អាជ្ញាធរប៉ូលិសខេត្តព្រៃវែង នៅព្រឹកថ្ងៃទី២៤ កុម្ភៈ ឆ្នាំ២០១៤ បានបញ្ជូនសំណុំរឿងរបស់ជនសង្ស័យពីបទរំលោភលើសពស្ត្រីវ័យ ១៧ឆ្នាំម្នាក់ នៅភូមិបេង ឃុំព្រៃពោន ស្រុកកំពង់ត្របែក ខេត្តព្រៃវែង ទៅតុលាការខេត្ត។ អាជ្ញាធរប៉ូលិសបញ្ជាក់ថា ការបញ្ជូនជនសង្ស័យគឺដើម្បីឲ្យតុលាការ ពិនិត្យនិងវិនិច្ឆ័យពីលក្ខណៈសម្បត្តិរបស់ជនសង្ស័យ ថាជាមនុស្សវិកលចរិត ឬយ៉ាងណា?
ការចាប់និងបញ្ជូនជនសង្ស័យទៅតុលាការនេះ បន្ទាប់ពីមានប្រជាពលរដ្ឋខ្លះបញ្ជាក់ថា ជនសង្ស័យជាមនុស្សមានសតិមិនប្រក្រតីម្ដងម្កាល។
ស្នងការនគរបាលខេត្តព្រៃវែង ថ្លែងនៅថ្ងៃទី២៤ កុម្ភៈ ឆ្នាំ២០១៤ ដោយបញ្ជាក់ថា បន្ទាប់ពីប៉ូលិសបានចុះស្រាវជ្រាវរួចសន្និដ្ឋានថា ជនដែលសង្ស័យថាបានរំលោភលើសាកសពស្ត្រីវ័យ ១៧ឆ្នាំនោះ អាចជាមនុស្សមានសតិមិនប្រក្រតី។
លោក ស្រេង ជា បញ្ជាក់បន្ថែមថា ដើម្បីពិសោធ និងវិនិច្ឆ័យពីលក្ខណៈសម្បត្តិរបស់ជនសង្ស័យឲ្យបានច្បាស់ អាជ្ញាធរប៉ូលិសបានរៀបចំបញ្ជូនជនសង្ស័យទៅសាលាដំបូងខេត្ត ដើម្បីឲ្យតុលាការធ្វើការស្រាវជ្រាវបន្ត៖ «នេះគឺជាការសន្និដ្ឋានរបស់ប្រជាពលរដ្ឋនៅក្នុងភូមិ ព្រោះមនុស្សនៅក្នុងភូមិគេដឹងថាអ៊ីចឹង ដល់អ៊ីចឹងក៏នឹកឃើញថា ដើម្បីបញ្ចៀសពីបញ្ហាប្ដឹងរបស់ពលរដ្ឋ កុំឲ្យពលរដ្ឋសង្ស័យ យើងបញ្ជូនមកស្ថាប័នតុលាការ ដើម្បីឲ្យគាត់វិនិច្ឆ័យថា ជាលក្ខណៈសតិមិនគ្រប់គ្រាន់...។ មតិខ្លះតម្រូវឲ្យមានហើយតុលាការចាត់យ៉ាងម៉េចនោះគឺជារឿងតុលាការ»។
ជនសង្ស័យដែលរំលោភលើសពស្រីវ័យ ១៧ឆ្នាំ ឈ្មោះលោក ជិន ឈាន អាយុ ៤៧ឆ្នាំ រស់នៅភូមិ បេង នៃឃុំព្រៃពោន ស្រុកកំពង់ត្របែក។ នៅយប់ថ្ងៃទី២២ កុម្ភៈ ឆ្នាំ២០១៤ ជនសង្ស័យរូបនេះ ប្រដាប់ដោយឧបករណ៍មានកាំបិតបុ័ងតោ កាំបិតផ្គាក់ ចប ម្ជុលចាក់ថ្នាំ និងស្រោមអនាម័យដែលប្រើរួចចំនួន ៣ផង បានគាស់មឈូសចូលទៅដេកជាមួយសាកសពស្ត្រីវ័យ ១៧ឆ្នាំក្នុងក្ដារមឈូស។
