អាជ្ញាធរខេត្តកោះកុងដោះលែងអ្នកកាសែតក្នុងស្រុកម្នាក់

ដោយ សារី រ័ត្ន

2008-05-16

អ្នកយកព័ត៌មាននៃកាសែតសំឡេងនិស្សិតបញ្ញវ័ន្តប្រចាំស្រុកស្រែអំបិល ខែត្រកោះកុង ដែលត្រូវបានចាប់ខ្លួនកាលពីថ្ងៃទី៣០ មេសានោះ ឥឡូវបានដោះលែងឲ្យរួចខ្លួន កាលពីថ្ងៃទី១៥ ឧសភាម្សិលមិញនេះ ។

លោក មាស អាស៊ី អ្នកកាសែតនៃសារព័ត៌មានសំឡេងនិស្សិតបញ្ញវ័ន្តខ្មែរដែលត្រូវគេចោទប្រកាន់ថា បានបំផ្លិចបំផ្លាញទ្រព្យសម្បត្តិអ្នកដទៃ ដោយគ្រាន់តែលោកបានថតរូបភាពនៃការតវ៉ារបស់ពលរដ្ឋពីសកម្មភាពទំនាស់ដី ។

លោក មាស អាស៊ី ត្រូវបានម្ចាស់ដីចោទថា លោកជាមេដឹកនាំនៃការប្រឆាំងតវ៉ា ហើយបានប្តឹងឲ្យប៉ូលិសស្រុកចាប់ ហើយថែមទាំងវាយធ្វើបាបនៅពេលដែលលោកជិះឡានជាមួយអ្នកស្រុកដែលជាអ្នកតំណាងពលរដ្ឋចំនួន ៧៥គ្រួសារដើម្បីមកតវ៉ានៅភ្នំពេញមួយថ្ងៃក្រោយមក ។

លោក មាស អាស៊ី បានថ្លែងក្រោយពេលត្រូវដោះលែងពីពន្ធនាគារ ៖ «គេដោះលែងតាំងពីថ្ងៃម្សិលមក ។ ហើយខ្ញុំចូលទៅថតរូបក្នុងនាមអ្នកសារព័ត៌មានអ៊ីចឹងគេចោទថាយើងចូលរួមបំផ្លិចបំផ្លាញតែម្ដង ។ គេចាប់ខ្ញុំហើយ ចាប់ភ្លាមតាមច្បាប់គេ គេទុកដាក់ ២៤ម៉ោង ប៉ុន្តែខ្ញុំគេចាប់បានគេបញ្ជូនទៅភ្លាមតែម្ដង ពេលបញ្ជូនទៅដល់ក៏គេយកញាត់គុកតែម្ដង ។ គេចោទយើងពីករណីបំផ្លិចបំផ្លាញទ្រព្យរបស់អ្នកដទៃ ហើយម្សិលមិញក៏ប្រពន្ធខ្ញុំយកឯកសារទាំងអស់ ដីធ្លី ៧៥ហ្នឹងជូនទៅដល់សម្ដេច សម្ដេចបញ្ជាឲ្យខេត្តដោះលែងខ្ញុំមកតែម្ដង» ។

សូមជម្រាបថា ក្រោយពេលចាប់ខ្លួននិងត្រូវគេវាយឲ្យសន្លប់កាលពីថ្ងៃទី៣០ មេសា លោក មាស អាស៊ី ត្រូវគេដាក់ឃុំនិងមិនអនុញ្ញាតឲ្យសាច់ញាតិចូលជួបឡើយ ។

ប្រពន្ធលោក មាស អាស៊ី ឈ្មោះ ស្លែស ម៉ាស់ បានទៅប្តឹងក្រសួងព័ត៌មាន និងខុទ្ទកាល័យលោកនាយករដ្ឋមន្ត្រី ហ៊ុន សែន និងសមាគមកាសែតនានា ឲ្យជួយអន្តរាគមន៍ព្រោះខ្លាចគេធ្វើបាបដល់អាយុជីវិត ព្រោះអ្នកប្តឹងជាម្ចាស់ដីអាងអំណាច ។

ករណីលោក មាស អាស៊ី នេះ បានត្រូវសហព័ន្ធអ្នកកាសែតអន្តរជាតិ បានចេញសេចក្តីថ្លែងការណ៏សុំឲ្យមានការដោះលែងផងដែរ ហើយខុទ្ទកាល័យលោកនាយករដ្ឋមន្ត្រីក៏បានបញ្ជាឲ្យមានការពិនិត្យឲ្យបានដិតដល់ផងដែរ ៕

បោះពុម្ព អ៊ីម៉េល