ពលរដ្ឋ​បន្ត​តវ៉ា​ឲ្យ​តុលាការ​ខេត្ត​កោះកុង​ដោះលែង​យុវជន​បរិស្ថាន​៣​នាក់

ដោយ ដែន អយុធ្យា
2015-08-21
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
កម្លាំង​អាជ្ញាធរ​ខេត្ត​កោះកុង ដាក់​របាំង​មិន​ឲ្យ​ពលរដ្ឋ​ដើរ​ឆ្លង​កាត់ ឬ​តវ៉ា​មុខ​តុលាការ ខណៈ​ពួក​គេ​ប្រមូល​ផ្ដុំ​គ្នា​តវ៉ា​ទាមទារ​ដោះលែង​សកម្មជន​បរិស្ថាន ៣​នាក់ នៅ​ថ្ងៃ​ទី​២១ សីហា ឆ្នាំ​២០១៥។
កម្លាំង​អាជ្ញាធរ​ខេត្ត​កោះកុង ដាក់​របាំង​មិន​ឲ្យ​ពលរដ្ឋ​ដើរ​ឆ្លង​កាត់ ឬ​តវ៉ា​មុខ​តុលាការ ខណៈ​ពួក​គេ​ប្រមូល​ផ្ដុំ​គ្នា​តវ៉ា​ទាមទារ​ដោះលែង​សកម្មជន​បរិស្ថាន ៣​នាក់ នៅ​ថ្ងៃ​ទី​២១ សីហា ឆ្នាំ​២០១៥។
Photo provided

ក្រុម​ប្រជាពលរដ្ឋ​ច្រើន​នាក់​មកពី​សហគមន៍​មួយ​ចំនួន​ក្នុង​ស្រុក​បុទុមសាគរ និង​ស្រុក​គីរីសាគរ ខេត្ត​កោះកុង បាន​បន្ត​ប្រមូល​ផ្តុំ​គ្នា​លើក​បដា​តវ៉ា​នៅ​ពី​មុខ​បរិវេណ​សាលាដំបូង​ខេត្ត​កោះកុង ចូល​មក​ដល់​ថ្ងៃ​ទី​៣ ហើយ ដើម្បី​ទាមទារ​ឲ្យ​ដោះលែង​សមាជិក​អង្គការ​ចលនា​មាតា​ធម្មជាតិ​ចំនួន ៣​នាក់ ដែល​ត្រូវ​តុលាការ​ខេត្ត​នេះ​ចាប់​ដាក់​ពន្ធនាគារ។

​ទន្ទឹម​គ្នា​នេះ អាជ្ញាធរ​ក្រុង​ខេមរភូមិន្ទ ក៏​បាន​ចេញ​បម្រាម​មិន​ឲ្យ​ប្រជាពលរដ្ឋ​ប្រមូល​ផ្តុំ​គ្នា​នៅ​តាម​ចិញ្ចើម​ផ្លូវ​សាធារណៈ​ទល់​មុខ​បរិវេណ​តុលាការ​ខេត្ត​កោះកុង និង​បាន​ដាក់​របាំង​មិន​ឲ្យ​មនុស្ស​ដើរ​ឆ្លង​កាត់​ទេ។ ប៉ុន្តែ​ក្រុម​ប្រជាពលរដ្ឋ​មិន​អនុវត្ត​តាម​ទៅ​តាម​បម្រាម​របស់​អាជ្ញាធរ​នោះ​ឡើយ។

មន្ត្រី​សម្រួល​អង្គការ​លីកាដូ ខេត្ត​កោះកុង លោក អ៊ិន គង់ជិត មាន​ប្រសាសន៍​ថា រហូត​មក​ដល់​ល្ងាច​ថ្ងៃ​សុក្រ ទី​២១ ខែ​សីហា ប្រជាពលរដ្ឋ​ប្រមាណ ៥០​នាក់ មិន​ទាន់​រំសាយ​ការ​តវ៉ា​ទាមទារ​ឲ្យ​តុលាការ​ដោះលែង​សមាជិក​អង្គការ​ចលនា​មាតា​ធម្មជាតិ​ទាំង ៣​នាក់​នោះ​ទេ ទោះបី​អាជ្ញាធរ​ក្រុង​ខេមរភូមិន្ទ បាន​ដាក់​បម្រាម និង​គំរាម​ឲ្យ​ចាកចេញ​ពី​មុខ​តុលាការ​ខេត្ត​នេះ​បែប​ណា​ក្តី។

