តុលាការ​សម្រេច​ដោះ​លែង​លោក ប៊ន សំណាង និង​លោក សុខ សំអឿន

តុលាការ​កំពូល​បាន​បើក​សវនាការ​ជំនុំ​ជម្រះ​លើ​ករណី​បាញ់​សម្លាប់ លោក ជា វិជ្ជា អតីត​ប្រធាន​សហជីព​សេរី​កម្មករ កាល​ពី​ឆ្នាំ​២០០៤។ លទ្ធផល​នៃ​សវនាការ​នោះ តុលាការ​សម្រេច​ដោះ​លែង​ជន​សង្ស័យ លោក ប៊ន សំណាង និង លោក សុខ សំអឿន ឲ្យ​មាន​សេរីភាព​វិញ នៅ​ថ្ងៃ​ទី២៥ ខែ​កញ្ញា។
ដោយ ទេព សុរ៉ាវី
2013-09-25
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ក្រុម​នគរ​បាល​នាំ​ខ្លួន លោក សុខ សំអឿន (អាវ​ខៀវ​ស្ដាំ) និង លោក ប៊ន សំណាង (អាវ​ខៀវ​ឆ្វេង) ចូល​សវនាការ​នា​តុលាការ​កំពូល នៅ​ថ្ងៃ​ទី២៥ ខែ​កញ្ញា ឆ្នាំ​២០១៣។
ក្រុម​នគរ​បាល​នាំ​ខ្លួន លោក សុខ សំអឿន (អាវ​ខៀវ​ស្ដាំ) និង លោក ប៊ន សំណាង (អាវ​ខៀវ​ឆ្វេង) ចូល​សវនាការ​នា​តុលាការ​កំពូល នៅ​ថ្ងៃ​ទី២៥ ខែ​កញ្ញា ឆ្នាំ​២០១៣។
RFA/Tep Soravy

អង្គការ​សង្គម​ស៊ីវិល ដែល​ឃ្លាំ​មើល​រឿង​នេះ ទទូច​ឲ្យ​រដ្ឋាភិបាល​ទទួល​ខុស​ត្រូវ​ចំពោះ​សំណង​ជំងឺ​ចិត្ត​ដល់​ពួក​គេ​ទាំង​ពីរ​នាក់ ដែល​បាន​ជាប់​ឃុំ​ជិត ៦​ឆ្នាំ ដោយ​គ្មាន​ទោស​កំហុស។

តុលាការ​កំពូល​សម្រេច​ដោះ​លែង លោក ប៊ន សំណាង និង លោក សុខ សំអឿន ជា​ស្ថាពរ​ដោយ​គ្មាន​លក្ខខណ្ឌ បន្ទាប់​ពី​បាន​បើក​សវនាការ​ជិត ៥​ម៉ោង នៅ​ថ្ងៃ​ទី២៥ ខែ​កញ្ញា។

ប្រធាន​ក្រុម​ប្រឹក្សា​ជំនុំ​ជម្រះ​នៃ​តុលាការ​កំពូល លោក ឃឹម ប៉ុន បាន​ប្រកាស​សាល​ដីកា​នៅ​ក្នុង​សវនាការ ដោយ​សម្រេច​ឲ្យ​ជន​ជាប់​ចោទ ប៊ន សំណាង និង សុខ សំអឿន រួច​ផុត​ពី​បទ​ឃាតកម្ម​គិត​ទុក​ជា​មុន ទៅ​លើ លោក ជា វិជ្ជា និង​បញ្ជា​ឲ្យ​ដោះ​លែង​ពួក​គេ​ទាំង​ពីរ​នាក់​ឲ្យ​មាន​សេរីភាព​វិញ ដោយ​មិន​ត្រូវ​ឃុំ​ខ្លួន​ពី​បទ​អ្វី​ទៀត និង​បាន​ឲ្យ​ពួក​គេ​រួច​ផុត​ពី​សំណង​រដ្ឋប្បវេណី​ចំនួន ៤០​លាន​រៀល​ទៅ​ដើម​បណ្តឹង។

