លោក មូរតុន ក្លារ (Morton Sklar) មេធាវីការពារក្តី លោក មាជ សុវណ្ណារ៉ា យល់ឃើញថា បើរដ្ឋាភិបាលកម្ពុជា ដោះលែងលោក មាជ សុវណ្ណារ៉ា និងអ្នកទោសមនសិការដទៃទៀត នោះនឹងអាចស្ដារស្ថានការណ៍នយោបាយ និងមុខមាត់កម្ពុជា ឡើងវិញបានខ្លះ។
ក្ដីសង្ឃឹមរបស់មេធាវី លោក មូរតុន ក្លារ ក្រោយពីកញ្ញា មាជ សុជាតា កូនស្រីច្បងលោក មាជ សុវណ្ណារ៉ា បានសរសេរលិខិតផ្ញើលោក ហ៊ុន សែន តាមមេធាវីលោក ហ៊ុន ម៉ាណែត កាលពីថ្ងៃទី១ ខែកញ្ញា ជាលើកទីពីរ។ លោកអះអាងថា លិខិតនេះ នឹងអាចដាស់សតិលោក ហ៊ុន សែន ឲ្យគិតឡើងវិញផ្នែកមនុស្សធម៌លើករណីលោក មាជ សុវណ្ណារ៉ា ដែលកំពុងឈឺធ្ងន់ និងបញ្ជូនទៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត កាលពីចុងសប្តាហ៍ កន្លងទៅនេះ។
លោក មូរតុន ក្លារ បញ្ជាក់ថា លិខិតនេះអាចជាការស្ទាបស្ទង់ភាគីរដ្ឋាភិបាល និងលោក ហ៊ុន ម៉ាណែត ប្រសិនបើពួកគេចង់ចរចា។ លោកបន្តថា អ្វីដែលភាគីលោកចង់បាននោះ គឺរដ្ឋាភិបាលត្រូវតែដោះលែងលោក មាជ សុវណ្ណារ៉ា។
មេធាវីការពារក្ដីលោក មាជ សុវណ្ណារ៉ា ស្វាគមន៍ការចរចាគ្នាមួយនៅក្រៅប្រព័ន្ធតុលាការ ប៉ុន្តែមិនបានបញ្ជាក់ព័ត៌មានលំអិតនៃការចរចានោះឡើយ។
លោក មូរតុន ក្លារ ស្នើឲ្យរដ្ឋាភិបាលកម្ពុជា គួរយកគំរូតាមប្រទេសមីយ៉ាន់ម៉ា (ភូមា) ដោយបញ្ឈប់របៀបដឹកនាំបែបផ្តាច់ការ និងឈប់ប្រើចុងកាណុងកាំភ្លើងដោយប្ដូរមកជាការដឹកនាំបែបប្រជាធិបតេយ្យពិតប្រាកដមួយវិញ។ លោកបន្ថែមថា បើរដ្ឋាភិបាលមានគតិបណ្ឌិតពិតមែន គួររិះគិតខំកែខ្លួន និងឈប់ធ្វើទុក្ខបុកម្នេញអ្នកបញ្ចេញមតិរិះគន់ប្រឆាំង។ ការកែខ្លួនមកប្រព្រឹត្តល្អ និងត្រឹមត្រូវ មិនធ្វើឲ្យរដ្ឋាភិបាលបាក់មុខទេ។ ផ្ទុយទៅវិញ ការដឹកនាំផ្ដាច់ការមិនអាចឋិតថេរជារៀងរហូតបានឡើយ។
លោក ហ៊ុន ម៉ាណែត កាលពីដើមសប្តាហ៍នេះ បានឆើ្លយតបមេធាវីដើមបណ្ដឹងលោក មូរតុន ក្លារ ដោយចោទថា លោកកំពុងបំផ្លើសការពិត និងធ្វើឱ្យសាធារណជនមានការយល់ច្រឡំដែលថា តុលាការកាត់ក្ដីឲ្យលោកចាញ់ក្តីនោះ។
លោក ហ៊ុន ម៉ាណែត បានសរសេរនៅលើបណ្ដាញសង្គមហ្វេសប៊ុក (facebook) ថា មេធាវីរបស់លោក គឺលោក ចន ផូសែល (John Purcell) បានធ្វើការបកស្រាយយ៉ាងច្បាស់ថា ដើមបណ្ដឹងមិនទាន់ឈ្នះក្ដីនៅឡើយទេ ហើយថា ដើមបណ្ដឹងមិនបានបង្ហាញអង្គហេតុណាមួយទៅតុលាការសហរដ្ឋអាមេរិក ដើម្បីអាចតម្រូវឱ្យលោក ហ៊ុន ម៉ាណែត ត្រូវចូលខ្លួនទៅតុលាការដើម្បីឆ្លើយតបទៅនឹងបណ្ដឹងដែលបានដាក់នោះដែរ។
លោក ហ៊ុន ម៉ាណែត បន្តថា រឿងក្តីនេះគឺស្ថិតត្រឹមដំណាក់កាលនៃការទាមទារព័ត៌មានបន្ថែម ដើម្បីកំណត់សមត្ថកិច្ចតុលាការក្នុងការជំនុំជម្រះក្ដីតែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។