តុលាការខេត្តស្វាយរៀង បើកសវនាការនៅថ្ងៃទី៨ ខែតុលា ឆ្នាំ២០១៤ ដោយបានសម្រេចផ្ដន្ទាទោសកម្មករម្នាក់នៅក្នុងរោងចក្រនៃតំបន់សេដ្ឋកិច្ចពិសេស ខេត្តស្វាយរៀង ឲ្យជាប់គុកចំនួន ២ឆ្នាំ ពីបទបំផ្លិចបំផ្លាញដែលមានស្ថានទម្ងន់ទោស។
តុលាការ បានសម្រេចឲ្យជនជាប់ចោទ គឺលោក ចាន់ សារិទ្ធ អនុវត្តទោសចំនួន ៨ខែ គិតពីថ្ងៃចាប់ខ្លួនកាលពីចុងខែមេសា ឆ្នាំ២០១៤ មក។ រហូតមកដល់ថ្ងៃទី៨ ខែតុលា ជនជាប់ចោទបានអនុវត្តទោសចំនួន ៥ខែ ៧ថ្ងៃហើយ។
ទោះយ៉ាងណា លោក ជិន លីដា មេធាវីការពារក្ដីឲ្យ លោក ចាន់ សារិទ្ធ បានថ្លែងថា តុលាការបានចោទកូនក្ដីរបស់លោកពីបទល្មើស ទី១បទលួច ទី២បទហិង្សាដោយចេតនា និងទី៣ បទបំផ្លិចបំផ្លាញដែលមានស្ថានទម្ងន់ទោស។ លោកមេធាវីបានថ្លែងថា ចៅក្រមស៊ើបសួរបានលើកលែងបទចោទពីរចេញវិញ គឺបទលួច និងបទហិង្សាដោយចេតនា ដោយសារតែមិនមានភស្តុតាងដាក់ទោស។
លោក ជិន លីដា៖ «ការទម្លាក់បទចោទពីរបទល្មើសចំពោះគាត់ (ចាន់ សារិទ្ធ) ហ្នឹង គឺមានភាពយុត្តិធម៌ចំពោះគាត់ហើយ ហើយការដែលគាត់ទទួលស្គាល់ថា គាត់បានគប់រោងចក្រអីហ្នឹង គឺគាត់ព្រមទទួលស្គាល់ទង្វើរបស់គាត់។ គាត់មានការទទួលស្គាល់ យើងយល់គាត់ ប៉ុន្តែការដែលចាត់ទុកថា ការបំផ្លិចបំផ្លាញរបស់គាត់ទៅវាធ្ងន់ធ្ងរ បើគិតតាមទង្វើរបស់គាត់ទៅមិនធ្ងន់ធ្ងរអីទេ ចំពោះការគប់ហ្នឹង»។
កាលពីអំឡុងខែមេសា កន្លងទៅ កម្មករនៅឯតំបន់សេដ្ឋកិច្ចពិសេសខេត្តស្វាយរៀង បានធ្វើបាតុកម្មទាមទារដំឡើងប្រាក់ខែគោល ១៦០ដុល្លារ និងអត្ថប្រយោជន៍ផ្សេងៗទៀត ប៉ុន្តែបាតុកម្មបានឈានដល់ហិង្សា ហើយសមត្ថកិច្ចចាប់ខ្លួន និងសាកសួរកម្មករ តំណាងកម្មករមួយចំនួនទៀត ក្នុងករណីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។