មន្ត្រីជាន់ខ្ពស់នគរបាលចរាចរណ៍ផ្លូវគោកសុំមិនបញ្ចេញឈ្មោះ បានឲ្យដឹងថា សាលាដំបូងរាជធានីភ្នំពេញ បានសម្រេចចោទប្រកាន់និស្សិតពេទ្យឈ្មោះ គាមពិសិដ្ឋ ណារីតា ពីបទបង្កគ្រោះថ្នាក់ចរាចរណ៍ដោយអចេតនា បង្កឲ្យអ្នកដទៃរបួស និងស្លាប់ តាមមាត្រា ៨០ និងមាត្រា ៨២ នៃច្បាប់ចរាចរណ៍ផ្លូវគោក នៅល្ងាចថ្ងៃទី៣ មីនា នេះ។
មាត្រា ៨២ ចែងថា ជនណាបើកបរបង្កឲ្យស្លាប់ដល់អ្នកដទៃដោយអចេតនា ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ ៣ឆ្នាំ និងពិន័យជាប្រាក់ពី ២លានរៀល ទៅ ៦លានរៀល។
តុលាការសម្រេចចោទប្រកាន់និស្សិតពេទ្យនៃសាកលវិទ្យាល័យវេជ្ជសាស្ត្រ និងវិទ្យាសាស្ត្រសុខាភិបាលនេះ ធ្វើឡើងនៅស្របពេលព្រះសង្ឃប្រមាណ ១០០អង្គមកពីចំនួន ៥វត្ត នៅក្នុងរាជធានីភ្នំពេញ និមន្តសូត្រមន្តរំដោះគ្រោះចង្រៃនៅលើដងវិថីព្រះនរោត្ដម ចាប់ពីវិមានឯករាជ្យ ដល់កន្លែងកើតហេតុ នៅមុខក្រសួងមហាផ្ទៃ និងនិមន្តឆ្ពោះទៅដល់គល់ស្ពានអាកាសក្បាលថ្នល់ នៅរសៀលថ្ងៃទី៣ មីនា នេះ។ ក្រុមគ្រួសារកុមារា កុមារី រងគ្រោះទាំងបីនេះ បានរៀបចំពិធី និងតាំងរូបថតកុមាររងគ្រោះទាំងនោះនៅកន្លែងកើតហេតុ មានសាច់ញាតិបងប្អូន និងប្រជាពលរដ្ឋចូលរួមក្នុងពិធីសូត្រមន្តរំដោះគ្រោះនេះ។
លោក រិន រិទ្ធី ជាឪពុកកុមារីរងគ្រោះពីរនាក់ បានរៀបរាប់ទាំងអួលដើមកស្រណោះដល់កូនជាទីស្រលាញ់ដែលស្លាប់នៅក្នុងហេតុការណ៍គ្រោះថ្នាក់ចរាចរណ៍នោះថា លោកជាសន្តិសុខយាមនៅកោះពេជ្រ។ លោកមានកូនស្រីបីនាក់។ ឥឡូវនេះកូនស្រីពីរនាក់គាត់បានស្លាប់ទាំងក្ដីរន្ធត់ និងអាឡោះអាល័យបំផុតនៅខណៈពួកគេចេញពីសាលានៅថ្ងៃទី១ មីនា នោះ។ លោកទទូចឲ្យតុលាការ និងស្ថាប័នពាក់ព័ន្ធទាំងអស់ ជួយរកយុត្តិធម៌ជូនកូនស្រីគាត់ និងផ្ដល់សំណងសមរម្យ។
អនុប្រធានមន្ទីរសុខាភិបាលខេត្តកណ្ដាល លោក គាម ពិសិដ្ឋ ជាឪពុករបស់យុវតី គាមពិសិដ្ឋ ណារីតា ដែលជាអ្នកបង្កគ្រោះថ្នាក់ចរាចរណ៍បានសំដែងការសោកស្ដាយជាពន់ពេក និងសូមអភ័យទោសដល់ជនរងគ្រោះទាំងអស់ ចំពោះគ្រោះថ្នាក់ដែលបានបង្កឡើងដោយកូនស្រីរបស់លោក ហើយលោកនឹងដោះស្រាយបញ្ហានេះទៅតាមនីតិវិធីច្បាប់ទាំងអស់។
លោក គាម ពិសិដ្ឋ បញ្ជាក់ថា កូនស្រីគាត់មានជំងឺមានដុំតូចមួយនៅលើខួរក្បាល និងធ្វើឲ្យស្លុត ដែលធ្លាប់យកទៅព្យាបាលនៅប្រទេសថៃ ម្ដងហើយ។
ឆ្លើយតបបញ្ហានេះ ក្រុមគ្រួសារអ្នករងគ្រោះបានបញ្ជាក់ថា ពួកគាត់មិនអាចទទួលយកបានទេ ថានិស្សិតពេទ្យរូបនេះមានបញ្ហាខួរក្បាលនោះ។
ប្រធានមជ្ឈមណ្ឌលវប្បធម៌ជាតិ និងសីលធម៌សង្គម លោក ប៉ូ សំណាង មានប្រសាសន៍ថា នេះជារឿងល្អមួយដែលព្រះសង្ឃបាននិមន្តសូត្រមន្តប្រោះព្រំ រលាស់ទឹករំដោះគ្រោះតាមបែបព្រះពុទ្ធសាសនានេះ។ លោក ប៉ូ សំណាង បញ្ជាក់ថា ការធ្វើដូច្នេះមិនអាចកាត់បន្ថយគ្រោះថ្នាក់ចរាចរណ៍បានទាំងស្រុងទេ បញ្ហាសំខាន់គឺការពង្រឹងច្បាប់ចរាចរណ៍ និងអប់រំប្រជាពលរដ្ឋឲ្យមានការគោរពច្បាប់ និងយល់ដឹងអំពីច្បាប់ឲ្យបានច្បាស់លាស់។
របាយការណ៍ពីមន្ត្រីនគរបាលចរាចរណ៍ផ្លូវគោកឲ្យដឹងថា គ្រោះថ្នាក់ចរាចរណ៍ដែលបង្កឡើងដោយនិស្សិតពេទ្យនៅមុខក្រសួងមហាផ្ទៃ កាលពីល្ងាចថ្ងៃទី១ មីនា នោះ បានបណ្ដាលឲ្យកុមារបីនាក់ស្លាប់នៅកន្លែងកើតហេតុក្នុងនោះ មានកុមារីពីរនាក់ជាបងប្អូនបង្កើតឈ្មោះ រិន រចនា និងឈ្មោះ រិន បុប្ឆា រស់នៅសង្កាត់ទន្លេបាសាក់ ខណ្ឌចំការមន និងកុមារម្នាក់ទៀតឈ្មោះ ស្រេង ហុង រស់នៅស្រុកខ្សាច់កណ្ដាល ខែត្រកណ្ដាល។ រីឯអ្នករងបួសធ្ងន់ចំនួន ៦នាក់ផ្សេងទៀតកំពុងសម្រាកព្យាបាលនៅមន្ទីរពេទ្យនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។