លោក​បន្ត​ថា ក្រោយ​អាជ្ញាធរ​ក្រុង​ខេមរភូមិន្ទ បាន​ធ្វើ​ទុក្ខបុកម្នេញ និង​ដាក់​របាំង មិន​ឲ្យ​ប្រជាពលរដ្ឋ​ដើរ​ឆ្លង​កាត់​ពី​មុខ​តុលាការ ពួកគាត់​ក៏​បាន​ថយ​មក​សម្រាក​ក្នុង​រោង​វេទិកា​បាល់ទាត់​នៅ​ក្បែរ​បរិវេណ​របស់​តុលាការ​ខេត្ត​កោះកុង ប៉ុន្តែ​នៅ​បន្ត​ការ​ប្រមូល​ផ្តុំ​លើក​បដា​តវ៉ា​នៅ​មុខ​សាលា​ខេត្ត​ដដែល។

លោក អ៊ិន គង់ជិត បញ្ជាក់​ថា ក្រុម​ប្រជាពលរដ្ឋ​នឹង​បន្ត​ស្នាក់​នៅ​ក្នុង​វេទិកា​បាល់ទាត់​នៅ​មុខ​តុលាការ​ខេត្ត​កោះកុង ជា​បន្ត​ទៀត ទោះ​បី​អាជ្ញាធរ នៅ​ល្ងាច​ថ្ងៃ​សុក្រ ទី​២១ សីហា គំរាម​មិន​ឲ្យ​នាំ​យក​ទឹក និង​ម្ហូប​អាហារ​ចេញ​ចូល​ទៅ​កាន់​ទីតាំង​ប្រមូល​ផ្តុំ​បែប​ណា​ក្តី៖ «នៅ​ថ្ងៃ​នេះ អាជ្ញាធរ​បាន​ចាត់​វិធានការ​គ្រប់​បែប​យ៉ាង​មាន​ដូចជា បិទ​ច្រក​ចេញ​ចូល​ទៅ​កាន់​មុខ​ទីធ្លា​បរិវេណ​របស់​តុលាការ​សាលាដំបូង​ខេត្ត​កោះកុង ជា​ទីកន្លែង​ដែល​ប្រជាពលរដ្ឋ​ប្រមូល​ផ្តុំ និង​មិន​ឲ្យ​យក​ទឹក ឬ​អាហារ​ហូប​ចុក​ទៅ​កាន់​ទីតាំង​នោះ​ទេ។ ជាង​នេះ​អាជ្ញាធរ​ក៏​បាន​ហាម​ប្រជាពលរដ្ឋ​មាន​លំនៅឋាន​នៅ​ជិត​ខាង​នោះ មិន​ឲ្យ​ប្រើប្រាស់​បង្គន់​អនាម័យ​ជាដើម»

​បន្ថែម​លើ​នេះ ក្រុម​ប្រជាពលរដ្ឋ​ដែល​កំពុង​ប្រមូល​ផ្តុំ​គ្នា​លើក​បដា​ស្រែក​តវ៉ា​នៅ​ពីមុខ​តុលាការ​ខេត្ត​កោះកុង បាន​អះអាង​ថា នឹង​មិន​រំសាយ​ការ​ប្រមូល​ផ្តុំ​ទេ បើ​តុលាការ​មិន​ដោះលែង​សកម្មជន​ការពារ​បរិស្ថាន ៣​នាក់ ឲ្យ​មាន​សេរីភាព និង​មិន​ទម្លាក់​ចោល​ការ​ចោទ​ប្រកាន់​ទេ៖ «ខ្ញុំ​មក​តវ៉ា​ឲ្យ​តុលាការ​ដោះលែង​យុវជន​ការពារ​បរិស្ថាន​ទាំង ៣​នាក់​ចេញ​ពី​ពន្ធនាគារ​ឲ្យ​មាន​សេរីភាព​វិញ ព្រោះ​យុវជន​ទាំង ៣​នាក់​គ្មាន​កំហុស​ទេ»