ការ​សម្រេច​នេះ ធ្វើ​ឡើង​ដោយ​ក្រុម​ប្រឹក្សា​ជំនុំ​ជម្រះ​សំអាង​ហេតុ​ថា ការ​ស្រាវជ្រាវ​របស់​មន្ត្រី​នគរបាល​ព្រហ្មទណ្ឌ​ទាំង​ការ​ធ្វើ​កោសល្យវិច័យ និង​រក​កាំភ្លើង​ជា​វត្ថុ​តាង​សម្លាប់​ជន​រងគ្រោះ ធ្វើ​ឡើង​មិន​ត្រឹមត្រូវ​តាម​ច្បាប់ ការ​គូស​គំនូស​ព្រាង​មុខ​ឃាតក​ដែល​ចោទ​ទៅ​លើ លោក ប៊ន សំណាង មិន​ធ្វើ​ស្រប​តាម​នីតិវិធី មិន​អាច​យក​ជា​ការ​បាន ពិសេស​សាក្សី​សំខាន់ គឺ​អ្នកស្រី វ៉ា សុធី ជា​អ្នក​លក់​កាសែត បាន​បញ្ជាក់​យ៉ាង​ច្បាស់​ថា ឈ្មោះ ប៊ន សំណាង និង សុខ សំអឿន មិន​មែន​ជា​ឃាតក​ពិត​ប្រាកដ​សម្លាប់ លោក ជា វិជ្ជា ទេ។

លោក ឃឹម ប៉ុន បញ្ជាក់​ក្នុង​សវនាការ​ថា ភស្តុតាង និង​សាក្សី​ដាក់​បន្ទុក​មិន​បាន​ស៊ី​សង្វាក់​គ្នា​ដូច​ការ​ចោទ​ប្រកាន់ ហើយ​តុលាការ​គ្មាន​ភស្តុតាង​ច្បាស់​លាស់​សម្រាប់​ការ​ចោទ​ប្រកាន់​ឡើយ។

អ្នក​ចូល​រួម​មើល​សវនាការ​បាន​ទះ​ដៃ​សាទរ​ចំពោះ​ការ​សម្រេច​នោះ។ លោក ប៊ន សំណាង និង លោក សុខ សំអឿន បាន​ស្រែក​អរគុណ​ចំពោះ​ចៅក្រម​ជំនុំ​ជម្រះ​ទាំង ៩​នាក់ ដែល​ជួយ​រក​យុត្តិធម៌ និង​បាន​ដោះ​លែង​ឲ្យ​មាន​សេរីភាព។ លោក សុខ សំអឿន ប្រាប់​អ្នក​កាសែត​នៅ​ក្រៅ​បន្ទប់​សវនាការ​ថា យុត្តិធម៌​នៅ​កម្ពុជា ពិត​ជា​មាន​នៅ​ពេល​ដែល​តុលាការ​សម្រេច​ដោះ​លែង​ពួក​គេ​ឲ្យ​រួច​ផុត​ពី​បទ​ចោទ​ប្រកាន់។

អស់​រយៈពេល​ជិត ១០​ឆ្នាំ​ហើយ តុលាការ​រក​មិន​ឃើញ​ឃាតក​ពិត​ដែល​បាញ់​សម្លាប់ លោក ជា វិជ្ជា អតីត​ប្រធាន​សហជីព​សេរី​កម្មករ ដែល​ត្រូវ​បាន​បាញ់​សម្លាប់​នៅ​តូប​លក់​កាសែត​ក្បែរ​វត្ត​លង្កា កាល​ពី​ឆ្នាំ​២០០៤។ សាលា​ដំបូង​រាជធានី​ភ្នំពេញ និង​តុលាការ​ឧទ្ធរណ៍ បាន​សម្រេច​ផ្ដន្ទាទោស លោក ប៊ន សំណាង និង លោក សុខ សំអឿន ឲ្យ​ជាប់​ពន្ធនាគារ ២០​ឆ្នាំ និង​ផ្តល់​សំណង​ប្រាក់ ៤០​លាន​រៀល​ដល់​ដើម​បណ្ដឹង។ ប៉ុន្តែ ពួក​គេ​ទាំង​ពីរ​ត្រូវ​បាន​ក្រុម​អង្គការ​សង្គម​ស៊ីវិល អះអាង​ថា ជា​ឃាតក​សិប្បនិម្មិត។

លោក ជា មុនី ប្អូន​ប្រុស​របស់ លោក ជា វិជ្ជា យល់​ឃើញ​ថា ការ​ដោះ​លែង​ជន​ជាប់​ចោទ​ទាំង​ពីរ​នាក់ ជា​ការ​ត្រឹមត្រូវ និង​យុត្តិធម៌​បំផុត។ ប៉ុន្តែ សម្រាប់​លោក និង​ក្រុម​គ្រួសារ នៅ​មិន​ទាន់​បាន​យុត្តិធម៌​ពី​តុលាការ​នៅ​ឡើយ​ទេ ដោយសារ​តែ​តុលាការ​មិន​ទាន់​រក​ឃើញ​ឃាតក​ពិត​ប្រាកដ​សម្លាប់ លោក ជា វិជ្ជា នៅ​ឡើយ។

