ក្រុមអង្គការមិនមែនរដ្ឋាភិបាលធ្វើការងារលើកស្ទួយស្ត្រីក្នុងវិស័យនយោបាយស្នើគណបក្សនយោបាយដែលមានសំឡេងក្នុងសភាកែប្រែចំណុចមួយចំនួននៃមាត្រាខ្លះក្នុងរដ្ឋធម្មនុញ្ញ និងច្បាប់បោះឆ្នោត ដែលរំពឹងថា នឹងជួយអោយចំនួនស្ត្រីក្នុងវិស័យនយោបាយបានកើនឡើង ស្របតាមគោលនយោបាយរដ្ឋាភិបាល និងបទដ្ឋានអន្តរជាតិនានា។
ការស្នើនេះធ្វើឡើងនៅក្នុងសន្និសីទសារព័ត៌មានមួយស្ដីពីអនុសាសន៍របស់ស្ត្រីនៃក្រុមអង្គការសង្គមស៊ីវិលលើការធានាអោយបានសមភាពយេនឌ័រ ក្នុងវិស័យនយោបាយ នៅព្រឹកថ្ងៃទី២៧ ខែសីហា។
នាយិកាអង្គការសីលកា និងជាប្រធានគណៈកម្មាធិការលើកស្ទួយស្ត្រីក្នុងវិស័យនយោបាយ អ្នកស្រី ធីតា ឃិះ មានប្រសាសន៍ថា អនុសាសន៍ដែលក្រុមអង្គការស្ត្រីស្នើគឺជាវិធានការពិសេសដែលអាចធានាថា ចំនួនតំណាងជាស្ត្រីរាប់តាំងពីក្នុងស្ថាប័ននីតិប្បញ្ញត្តិ ក្បាលម៉ាស៊ីនដឹកនាំរដ្ឋាភិបាលរហូតដល់ក្រុមប្រឹក្សាឃុំ សង្កាត់ នឹងមានការកើនឡើង។ ចំណុចសំខាន់បំផុតគឺការកែប្រែច្បាប់បោះឆ្នោតត្រង់មាត្រា ៣៨ថ្មីនៃច្បាប់បោះឆ្នោត ដែលគួរបង្កើតអោយមានបញ្ជីឈ្មោះបេក្ខជនឆ្លាស់គ្នារវាងបុរស និងស្ត្រីតាមលំដាប់អាទិភាពពីខ្ពស់មកទាប។
អ្នកស្រី ធីតា ឃិះ. «ពីព្រោះជាការលើកតម្កើងគោលការណ៍សមភាព សមធម៌ពិតប្រាកដ ដែលនឹងនាំមកនូវលទ្ធផលជាក់ស្ដែងនៅពេលណាដែលនឹងនាំកលនូវលទ្ធផលជាក់ស្ដែងក្នុងពេលបោះឆ្នោតហើយមិនមែនគ្រាន់តែថា មិនមែនគ្រាន់តែលើបបូរមាត់មិនមែនគ្រាន់តែនៅលើក្រដាស ក៏ប៉ុន្តែគឺជាការងារជាក់ស្ដែង ពីព្រោះបើយើងគ្រាន់តែនិយាយថា ស្ត្រីបុរសមានសិទ្ធិស្មើគ្នា ប៉ុន្តែស្ត្រីចុងបញ្ចប់អត់បានទទួលសិទ្ធិ ដោយគាត់អត់បានជាតំណាងដោយសារឧបសគ្គជាច្រើន ហើយដោយសារប្រព័ន្ធ ដោយសាររចនាសម្ព័ន្ធគឺបានជាការរាំងស្ទះដល់ស្ត្រី»។
ក្រុមអង្គការសង្គមស៊ីវិលបញ្ជាក់ថា នឹងដាក់សំណើនេះទៅគណបក្សនយោបាយនៅសប្ដាហ៍ក្រោយ។ ប្រសិនបើពុំមានការឆ្លើយតបនោះពួកគេអាចនឹងរៀបចំអោយមានការប្រជុំរវាងម្ចាស់ឆ្នោត និងគណបក្សនយោបាយ នឹងឈានដល់ការប្រមូលផ្ដុំជាការតវ៉ារបស់ម្ចាស់ឆ្នោតជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។