តវ៉ា​ដោះលែង យុវជន កោះកុង ៦២០
ពលរដ្ឋ​លើក​បដា​​តវ៉ា​ទាមទារ​ឲ្យ​តុលាការ​ខេត្ត​កោះកុង ដោះលែង​សកម្មជន​បរិស្ថាន ៣​នាក់ នៅ​ថ្ងៃ​ទី​២១ សីហា ឆ្នាំ​២០១៥។ Licadho Licadho

 

ទាក់ទិន​បញ្ហា​នេះ លោក ប៉ែន ប៊ុនឈួយ អភិបាល​រង​ក្រុង​ខេមរភូមិន្ទ កាល​ពី​ថ្ងៃ​ទី​២០ ខែ​សីហា បាន​ចេញ​សេចក្ដី​ជូន​ដំណឹង​ចំនួន ៥​ចំណុច ដល់​ប្រជាពលរដ្ឋ​ដែល​បាន​ប្រមូល​ផ្តុំ​គ្នា​នៅ​លើ​ចិញ្ចើម​ផ្លូវ​សាធារណៈ មុខ​សាលាដំបូង​ខេត្ត​កោះកុង។ ខ្លឹមសារ ៥​ចំណុច ក្នុង​លិខិត​នោះ បាន​តម្រូវ​ឲ្យ​ពលរដ្ឋ​ធ្វើ​សកម្មភាព​ឲ្យ​ស្រប​តាម​ច្បាប់។ រាល់​ការ​ដើរ​ហែ​ក្បួន ឬ​ប្រមូល​ផ្តុំ​ណា​មួយ​ត្រូវ​ធ្វើ​លិខិត​សុំ​ការ​អនុញ្ញាត​ច្បាប់​ពី​អាជ្ញាធរ​ជាមុន​យ៉ាង​តិច ២​ថ្ងៃ។ ហាម​ការ​ចង​តង់​ដាំបាយ ឬ​ធ្វើ​ម្ហូប​អាហារ​ផ្សេងៗ នៅ​ទីកន្លែង​ស្នាក់​នៅ។ ត្រូវ​ប្រមូល​ផ្តុំ​គ្នា​នៅ​ក្នុង​វេទិកា​បាល់ទាត់​ខេត្ត​ទៅ​តាម​ការ​កំណត់​របស់​អាជ្ញាធរ និង​ត្រូវ​រំសាយ​ការ​ប្រមូល​ផ្តុំ​ចាប់​ពី​ថ្ងៃ​ជូន​ដំណឹង​នេះ។

ទោះ​ជា​បែប​នេះ​ក្តី គិត​មក​ដល់​ម៉ោង​ជាង ៥​ល្ងាច ថ្ងៃ​ស្រុក ទី​២១ ខែ​សីហា ក្រុម​ប្រជាពលរដ្ឋ​នៅ​តាម​សហគមន៍​ស្រុក​គីរីសាគរ និង​បុទុមសាគរ ជាដើម នៅ​តែ​បន្ត​លើក​បដា និង​ស្រែក​ទាមទារ​ឲ្យ​ដោះលែង​យុវជន​ការពារ​បរិស្ថាន​ទាំង ៣​នាក់​ដដែល។

