តុលាការ​កំពូល​នឹង​បើក​សវនាការ​បណ្ដឹង​សាទុក្ខ​របស់​លោក​កឹម សុខា នៅ​ថ្ងៃ​ទី៣១ តុលា

ដោយ អាស៊ីសេរី
2017.10.20
កឹម សុខា ប្រធាន​គណបក្ស​សង្គ្រោះ​ជាតិ ២០១៧ ៦២២ ប្រធាន​គណបក្ស​សង្គ្រោះ​ជាតិ លោក កឹម សុខា ថ្លែង​ទៅ​កាន់​សមាជិក​ក្រុមប្រឹក្សា​ឃុំ-​សង្កាត់ និង​ក្រុម​អ្នក​ឃោសនា ​នា​ទីស្នាក់ការ​សង្កាត់​ចាក់អង្រែលើ កាល​ពី​ព្រឹក​ថ្ងៃ​ទី​១៤ ខែ​មីនា ឆ្នាំ​២០១៧។
Photo: RFA

តុលាការ​កំពូល នឹង​លើក​យក​បណ្ដឹង​សាទុក្ខ​ក្នុង​សំណុំរឿង​ឃុបឃិត​ជា​មួយ​បរទេស របស់​លោក កឹម សុខា ទៅ​ជំនុំជម្រះ​នៅ​ចុង​ខែ​តុលា ខាង​មុខ​នេះ។

សេចក្ដី​ជូន​ដំណឹង​របស់​តុលាការ​កំពូល ដែល​ចេញ​ដោយ​អគ្គព្រះរាជអាជ្ញា​រង នៃ​មហា​អយ្យការ​អម​តុលាការ​កំពូល​លោក អ៊ុក គឹមសិទ្ធិ បាន​កោះ​ហៅ​មេធាវី​ដែល​ការពារ​ក្ដី​ឲ្យ​លោក កឹម សុខា ត្រូវ​ចូលរួម​សវនាការ តាម​ការ​កំណត់ នៅ​ថ្ងៃ​ទី៣១ ខែ តុលា ពេល​ព្រឹក។

ប្រភព​បន្ត​ថា ក្នុង​សំណុំរឿង​នេះ គឺ​លោក ឃឹម ប៉ុណ្ណ ជា​ប្រធាន​ក្រុម​ប្រឹក្សា​ជំនុំជម្រះ និង​មាន​សមាជិក​ក្រុម​ប្រឹក្សា​ជំនុំជម្រះ​ចំនួន ៤រូប​ផ្សេង​ទៀត។

ទាក់ទិន​រឿង​នេះ មេធាវី​ការពារ​ក្ដី​ឲ្យ​លោក កឹម សុខា គឺ​អ្នកស្រី ម៉េង សុភារី ក្នុង​ចំណោម​មេធាវី ៤រូប​ផ្សេង​ទៀត ឲ្យ​ដឹង​នៅ​ថ្ងៃ​ទី២០ តុលា ថា ក្រុម​មេធាវី​ទាំង​អស់ ដែល​ការពារ​ក្ដី​ឲ្យ​ប្រធាន​គណបក្ស​ប្រឆាំង លើ​បណ្ដឹង​សាទុក្ខ​នេះ គឺ​នៅ​មិន​ទាន់​ពិគ្រោះ​យោបល់​គ្នា ឲ្យ​បាន​ល្អិតល្អន់​នៅ​ឡើយ​ទេ។

អ្នកស្រី​យល់​ឃើញ​ថា តាម​ពិត​នេះ​ជា​រឿង​នយោបាយ តែ​ការ​បន្ត​នីតិវិធី​តាម​ផ្លូវ​តុលាការ ក៏​ជា​រឿង​ចាំបាច់​ដែល​ត្រូវ​តែ​ជំរុញ​ដែរ។ ក្នុង​នាម​ជា​មេធាវី អ្នកស្រី​បន្ត​ថា នឹង​ប្រឹងប្រែង​ឲ្យ​អស់​ពី​លទ្ធភាព ក្នុង​ការ​ដោះបន្ទុក​ការពារ​ឲ្យ​កូន​ក្ដី​របស់​អ្នកស្រី អាច​រួច​ផុត​ពី​ការ​ចោទ​ប្រកាន់ តាម​ផ្លូវ​តុលាការ។

លោក កឹម សុខា ត្រូវ​បាន​កម្លាំង​សមត្ថកិច្ច ឡោមព័ទ្ធ​ផ្ទះ និង​ចាប់​ខ្លួន​ទាំង​ពាក់​កណ្ដាល​អធ្រាត្រ​ឈាន​ចូល​ថ្ងៃ​ទី៣ ខែ​កញ្ញា ស្ថិត​ក្នុង​ខណ្ឌ​ទួលគោក ក្រុង​ភ្នំពេញ។ ក្រោយ​ចាប់​ខ្លួន​ប្រធាន​គណបក្ស​ប្រឆាំង​រូប​នេះ ត្រូវ​រង​ការ​ចោទ​ប្រកាន់​ពី​ទោស​ក្បត់ជាតិ។ សព្វថ្ងៃ​លោក កឹម សុខា ត្រូវ​ឃុំ​ខ្លួន​នៅ​គុក​ត្រពាំង​ផ្លុង​ជាប់​ព្រំ​ដែន​កម្ពុជា-វៀតណាម ក្នុង​ខេត្ត​ត្បូងឃ្មុំ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។