អ្នកកាសែតបីនាក់ រួមទាំងភរិយាពួកគេម្នាក់ទៀត ត្រូវបានមន្ត្រីអយ្យការតុលាការខេត្តស្ទឹងត្រែង សម្រេចចោទប្រកាន់ និងបញ្ជូនទៅឲ្យចៅក្រមស៊ើបសួរ បន្ទាប់ពីសមត្ថកិច្ចកងរាជអាវុធហត្ថបញ្ជូនសំណុំរឿងជនសង្ស័យទៅតុលាការ។ អ្នកឃ្លាំមើលសិទ្ធិមនុស្ស ចាត់ទុកការចាប់ខ្លួនអ្នកកាសែត ថាជាការរំលោភធ្ងន់ធ្ងរទៅលើសេរីភាពអ្នកសារព័ត៌មាន។
ក្រុមអ្នកកាសែតចំនួន ១០នាក់ នៅថ្ងៃទី២២ ខែកក្កដា បានផ្ដិតមេដៃលើលិខិតដាក់ជូនមន្ត្រីតុលាការខេត្តស្ទឹងត្រែង សុំធានាឲ្យអ្នកកាសែត ៣នាក់ បាននៅក្រៅការឃុំខ្លួនជាបណ្ដោះអាសន្ន។
ចាងហ្វាងកាសែតនាគរាជ លោក គឹម សុវណ្ណរិទ្ធ និងភរិយា និងអ្នកយកព័ត៌មានកាសែតសង្គមខ្មែរ លោក ម៉ម ម៉ុន អ្នកយកព័ត៌មានកាសែតជាតិខ្មែរ លោក គឹម ស៊ីនឿន ត្រូវចាប់ខ្លួនកាលពីថ្ងៃទី២០ ខែកក្កដា នៅភូមិស្រែស្រណុក ឃុំស្រែគរ ស្រុកសេសាន ខេត្តស្ទឹងត្រែង ក្នុងបទចោទប្រកាន់ថា បានកំហែងទារប្រាក់ ៥០០ដុល្លារពីមន្ត្រីអាវុធហត្ថ ក្នុងរឿងដឹកជញ្ជូនឈើប្រណីតពីក្នុងព្រៃ។ ក៏ប៉ុន្តែ នៅថ្ងៃទី២២ ខែកក្កដា ព្រះរាជអាជ្ញាបានសម្រេចមិនចោទប្រកាន់ភរិយាអ្នកកាសែតនោះឡើយ។
អ្នកយកព័ត៌មានកាសែតកោះសន្តិភាព ប្រចាំខេត្តរតនគិរី លោក ផង់ វិន មានប្រសាសន៍បញ្ជាក់ថា ការចាប់ខ្លួនអ្នកកាសែតទាំង ៣នាក់ រួមទាំងភរិយា គឺជាការរំលោភសិទ្ធិមនុស្ស និងគំរាមកំហែងទៅលើសិទ្ធិសេរីភាព ក្នុងការយកព័ត៌មានរបស់អ្នកកាសែត។ លោកអំពាវនាវសុំឲ្យមន្ត្រីតុលាការ ស៊ើបអង្កេតឲ្យបានត្រឹមត្រូវ និងផ្តល់យុត្តិធម៌ក្នុងករណីនេះ៖ «ការចាប់ខ្លួនលើក្រុមអ្នកកាសែតនេះ ដូចជាមិនត្រឹមត្រូវទេ ហាក់ដូចជាមិនមានភស្តុតាងណាមួយជាក់លាក់ ដែលត្រូវចោទប្រកាន់ថា ក្រុមអ្នកកាសែតទៅចាប់ជំរិតប្រាក់បែបនេះ»។
ទាក់ទិនករណីនេះដែរ មេបញ្ជាការកងរាជអាវុធហត្ថខេត្តស្ទឹងត្រែង លោក អៀង វ៉ាន់ឌី បដិសេធមិនអធិប្បាយបញ្ហានេះជាមួយវិទ្យុអាស៊ីសេរី ទេនៅថ្ងៃទី២២ ខែកក្កដា ដោយសារលោកជាប់រវល់ប្រជុំ។