មេធាវី​លោក សុខ សំអឿន គឺ លោក ហុង គឹមសួន បញ្ជាក់​ថា ការ​សម្រេច​របស់​តុលាការ​កំពូល​នៅ​ពេល​នេះ គឺ​ជា​ការ​ផ្តល់​យុត្តិធម៌​ដែល​មិន​នឹក​ស្មាន​ដល់។ លោក​បាន​បន្ទោស​ថា ការ​ធ្វេស​ប្រហែស​របស់​មន្ត្រី​នគរបាល​យុត្តិធម៌ និង​តុលាការ​ថ្នាក់​ក្រោម គឺ​ជា​មូលហេតុ​ដែល​នាំ​ឲ្យ​កូន​ក្តី​របស់​លោក​ត្រូវ​ជាប់​ពន្ធនាគារ​ជិត ៦​ឆ្នាំ ដោយ​គ្មាន​កំហុស។

លោក​បញ្ជាក់​ថា លោក​នឹង​ពិភាក្សា​ជាមួយ​កូន​ក្តី​របស់​លោក ចំពោះ​ការ​ដាក់​បណ្ដឹង​ណា​មួយ​ប្ដឹង​ទៅ​មន្ត្រី​ថ្នាក់​ក្រោម ដែល​បាន​អនុវត្ត​ខុស​នីតិវិធី​ច្បាប់ រហូត​ឈាន​ទៅ​ចាប់ និង​ឃុំ​ខ្លួន​កូន​ក្តី​លោក​ឲ្យ​ជាប់​ពន្ធនាគារ​ដោយ​គ្មាន​ទោសពៃរ៍។

យ៉ាង​ណា ម្តាយ​លោក ប៊ន សំណាង គឺ​អ្នកស្រី នួន គីមស្រ៊ី ហាក់​មិន​ចាប់​អារម្មណ៍​ចំពោះ​បណ្ដឹង​នេះ​ទេ ដោយ​បញ្ជាក់​ថា អ្នកស្រី​ប្រាថ្នា​សូម​ឲ្យ​តែ​កូន​របស់​គាត់​មាន​សេរីភាព​ដូច​ដើម។

ប្រធាន​ផ្នែក​បច្ចេកទេស​ស៊ើប​អង្កេត​របស់​អង្គការ​លីកាដូ (Licadho) លោក អំ សំអាត យល់​ឃើញ​ថា ការ​សម្រេច​របស់​តុលាការ​កំពូល​នេះ ជា​ការ​សម្រេច​គំរូ​ដែល​ទុក​ជា​យុទ្ធសាស្ត្រ​មួយ​សម្រាប់​អនុវត្ត​នៅ​ពេល​ក្រោយ ដើម្បី​ជៀសវាង​កុំ​ឲ្យ​មាន​រឿង​អយុត្តិធម៌ ឬ​មាន​ជន​ជាប់​ចោទ​ដទៃ​ទៀត​ត្រូវ​ជាប់​ឃុំ ដោយ​មិន​បាន​ប្រព្រឹត្ត​បទ​ល្មើស។ យ៉ាង​ណា លោក​យល់​ថា ការ​ចាប់​ខ្លួន លោក ប៊ន សំណាង និង លោក សុខ សំអឿន ឲ្យ​ជាប់​ឃុំ​ដោយ​គ្មាន​កំហុស​នេះ តាម​ច្បាប់​រដ្ឋាភិបាល​ត្រូវ​ទទួល​ខុស​ត្រូវ និង​ផ្តល់​សំណង​ជំងឺ​ចិត្ត​ការ​បាត់​បង់​នូវ​មុខ​របរ​សម្រាប់​ពួក​គេ ជា​ថ្នូរ​នៃ​កំហុស​ដែល​បាន​ចាប់​មនុស្ស​គ្មាន​កំហុស​ឃុំ​ក្នុង​ពន្ធនាគារ​រយៈពេល​ជិត ៦​ឆ្នាំ ដោយសារ​តែ​កំហុស​របស់​មន្ត្រី​ក្រោម​ឱវាទ។

