តុលាការនឹងប្រកាសសាលដីកាករណីសកម្មជនបរិស្ថានតំបន់អារ៉ែងនៅថ្ងៃទី២៨មិថុនា
2017.06.21
សកម្មជនការពារបរិស្ថានតំបន់អារ៉ែង និងជាប្រធានសហគមន៍ជនជាតិដើមភាគតិចជង លោក វ៉ែន វ៉ន ផ្ដល់បទសម្ភាសន៍បន្ទាប់ចេញពីសវនាការនៃតុលាការកំពូល ថ្ងៃទី២១ ខែមិថុនា ឆ្នាំ២០១៧។
RFA/Brach Chev
តុលាការកំពូល នឹងប្រកាសសាលដីកាបណ្ដឹងសាទុក្ខដែលប្ដឹងប្រឆាំងការសម្រេចរបស់តុលាការខេត្តកោះកុង របស់សកម្មជនការពារបរិស្ថានតំបន់អារ៉ែង និងជាប្រធានសហគមន៍ជនជាតិដើមភាគតិចជង លោក វ៉ែន វ៉ន នៅថ្ងៃទី២៨ ខែមិថុនា ខាងមុខ។
ថ្លែងប្រាប់អ្នកកាសែតក្រោយចប់សវនាការ សកម្មជនការពារបរិស្ថានតំបន់អារ៉ែង លោក វ៉ែន វ៉ន ចាត់ទុកថា នេះជាឱកាសដែលធ្វើឲ្យលោកអាចឆ្លើយបំភ្លឺទៅតុលាការកំពូល ទោះជាពេលវេលាខ្លីបន្តិចក្តី។ លោក វ៉ែន វ៉ន ទាមទារឲ្យតុលាការទម្លាក់ការចោទប្រកាន់លើលោក ប៉ុន្តែសកម្មជនបរិស្ថានរូបនេះមិនទាន់ហ៊ានបង្ហាញក្តីរំពឹងថា តុលាការជាន់ខ្ពស់មួយនេះនឹងផ្តល់យុត្តិធម៌ដល់រូបលោកទេ៖ «សុំឲ្យតុលាការទម្លាក់ចោលការចោទប្រកាន់លើខ្ញុំតែម្តង គឺខ្ញុំអត់មានទោសទេ ព្រោះទង្វើរបស់ខ្ញុំ មែនសម្រាប់បុគ្គលរបស់ខ្ញុំឯណា ដើម្បីសហគមន៍»។
តុលាការកំពូល បើកការជំនុំជម្រះលើបណ្ដឹងសាទុក្ខរបស់លោក វ៉ែន វ៉ន ដែលប្ដឹងប្រឆាំងការសម្រេចរបស់តុលាការខេត្តកោះកុង នៅព្រឹកថ្ងៃទី២១ ខែមិថុនា ត្រឹមរយៈពេលជាងប្រាំនាទីប៉ុណ្ណោះ។ សវនាការនេះ ក៏មានការចូលរួមពីមេធាវីការពារក្តីរបស់លោកដែរ។
អាស៊ីសេរី មិនទាន់អាចសុំការបំភ្លឺពីមេធាវីការពារក្តីរបស់លោក វ៉ែន វ៉ន បានទេនៅថ្ងៃទី២១ ខែមិថុនា។
អ្នកសម្របសម្រួលនៃអង្គការសិទ្ធិមនុស្សលីកាដូ (LICADHO) ប្រចាំខេត្តកោះកុង លោក អ៊ិន គង់ជិត យល់ថា សវនាការរយៈពេលខ្លីដូច្នេះមិនអាចធ្វើឲ្យលោក វ៉ែន វ៉ន និងមេធាវីរបស់លោក មានពេលគ្រប់គ្រាន់ពន្យល់ពីអង្គសេចក្តីទៅកាន់អង្គជំនុំជម្រះ ឲ្យយល់ពីដំណើររឿងនោះឡើយ។ លោកស្នើឲ្យតុលាការកំពូល ច្រានចោលការចោទប្រកាន់របស់តុលាការខេត្តកោះកុង ព្រោះលោកយល់ថា លោក វ៉ែន វ៉ន គ្មានកំហុសទេ៖ «រយៈពេលខ្លីពេកចឹង យើងគិតថា អ្វីដែលដើមបណ្ដឹងសាទុក្ខគាត់ចង់ប្រាប់ហ្នឹង នៅមានច្រើនទៀត»។
លោក វ៉ែន វ៉ន ជាសកម្មជនការពារបរិស្ថានតំបន់អារ៉ែង និងជាប្រធានសហគមន៍ជនជាតិដើមភាគតិចជង រស់នៅឃុំជំនាប់ ស្រុកថ្មបាំង ខេត្តកោះកុង។ លោកត្រូវបានតុលាការចាប់ខ្លួន និងបញ្ជូនទៅដាក់ពន្ធនាគារខេត្តកោះកុង កាលពីថ្ងៃទី៧ ខែតុលា ឆ្នាំ២០១៥ ដោយចោទប្រកាន់ចំនួន ២បទចោទ គឺទាក់ទងការប្រមូលអនុផលព្រៃឈើ និងការបំបាត់វត្ថុតាង ប៉ុន្តែលោកត្រូវបានអនុញ្ញាតឲ្យនៅក្រៅឃុំវិញកាលពីថ្ងៃទី៣ ខែមីនា ឆ្នាំ២០១៦។
លោក វ៉ែន វ៉ន ប្រាប់ថា ឈើដែលលោកបានទិញជាឈើធម្មតា មិនមែនឈើប្រណិតទេ ហើយការទិញនោះ គឺដើម្បីសង់រោងសហគមន៍ជួបប្រជុំការងារ។
ទាក់ទងការចោទប្រកាន់ការប្រមូលអនុផលព្រៃឈើ លោក អ៊ិន គង់ជិត សង្កេតឃើញថា នៅខេត្តកោះកុង មានបទល្មើសព្រៃឈើច្រើនណាស់ ប៉ុន្តែសមត្ថកិច្ចមិនបង្ក្រាប បែរមកចោទប្រកាន់លោក វ៉ែន វ៉ន ដែលជាអ្នកការពារព្រៃឈើទៅវិញ។ លោកថា ការដែលចោទប្រកាន់មកលើសកម្មជនបរិស្ថានរូបនេះ គឺព្រោះតែសកម្មភាពការពារព្រៃឈើ និងការការពារធនធានធម្មជាតិរបស់លោក វ៉ែន វ៉ន និងក្រុមសហគមន៍ បានធ្វើឲ្យក្រុមអាជ្ញាធរខ្លះមិនពេញចិត្ត។
កាលពីខែកញ្ញា ឆ្នាំ២០១៦ សាលាឧទ្ធរណ៍ បានបដិសេធបណ្ដឹងជំទាស់របស់លោក វ៉ែន វ៉ន ម្ដងរួចមកហើយ ដោយរក្សាការសម្រេចរបស់សាលាដំបូងខេត្តកោះកុង ទុកជាបានការដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