គ្រួសារជនរងគ្រោះគ្រោងដាក់ពាក្យបណ្ដឹងទៅតុលាការខេត្តបន្ទាយមានជ័យ ដើម្បីទាមទាររកយុត្តិធម៌លើករណីមន្ត្រីប៉ូលិសនិងមន្ត្រីសហគមន៍នេសាទនៅស្រុកព្រះនេត្រព្រះ ខេត្តបន្ទាយមានជ័យ ដែលបានយកកាំភ្លើងបាញ់ឲ្យកូនគាត់ម្នាក់អាយុ ១៦ឆ្នាំ របួសបាក់ជើងទាំងពីរ។ ហេតុការណ៍កើតមានឡើងនៅក្នុងការចុះបង្ក្រាបបទល្មើសនេសាទឆក់ត្រី។ បច្ចុប្បន្នជនរងគ្រោះកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។
សមាគមការពារសិទ្ធិមនុស្សអាដហុក ទាមទារមន្ត្រីប៉ូលិស និងមន្ត្រីសហគមន៍នេសាទនៅឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ ទទួលខុសត្រូវចំពោះមុខច្បាប់លើករណីប្រើអាវុធបាញ់ប្រហារទៅអ្នកភូមិម្នាក់ បណ្ដាលឲ្យរបួសបាក់ជើងទាំងសងខាងបញ្ជូនទៅសង្គ្រោះនៅមន្ទីរពេទ្យបង្អែកខេត្តសៀមរាប។
អំពើហិង្សាប្រដាប់អាវុធនេះ កើតមានឡើងនៅក្នុងការចុះបង្ក្រាបបទល្មើសនេសាទឆក់ត្រីមួយនៅចំណុចបឹងក្រឡកតូច ឋិតក្នុងភូមិសាស្ត្រ ភូមិអូរម៉ាល់លិច ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ។
អ្នកសម្របសម្រួលសមាគមអាដហុក លោក ស៊ុំ ចន្ទគា ថ្លែងថា ការចុះស៊ើបអង្កេតរកឃើញថា ករណីនេះជាករណីហិង្សាដោយចេតនាមានស្ថានទម្ងន់ទោស ហើយទាមទារឲ្យមានការចោទប្រកាន់តាមផ្លូវច្បាប់៖ «ប៉ូលិសត្រូវទទួលខុសត្រូវក្នុងរឿងហ្នឹង ព្រះរាជអាជ្ញាសូមធ្វើការចោទប្រកាន់ទៅលើជនដែលប្រព្រឹត្តិហ្នឹង យើងឃើញថា ករណីនេះ ករណីជនដែលបញ្ជានិងជនជាអ្នកបាញ់មានចារី សហចារី ជនផ្សំគំនិតបាញ់ គឺជាបទល្មើសមួយ។ ដូច្នេះបទល្មើសឆក់ត្រី និងបទល្មើសការបាញ់ សាក្សីចង្អុលបង្ហាញនៅកន្លែងកើតហេតុនៅបញ្ជាក់ថា អត់មានប្រជាពលរដ្ឋណាច្រើនទេ គឺមានតែពីរនាក់ឪពុកនិងកូនតែប៉ុណ្ណោះ ដែលខាងសហគមន៍បីនាក់ និងប៉ូលិសម្នាក់ដែលមានកាំភ្លើង»។
វិទ្យុអាស៊ីសេរីមិនអាចសុំការបញ្ជាក់ពីតំណាងអយ្យការអមសាលាដំបូងខេត្តបន្ទាយមានជ័យ ជុំវិញ បញ្ហានេះបានទេ។ ចំណែកមន្ត្រីប៉ូលិសនិងមន្ត្រីសហគមន៍ពាក់ព័ន្ធក្នុងរឿងនេះ ក៏មិនអាចសុំការបញ្ជាក់បានដូចគ្នា។ ប៉ុន្តែមេប៉ុស្តិ៍នគរបាលឃុំប្រាសាទ លោក ប៉្រក់ ឡែ បានបដិសេធថា នៅពេលចុះបង្ក្រាបបទល្មើសនេសាទកាលពីថ្ងៃទី១១ ខែកុម្ភៈ សមត្ថកិច្ចប៉ូលិសបានប្រគល់អាវុធឲ្យមន្ត្រីសហគមន៍ជាអ្នកស្ពាយ។ នៅពេលនោះ សមត្ថកិច្ចប៉ូលិសចាប់បានជនប្រព្រឹត្តបទល្មើសម្នាក់ ស្រាប់តែមានជនល្មើសម្នាក់ចូលទៅប្រតាយប្រតប់ដើម្បីជួយជនម្នាក់ទៀតដែលប៉ូលិសបានចាប់។
