីកានេះ ដោយចាត់ទុកថាជារឿងអយុត្តិធម៌។
សាលដីការបស់តុលាការកំពូល លើសំណុំរឿងមន្ត្រីការពារសិទ្ធិមនុស្សអាដហុកនេះ គឺមិនមានលទ្ធផលប្រែប្រួលឡើយ ដោយតម្កល់សាលដីការបស់សាលាឧទ្ធរណ៍ទុកជាបានការដដែល។
ការសម្រេចឃុំខ្លួនមន្ត្រីសិទ្ធិមនុស្សអាដហុកដដែលនេះ តុលាការកំពូល លើកហេតុផលថា ដោយសារមន្ត្រីសិទ្ធិមនុស្សទាំង ៤រូបជាប់ពាក់ព័ន្ធនឹងបទឧក្រិដ្ឋ ខ្លាចរត់គេចខ្លួន និងថាសំណុំរឿងនេះកំពុងស្ថិតក្នុងដំណាក់កាលនៃការស៊ើបអង្កេតនៅឡើយ។
មេធាវីមួយរូប គឺលោក ឡោ ជុនធី ដែលការពារក្ដីឲ្យមន្ត្រីការពារសិទ្ធិមនុស្សអាដហុក មានប្រសាសន៍ថា សេចក្តីសម្រេចរបស់តុលាការកំពូលនេះ គឺមិនសមហេតុផលឡើយ ព្រោះកូនក្តីរបស់លោកមានសំអាងហេតុត្រឹមត្រូវតាមនីតិវិធី៖ « យើងថាបទឧក្រិដ្ឋមែន ប៉ុន្តែចាំបាច់ត្រូវតែឃុំខ្លួនទេ ដោយសារមូលហេតុនៃការឃុំខ្លួនត្រូវបានដោះស្រាយអស់ហើយ ហើយអ្វីដែលជាការស៊ើបអង្កេតមកដល់ពេលនេះ ជិតចប់ទៀត ហើយកន្លងទៅ គឺបានជូនដំណឹងបិទម្តងហើយ ហើយអ្វីដែលសល់ គឺជាបញ្ហាបន្ទាប់បន្សំ។ អ៊ីចឹងគួរតែឲ្យកូនក្តីរបស់យើងបាននៅក្រៅឃុំ ដោយពុំត្រូវពន្យារឃុំខ្លួនបន្តទៀត » ។
តុលាការកំពូល បានបើកសវនាការលើបណ្ដឹងសារទុក្ខប្រឆាំងនឹងការឃុំខ្លួនមន្ត្រីអាដហុក និងមន្ត្រី គ.ជ.ប ដោយហួសកាលកំណត់កាលពីថ្ងៃទីច័ន្ទ ទី៦ មីនា សប្ដាហ៍មុន។
បន្ទាប់ពីស្តាប់ការប្រកាសសាលដីកានោះ មន្ត្រីសិទ្ធិមនុស្សអាដហុក ១រូប គឺលោក យី សុខសាន្ត សម្ដែងការខកចិត្ត ដោយចាត់ទុកថាជារឿងអយុត្តិធម៌សម្រាប់ពួកគាត់៖ « មានតែប្រទេសកុម្មុយនិស្តផ្ដាច់ការទេដែលគេចាប់ពួកសិទ្ធិមនុស្សដាក់ពន្ធនាគារនោះ ក្រៅពីនេះគឺពួកសិទ្ធិមនុស្សបានជួយធ្វើការឲ្យរដ្ឋាភិបាល ដើម្បីឲ្យរដ្ឋាភិបាលមានមុខស្មើមុខស្មើមាត់នឹងគេស្របច្បាប់ទៅនឹងពិភពលោក » ។
រីឯលោក នី សុខា បានផ្ដាំទៅលោកនាយករដ្ឋមន្ត្រី ហ៊ុន សែន សូមកុំឲ្យភ្ជាប់ករណីរបស់ពួកគាត់ទៅនឹងល្បែងនយោបាយ។