ចាងហ្វាងកាសែតនាគរាជ លោក គឹម សុវណ្ណរិទ្ធ ខណៈដែលលោកត្រូវបានបញ្ជូនខ្លួនទៅតុលាការ លោកអះអាងប្រាប់វិទ្យុអាស៊ីសេរី តាមទូរស័ព្ទថា មន្ត្រីអាវុធហត្ថដឹកជញ្ជូនឈើគ្មានច្បាប់ ហើយឆ្លើយបញ្ជាក់ថា ជាឈើរបស់មេបញ្ជាការអាវុធហត្ថផ្ទៃប្រទេស។ លោកទទួលស្គាល់ថា បានសុំប្រាក់ចាក់សាំងពីមន្ត្រីអាវុធហត្ថ ប៉ុន្តែមិនបានកំហែងយកប្រាក់អ្វីឡើយ៖ «គេចោទថាខ្ញុំជំរិតទារប្រាក់គេ ៥០០ដុល្លារ ហើយខ្ញុំអត់បាននិយាយពាក្យហ្នឹងទេ។ ការចាប់ហ្នឹងជាការរំលោភសិទ្ធិអ្នកកាសែត បំបាក់ស្មារតីអ្នកកាសែត»។
ឃ្លាំមើលបញ្ហានេះដែរ មន្ត្រីសិទ្ធិមនុស្សសមាគមអាដហុក (adhoc) ចាត់ទុកចំណាត់ការរបស់សមត្ថកិច្ចកងរាជអាវុធហត្ថខេត្ត ថារំលោភនីតិវិធីកសាងសំណុំរឿង។ លោកកត់សម្គាល់ថា មន្ត្រីអាវុធហត្ថ បានធ្វើសន្និធិឈើខុសច្បាប់ ប៉ុន្តែបានប្រើអំណាចចោទប្រកាន់អ្នកកាសែត និងចាប់អ្នកកាសែតក្នុងឋានៈខ្លួនជាដើមចោទផង និងជាអ្នកកសាងសំណុំរឿងផង៖ «ប៉េអិមគាត់ធ្វើអ៊ីចឹង គឺខុសនីតិវិធី អ៊ីចឹងសុំឲ្យចៅក្រម ឬស្ថាប័នអយ្យការ មេត្តាស៊ើបអង្កេតករណីហ្នឹងឲ្យបានច្បាស់លាស់»។
ប្រធានក្លិបអ្នកកាសែត លោក ប៉ែន សមិទ្ធិ ថ្លែងថា លោកនឹងចាត់មន្ត្រីក្លិបអ្នកកាសែត ស្រាវជ្រាវតើករណីហ្នឹងមានការរំលោភច្បាប់សារព័ត៌មានយ៉ាងណាខ្លះ? លោកបន្តថា មន្ត្រីតុលាការ គួរអនុវត្តនីតិវិធីឲ្យជនជាប់ចោទនៅក្រៅឃុំបណ្ដោះអាសន្ន ដើម្បីដំណើរការរឿងក្តីនេះតាមច្បាប់។
ទោះជាយ៉ាងនេះក្តី រហូតមកទល់នឹងរសៀលម៉ោង ៥ និង ៣០នាទី ចៅក្រមស៊ើបសួរកំពុងបន្តនីតិវិធីសាកសួរជនជាប់ចោទទាំងបីនាក់នៅឡើយ។ គេមិនទាន់ដឹងថា តើចៅក្រមស៊ើបសួរសម្រេចឃុំខ្លួន ឬយ៉ាងណា ចំពោះអ្នកកាសែតទាំងបីនាក់នេះ។
រហូតមកទល់នឹងម៉ោង ៦ និង ៣០នាទីថ្ងៃដដែល អ្នកកាសែតទាំងបីនាក់ ត្រូវបានបញ្ជូនទៅបញ្ជាការដ្ឋានកងរាជអាវុធហត្ថជាបណ្ដោះអាសន្ន ដើម្បីចៅក្រមសាកសួរបន្ថែមទៀតនៅថ្ងទី២៣ ខែកក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។