អនុប្រធានការិយាល័យនគរបាលចរាចរណ៍ផ្លូវគោក លោក ប៉ែន ឃុន បានឲ្យដឹងថា សមត្ថកិច្ចបានបញ្ជូននិស្សិតពេទ្យឈ្មោះ គាមពិសិដ្ឋ ណារីតា ទៅឃុំខ្លួននៅពន្ធនាគារព្រៃសរួចហើយ កាលពីវេលាម៉ោង ៩ព្រឹក ថ្ងៃទី៤ ខែមីនា តាមដីកាឃុំខ្លួនរបស់សាលាដំបូងរាជធានីភ្នំពេញ។
លោក ប៉ែន ឃុន៖ «បញ្ជូនទៅដល់ព្រៃសបាត់ហើយ ដោយសារយប់មិញយើងទទួលដីកាឃុំខ្លួនម៉ោង ៥ ជាងហើយ យើងបញ្ជូនទៅគេផុតម៉ោងរដ្ឋបាល។ បញ្ជូនដល់ម៉ោង ៩ជាង ខ្ញុំបញ្ជូនទៅដល់ព្រៃសខ្លួនឯង។ គេចោទប្រកាន់ពីបទបង្កអ្នកដទៃរបួស និងបទល្មើសបើកបរឲ្យអ្នកដទៃស្លាប់ដោយអចេតនា តាមមាត្រា ៨០ និង ៨២»។
ចៅក្រមតុលាការសាលាដំបូងរាជធានីភ្នំពេញ បានសម្រេចចោទប្រកាន់លើនិស្សិតពេទ្យដែលបើកឡានបុករះបណ្ដាលឲ្យស្លាប់ និងរបួសមនុស្សជាច្រើននាក់នៅមុខក្រសួងមហាផ្ទៃ ក្រោមបទចោទប្រកាន់ពីបទល្មើសបើកបរបង្កឲ្យអ្នកដទៃរបួស និងបទល្មើសបើកបរឲ្យអ្នកដទៃស្លាប់ដោយអចេតនាតាមមាត្រា ៨០ និងមាត្រា ៨២ នៃច្បាប់ចរាចរណ៍ផ្លូវគោក។
មកទល់ពេលនេះនៅមិនទាន់មានដំណឹងថា តុលាការនឹងបើកសវនាការលើករណីនេះនៅពេលណានោះទេ។ ប៉ុន្តែប្រសិនបើតុលាការរកឃើញថា និស្សិតពេទ្យនោះបានប្រព្រឹត្តដូចបទចោទប្រកាន់មែន នាងអាចនឹងត្រូវជាប់ពន្ធនាគារពី ១ឆ្នាំ ទៅ ៣ឆ្នាំ និងពិន័យជាប្រាក់ពី ២លានរៀន ទៅ ៦លានរៀល។
របាយការណ៍ពីមន្ត្រីនគរបាលចរាចរណ៍ផ្លូវគោកឲ្យដឹងថា គ្រោះថ្នាក់ចរាចរណ៍ដែលបង្កឡើងដោយនិស្សិតពេទ្យនៅមុខក្រសួងមហាផ្ទៃ កាលពីល្ងាចថ្ងៃទី១ មីនា នោះ បានបណ្ដាលឲ្យកុមារបីនាក់ស្លាប់នៅកន្លែងកើតហេតុ ក្នុងនោះមានកុមារីពីរនាក់ជាបងប្អូនបង្កើតឈ្មោះ រិន រចនា និងឈ្មោះ រិន បុប្ឆា រស់នៅសង្កាត់ទន្លេបាសាក់ ខណ្ឌចំការមន និងកុមារម្នាក់ទៀតឈ្មោះ ស្រេង ហុង រស់នៅស្រុកខ្សាច់កណ្ដាល ខែត្រកណ្ដាល។ រីឯអ្នករងបួសធ្ងន់ចំនួន ៦នាក់ផ្សេងទៀតកំពុងសម្រាកព្យាបាលនៅមន្ទីរពេទ្យនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។