មន្ត្រីអាដហុកទាំង ៤រូប រួមមាន លោក នី សុខា លោក ណៃ វ៉ង់ដា លោក យី សុខសាន្ត និងអ្នកស្រី លឹម មុន្នី ព្រមទាំងលោក នី ចរិយា មន្ត្រី គ.ជ.ប ត្រូវបានសាលាដំបូងរាជធានីភ្នំពេញ ឃុំខ្លួនបណ្ដោះអាសន្នរយៈពេលជាង ១០ខែមកហើយគិតចាប់តាំងពីដើមខែឧសភា ឆ្នាំ២០១៦ ក្រោមបទចោទ «សូកប៉ាន់សាក្សី» និង «សមគំនិតក្នុងអំពើសូកប៉ាន់សាក្សី»។
រីឯប្រធានគ្រប់គ្រងផ្នែកស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ដែលចូលរួមស្តាប់ការប្រកាសសាលក្រមនោះ មានប្រសាសន៍ថា មិនមានហេតុផលចាំបាច់ក្នុងការបន្តឃុំខ្លួនមន្ត្រីអាដហុកទៀតនោះទេ ព្រោះថាការស៊ើបអង្កេតហាក់ដូចជាមិនមានការវិវឌ្ឍន៍ទៅមុខឡើយ៖ « ផ្ទុយទៅវិញប្រសិនបើអ្នកទាំង ៤ អាចនៅក្រៅឃុំបាន គាត់នឹងអាចប្រកបការងារជាអ្នកការពារសិទ្ធិមនុស្សនេះ បានជួយទៅដល់ប្រជាពលរដ្ឋ ឬក៏ជនរងគ្រោះដែលបានរំលោភសិទ្ធិមនុស្ស ការរំលោភដីធ្លីតទៅមុខទៀត ហើយក៏ដូចជាចូលរួមចំណែកជួយកិច្ចការងាររបស់រដ្ឋាភិបាលដែរ ព្រោះអង្គការសង្គមស៊ីវិលដែលធ្វើការសិទ្ធិមនុស្សនេះ បានជួយការងារច្រើនណាស់សម្រាប់រដ្ឋាភិបាល សម្រាប់កិច្ចការងារទាក់ទងនឹងវិស័យសិទ្ធិមនុស្ស និងផ្លូវច្បាប់ ជាពិសេសជួយជំរុញការគោរពសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសកម្ពុជា » ។
កាលពីថ្ងៃទី៥ ខែមីនា អង្គការសង្គមស៊ីវិលផ្នែកសិទ្ធិមនុស្សចំនួន៧៨ ដែលភាគច្រើនមានមូលដ្ឋានក្នុងតំបន់អាស៊ី បានចេញសេចក្តីថ្លែងការណ៍រួមគ្នា «សម្ដែងការមិនពេញចិត្តជាខ្លាំង» ចំពោះការបន្តឃុំខ្លួនសកម្មជនសិទ្ធិមនុស្សកម្ពុជា ទាំង ៥រូប និងអំពាវនាវឲ្យបញ្ឈប់ជាបន្ទាន់នូវការយាយីតាមផ្លូវតុលាការ និងការប្រើអំពើហិង្សាលើអ្នកការពារសិទ្ធិមនុស្សនៅកម្ពុជា។
ការបន្តឃុំខ្លួនជាង ១០ខែដោយគ្មានភស្តុតាងត្រឹមត្រូវលើអ្នកការពារសិទ្ធិមនុស្ស ដែលបម្រើការនៅសមាគមអាដហុក (ADHOC) ក៏ត្រូវបានគេលើកឡើងនៅក្រុមប្រឹក្សាសិទ្ធិមនុស្សអង្គការសហប្រជាជាតិ ក្នុងក្រុងហ្សឺណែវ (Geneva)កាលពីថ្ងៃទី៨ ខែមីនា ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។