មេភូមិបេង លោក ផាន់ សេង ឲ្យដឹងថា នៅថ្ងៃកើតហេតុ អ្នកភូមិបានទៅដល់ប្រទះឃើញ ជនសង្ស័យកំពុងស្ថិតនៅក្នុងក្ដារមឈូសជាមួយសាកសព។ លោក ផាន់ សេង ថ្លែងបន្តថា ពេលនោះប្រទះឃើញសាកសពនៅក្នុងក្ដារមឈូសស្ថិតក្នុងភាពអាក្រាតកាយ។ លោកថាជនសង្ស័យអាច រំលោភលើរូបរាងកាយរបស់សាកសពបានសម្រេចរួចទៅហើយ។
លោក ផាន់ សេង បញ្ជាក់បន្ថែមថា ដើមឡើយជនសង្ស័យជាមនុស្សមានសតិគ្រប់គ្រាន់ដូចគេដូចឯង ពុំមែនជាមនុស្សវិកលចរិតឡើយ៖ «អានេះបើយើងថាគាត់វិកលចរិតក៏ថាមិនបានដែរ មនុស្សនេះវាពិបាកថា។ កាលពីដើមឡើយគាត់មិនដែលទេ គាត់នៅជាមនុស្សស្អាតស្អំដូចគេដូចឯងអ៊ីចឹង ហើយទើបតែគាត់មកម្នាក់ឯងបែកពីប្រពន្ធកូនមកហ្នឹង គាត់និយាយខុសផងត្រូវផងហ្នឹង គេថាគាត់វិកលចរិត តែពេលណាគាត់និយាយល្អៗដូចយើងធម្មតាអ៊ីចឹង វាគ្រាន់តែនិយាយច្រើនមនុស្សហ្នឹង»។
រីឯអ្នកភូមិដែលឃើញក្នុងហេតុការណ៍ លោក មិល សុវណ្ណ ថ្លែងបញ្ជាក់ថា ជនសង្ស័យនៅយប់កើតហេតុ បានទៅចូលរួមក្នុងកម្មវិធីបុណ្យសពជាមួយអ្នកភូមិដែរ។ លោកថា យប់ដដែលនេះ ជនសង្ស័យបានផឹកស្រាមួយចំនួនជាមួយអ្នកភូមិ ហើយក៏ដើរចេញពីហ្វូងមនុស្សក្នុងកម្មវិធីបុណ្យបាត់ទៅ៖ «បាទ! សន្និដ្ឋានថារំលោភ ព្រោះអីវាចូលហ្នឹងតាំងពីល្ងាចម៉ោង ៧ ខ្ញុំហ៊ានសន្និដ្ឋានថាអ៊ីចឹង។វាមកពីល្ងាចហ្នឹងម៉ោង ៧កន្លះវាមកសូត្រមន្ត វាមានលុយចូលបុណ្យសុទ្ធតែក្រដាសមួយម៉ឺន ក្រដាស ៥ពាន់។ រួចហើយក៏ហូបបាយហូបស្រាហ្នឹងស្រវឹង ស្រវឹងទៅ មនុស្សហ្នឹងបាត់ ព្រលឹមឡើងឃើញនៅក្នុងផ្នូរហ្នឹង»។
ជនសង្ស័យត្រូវបានប៉ូលិសខេត្តព្រៃវែង បញ្ជូនខ្លួនទៅសាលាដំបូងខេត្ត ដើម្បីដោះស្រាយតាមផ្លូវច្បាប់។ ស្នងការរងនគរបាលខេត្តព្រៃវែង ឲ្យដឹងនៅរសៀលថ្ងៃទី២៤ កុម្ភៈ ថា ចៅក្រមតុលាការខេត្តព្រៃវែង បានសម្រេចចោទប្រកាន់ជនសង្ស័យរូបនេះមានទោសពីការប្រព្រឹត្តបទល្មើសមជ្ឈិម។
មាត្រា ២៦១ នៃក្រមព្រហ្មទណ្ឌចែងអំពីបទល្មើសទាក់ទងជាមួយការប៉ះពាល់ដល់បូរណភាពនៃសាកសព បានចែងថា អំពើប៉ះពាល់ដល់បូរណភាពនៃសាកសព ត្រូវផ្ដន្ទាទោសដាក់ពន្ធនាគារពី ១ខែ ទៅ ១ឆ្នាំ និងពិន័យជាប្រាក់ពី ១សែនរៀល ទៅ ២លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។