អង្គការ​អន្តរជាតិ​ខាង​ការងារ (ILO) និង​ការិយាល័យ​ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស ចេញ​សេចក្តី​ថ្លែងការណ៍​រួម​មួយ​នៅ​ថ្ងៃ​ទី២៥ ខែ​កញ្ញា ស្វាគមន៍​ការ​សម្រេច​របស់​តុលាការ​កំពូល ដែល​បាន​ដោះ​លែង លោក ប៊ន សំណាង និង លោក សុខ សំអឿន និង​បាន​អំពាវនាវ​ឲ្យ​មាន​ការ​ស៊ើប​អង្កេត​ស៊ី​ជម្រៅ​ចំពោះ​ករណី​ឃាតកម្ម​លើ លោក ជា វិជ្ជា ដើម្បី​នាំ​ឃាតក​ពិត​ប្រាកដ​យក​មក​ផ្ដន្ទាទោស។

ប្រភព​ពី​មេធាវី​របស់ លោក ប៊ន សំណាង និង លោក សុខ សំអឿន បញ្ជាក់​ថា ពួក​គេ​ទាំង​ពីរ​នាក់​មិន​ទាន់​ត្រូវ​បាន​ដោះ​លែង​ចេញ​ពី​ពន្ធនាគារ​ទេ ទោះ​បី​តុលាការ​កំពូល​សម្រេច​ឲ្យ​ដោះ​លែង​នៅ​ថ្ងៃ​ពុធ ទី២៥ ខែ​កញ្ញា ក៏ដោយ។ មូលហេតុ​ដែល​មិន​ទាន់​ដោះ​លែង​នេះ ដោយសារ​តែ​ខាង​អគ្គ​មហា​អយ្យការ​តុលាការ​កំពូល មិន​ទាន់​ចុះ​ហត្ថលេខា​លើ​ដីកា​របស់​តុលាការ​នៅ​ឡើយ ដោយសារ​តែ​ផុត​ម៉ោង​រដ្ឋបាល ដូច្នេះ​ការ​ដោះ​លែង​នេះ​ត្រូវ​ពន្យារ​ពេល​ទៅ​ថ្ងៃ​ទី២៦ ខែ​កញ្ញា វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (10)
  • បោះពុម្ព
  • ចែករំលែក
  • អ៊ីម៉ែល

ហានិភ័យ

ពី តាកែវ

អ្នកទោសទាំងពីរគឺជាចំណាប់ខ្មាំងនយោបាយរបស់រដ្ឋាភិបាល តុលាការគ្រាន់តែជាអ្នកនាំពាក្យតែប៉ុណ្ណោះ។

Sep 26, 2013 03:32 AM

អ្នក​អាន​អនាមិក

ទោះជាយ៉ាងណាក៏ដោយជំហានដំបូង សូមអរសាទរនូវការ
លែងអោយមានសេរីភាពចំពោះបុគ្គលគ្មានកំហុសទាំពីរនាក់
ខាងលើ គឺលោកប៊ន សំណាង និងលោកសុខ សំអឿន។
ភាពយុត្តិធម៌កាន់តែមាន ហើយអាចអោយពលរដ្ឋស្លូតត្រង់
យល់ថា យុត្តិធម៌។ ទន្ទឹននឹងនេះដែរ តើការខូចខាតរបស់ជន
រងគ្រោះទាំពីរនាក់អាចកើតមានជូនគាត់វិញបានទេ។ ដើម្បីជា
គំរូរលើប្រព័ន្ធយុត្តិធម៌គួរតែមានសំណងសមស្រប ដើម្បីកុំអោយ
មានអំពើបែបនេះកើតមានឡើងតទៅទៀត។

Sep 26, 2013 02:40 AM

Original Khmer Farmer

Dear all,
Do not confuse between the social justice and the individual justice. However, it’s the justice for both of you (Sok Sam Oeun and Born Samnang), but it isn’t a justice for the majority of Cambodians in the society. Look! the human rights abuse and violation is occurring everywhere in Cambodia, the culture of the impunity and social injustice still prevail the principle of the justice, the poor and powerless people still living under the ill-treat of the cruel leader of government and its officials. This is only a piece of the justice for us. We need more…

Dear Sam, from Siem Reap,
Sam, you’re absolutely right. You deeply understand the fact behind the black curtain and the profound mystery of this matter. I really appreciate...

very truly yours,

Sep 25, 2013 09:02 PM

Roth

ពី WA

ម្តងចាប់ ម្តងលែងដូចសត្វធាតុ យកជីវិតមនុស្សធ្វើជាល្បែង ។ សូមអោយអ្នកណាដែលប្រព្រឹត្តរឿងនេះទទួលនូវផលកម្មដែលខ្លួនបានសាង ។

Sep 25, 2013 06:19 PM

អ្នក​អាន​អនាមិក

Both of them must sue the govmt to pay of wasting life in prison

Sep 25, 2013 07:43 AM

មើល​មតិ​ទាំង​អស់.

គេហទំព័រ​ទាំងមូល