លោក ប៉្រក់ ឡែ៖ «ប៉ូលិសខ្ញុំម្នាក់ឯងវ៉ៃចង់ស្លាប់ចង់រស់ម្នាក់ឯង គេពីរនាក់។ ស្រែករកជំនួយអោយគេជួយ ហើយខាងកងកម្លាំងសហគមន៍ ក៏ស្រែកឲ្យឈប់ តែនៅតែវ៉ៃអ៊ីចឹងក៏បាញ់គំរាមមួយគ្រាប់ទៅ»។
លោកមេប៉ុស្តិ៍បន្តថា មន្ត្រីសហគមន៍បានបាញ់កាំភ្លើងគ្រាប់ដើម្បីគំរាម ហើយឈ្មោះ អៀង សុខ បានរត់ចូលព្រៃ។ ចំណែករឿងត្រូវរបួសនោះ លោកបដិសេធថា មិនមែនត្រូវដោយគ្រាប់កាំភ្លើងនោះឡើយ។ លោកថាករណីនេះកំពុងស្រាវជ្រាវនៅឡើយ។
ជនរងគ្រោះឈ្មោះ អៀង សុខ ហៅ អៀង ចក់ អាយុ ១៦ឆ្នាំ របួសជើង និងប្រអប់ជើង កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។ លោក ហាត អៀង អាយុ ៥៤ឆ្នាំ រស់នៅភូមិអូរម៉ាល់ ឃុំសំបួរ ស្រុកក្រឡាញ់ ខេត្តសៀមរាប បញ្ជាក់ថា រូបគាត់និងកូនឈ្មោះ អៀង សុខ អាយុ ១៦ឆ្នាំ កាលពីព្រឹកថ្ងៃ១១ ខែកុម្ភៈ បាននាំទៅនេសាទត្រី (ឆក់ត្រី) នៅបឹងកំពីងបី។ មុនពេលចុះនេសាទ រូបគាត់បានយកម៉ូតូទៅទុកនៅចំណុចបឹងក្រឡកតូច ឋិតនៅភូមិអូរម៉ាល់លិច ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ។
សាក្សីក្នុងភូមិ ឈ្មោះ ឥត សម្បត្តិ បញ្ជាក់ថា ឪពុកនិងកូន លុះឆក់បានត្រីនៅវេលាម៉ោង ២ និង ៣០នាទី ក៏នាំគ្នាត្រឡប់មកវិញ។ មកដល់កន្លែងដាក់ម៉ូតូ ក៏ជួបនឹងប៉ូលិសម្នាក់និងមន្ត្រីសហគមន៍ដង្កៀបក្ដាមបីនាក់។ នៅគ្រានោះ មានប៉ូលិសម្នាក់បានចូលទៅចាប់កៀកក ឈ្មោះ អៀង សុខ អាយុ ១៦ឆ្នាំ ពីក្រោយ៖ «រយៈពេលគាត់ត្រឡប់មកផ្ទះវិញ គាត់មកដល់បឹងក្រឡកនោះស្រាប់ តែប៉ូលិសហ្នឹងចាប់ កូនគាត់សង្កត់ក្នុងដីទៅឪពុកទៅជួយ បន្ទាប់កូនប្រាសរត់ទៅផុតប្រហែល ១០ម៉ែត្រមានប៉ូលិសថា បាញ់។ បាញ់ត្រូវជើង ជើងខាងស្ដាំ ត្រូវពីលើធ្លាយមកចុងកែងជើងខាងឆ្វេងបែកអស់កូនជើង»។
របាយការណ៍របស់សមាគមអាដហុក បញ្ជាក់បន្ថែមថា មន្ត្រីប៉ូលិសឈ្មោះ អ៊ុយ ពេជ្រ ប្រាប់ឲ្យឈ្មោះ សឺ ម៉ុំ ឲ្យជាអ្នកបាញ់។ ឈ្មោះ សឺ ម៉ុំ ជាមន្ត្រីសហគមន៍ មានកាំភ្លើងនៅនឹងដៃ ក៏បាញ់ បណ្ដាលឲ្យត្រូវជើងដួល ហើយជនរងគ្រោះខំប្រឹងងើបរត់គេចខ្លួន។ ចំណែកឯលោក ហាត អៀង ត្រូវបានគេនាំគាត់ដល់ពាក់កណ្ដាលផ្លូវក៏ដោះលែងវិញ។ សមត្ថកិច្ចប៉ូលិស និងមន្ត្រីសហគមន៍ក្រោយមករឹបអូសឧបករណ៍ឆក់ត្រីចំនួនពីគ្រឿង អាគុយ ១ និងម៉ូតូសេ១០០ ចាស់ មួយគ្រឿង យកទៅរក្សាទុកនៅកន្លែងប៉ុស្តិ៍ប៉ូលិសឃុំប្រាសាទ។