លោក ប៊ុន លឺត អភិបាល​ខេត្ត​កោះកុង មិន​ធ្វើ​អត្ថាធិប្បាយ​ជុំវិញ​ការ​ប្រមូល​ផ្តុំ​របស់​ប្រជាពលរដ្ឋ​នៅ​មុខ​តុលាការ​ខេត្ត​ទេ ដោយ​ចាត់​ទុក​ជា​រឿង​របស់​តុលាការ​ត្រូវ​ដោះស្រាយ៖ ​«ជា​រឿង​របស់​តុលាការ ខ្ញុំ​មិន​ពាក់​ព័ន្ធ​ទេ​រឿង​ហ្នឹង»

​មន្ត្រី​ឃ្លាំមើល​សិទ្ធិមនុស្ស​ខេត្ត​កោះកុង បាន​ចាត់​ទុក​ការ​ចាប់​ខ្លួន និង​ឃុំខ្លួន​សកម្មជន​ការពារ​ធនធាន​ធម្មជាតិ​ទាំង ៣​នាក់ របស់​តុលាការ​ខេត្ត​នេះ ទៅ​តាម​ពាក្យ​បណ្ដឹង​របស់​អាជ្ញាធរ និង​ក្រុមហ៊ុន​បូម​ខ្សាច់ ថា​ជា​ការ​បំបាក់​ស្មារតី​សកម្មជន​បរិស្ថាន​ឲ្យ​បញ្ឈប់​សកម្មភាព​តវ៉ា។

សកម្មជន​ការពារ​បរិស្ថាន​នៃ​អង្គការ​ចលនា​មាតា​ធម្មជាតិ ចំនួន ៣​នាក់ ដែល​តុលាការ​ខេត្ត​កោះកុង ចាប់​ដាក់​ពន្ធនាគារ មាន​ឈ្មោះ លោក សាន់ ម៉ាឡា លោក ទ្រី សុវិគា និង​លោក ស៊ឹម សំណាង។ យុវជន​ទាំង ៣​នាក់ ត្រូវ​សមត្ថកិច្ច​ខេត្ត​កោះកុង ចាប់​ខ្លួន ខណៈ​ដែល​ពួកគេ​ចុះ​ធ្វើ​ការ​នៅ​ក្នុង​សហគមន៍​ប្រជាពលរដ្ឋ ក្នុង​ភូមិ​ធ្នង់ ឃុំ​កណ្ដោល និង​នៅ​ភូមិ​តាមាឃ ឃុំ​អណ្ដូងទឹក ស្រុក​បុទុមសាគរ កាល​ពី​ថ្ងៃ​ទី​១៧ ខែ​សីហា ដើម្បី​ប្រឆាំង​សកម្មភាព​បូម​ខ្សាច់​របស់​ក្រុមហ៊ុន។

យុវជន​ទាំង ៣​នាក់ ត្រូវ​តុលាការ​ខេត្ត​នេះ ចោទ​ពី​បទ​គំរាមកំហែង និង​ធ្វើ​ឲ្យ​ខូចខាត ដែល​ភ្ជាប់​នូវ​បញ្ជា​អ្វី​មួយ​តាម​មាត្រា​៤២៤ នៃ​ក្រមព្រហ្មទណ្ឌ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

តាមរដ្ឋធម្មនុញ្ញ ព្រះរាជាណាចក្រកម្ពុជា​ ជាប្រទេស
កាន់លទ្ធិប្រជាធិបតេយ្យពហុបក្ស គ្រប់គ្រងដោយ
ស្ថាប័ន៣ដាច់ដោយឡែកពីគ្នា គឺ និតិបញ្ញត្តិ(រដ្ឋស
ភា) និតិប្រតិបត្តិ(រដ្ឋាភិបាល) និងតុលាការ ។
យើងសង្ឃឹមនិងមានជំនឿមុតមាំថាចៅក្រមនៅខេត្ត
កោះកុងនឹងមានមោទនភាពដើម្បីបំពេញភារកិច្ចរបស់លោកដោយមិនស្ថិតនៅក្រោមឥទ្ធិពលអ្នកណា
ឡើយ ៕

Aug 21, 2015 10:32 PM

គេហទំព័រ​ទាំងមូល