ជនរងគ្រោះ ឈ្មោះ អៀង សុខ បានរត់ទៅជួបអ្នកភូមិ ហើយត្រូវគេយកម៉ូតូឌុបយកទៅផ្ទះ។ ដោយមានរបួសហូរឈាមខ្លាំងពេកក៏បញ្ជូនទៅមន្ទីរពេទ្យស្រុកក្រឡាញ់។ នៅពេលនោះ មន្ទីរពេទ្យបង្អែកស្រុកក្រឡាញ់ មិនអាចជួយបានដោយសារត្រូវគ្រាប់កាំភ្លើងចំប្រអប់ជើងខាងស្ដាំធ្លុះទៅក្រោម និង កំភួនជើងឆ្វេងមានរបួសរហែកចេញដល់ឆ្អឹងធ្ងន់ធ្ងរពេក ក៏បញ្ជូនទៅព្យាបាលនៅមន្ទីរពេទ្យខេត្តសៀមរាប។
បងថ្លៃជនរងគ្រោះឈ្មោះ ផៃ ជា អាយុ ២៥ឆ្នាំថ្លែងថា ប្អូនប្រុសគាត់រងរបួសធ្ងន់កំពុងដេកព្យាបាលនៅមន្ទីរពេទ្យនៅឡើយ៖ «ត្រូវសងខាងប្រអប់ជើងទាំងសងខាង ជើងខាងស្តាំធ្លុះ ជើងខាងឆ្វេងរយះពីជង្គង់មកមុខដល់កំភួនជើងត្រូវគ្រាប់ទាំងពីរ ពេលមកវិញគេទាញទម្លាក់ពីលើម៉ូតូច្របាច់កទាំងឪនិងកូន។ កូនរើរួចរត់ទៅគេបាញ់ ឪពុកគេអត់បាញ់ទេ គាត់ចាស់ អត់មានកម្លាំងដល់ក្មេង វាភ័យ វារើរត់»។
លោក ស៊ុំ ចន្ទគា ដែលបានជួបសួរនាំមន្ត្រីប៉ូលិសថ្លែងថា មន្ត្រីប៉ូលិសឈ្មោះ អ៊ុយ ពេជ្រ បានបដិសេធថា ខ្លួនគ្រាន់តែប្រតាយប្រតប់ជាមួយជនរងគ្រោះ ប៉ុន្តែអ្នកបាញ់គឺមន្ត្រីសហគមន៍ជាបាញ់។ ការបាញ់នោះ គឺបាញ់ដោយកាំភ្លើងអាកាបត់មួយគ្រាប់ផ្ចុចទៅលើដីដើម្បីការពារខ្លួន ប៉ុន្តែក្រុមអ្នកភូមិដែលឮសូរកាំភ្លើងនិយាយថា មានការបាញ់ចំនួនបីក្រាប់៖ «ប៉ូលិសទៅចាប់នោះអត់បានប្រើកាំភ្លើងទេ ឲ្យសហគមន៍ប្រើ។ បញ្ហាហ្នឹងមិនត្រូវបញ្ជាឲ្យគេបាញ់ទៅលើជនរងគ្រោះទេ ព្រោះថា បើសិនកិច្ចការពារស្របច្បាប់ណាមួយលុះត្រាតែករណីនោះមិនអាចវិគ្រោះរាល់បទល្មើសបានដែលធ្វើប៉ះពាល់ដល់អាយុជីវិតរបស់ខ្លួន ប៉ុន្តែយើងមើលស្ថានភាពជនរងគ្រោះ ជនរងគ្រោះមានអាយុ ១៦ឆ្នាំ មានមាឌតូចស្គម គឺកើតជំងឺបេះដូង ហើយចាស់ទៀតមិនអាចតទល់ជាមួយប៉ូលិស ប៉ូលិសម្នាក់ក៏អាចធ្វើបានដែរ»។
ក្រុមអ្នកភូមិបញ្ជាក់ថា ជាធម្មតាមុនពេលពួកគាត់នាំគ្នាចុះទៅនេសាទត្រី ត្រូវតែបង់លុយឲ្យប៉ូលិសពី ១០ម៉ឺន ទៅ ៣០ម៉ឺនរៀល ទើបអាចឆក់ត្រីបាន។ ប៉ុន្តែសម្រាប់លោក ហាត អៀង នៅថ្ងៃនោះពុំបានបង់លុយទេ ដោយសារគាត់គិតថា ជាអ្នកភូមិឆ្ងាយ។ ក្រុមគ្រួសារជនរងគ្រោះអះអាងថា ពួកគេកំពុងរៀបចំពាក្យបណ្ដឹងលើករណីបាញ់ប្រហារកូនប្រុសរបស់គាត់នេះដាក់ទៅតុលាការខេត្តបន្ទាយមានជ័យ ក្នុងពេលឆាប់ៗខាងមុខ ដើម្បីទាមទាររកយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។