រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ ព្រមានចាត់វិធានការចំពោះក្រុមហ៊ុនបញ្ជូនពលករខ្មែរទៅធ្វើការនៅក្រៅប្រទេស។ ការព្រមាននោះធ្វើឡើងក្នុងពេលដែលតំណាងក្រុមហ៊ុននាំពលករទៅធ្វើការនៅក្រៅប្រទេសប្រមាណ ៤០ក្រុមហ៊ុន បានជួបប្រជុំគ្នានៅក្នុងវគ្គសិក្ខាសាលាមួយនៅព្រឹកថ្ងៃទី២៥ ខែមីនា ដើម្បីស្វែងយល់ពីបទដ្ឋានច្បាប់នានា ពាក់ព័ន្ធដល់ការបញ្ជូនពលករខ្មែរទៅក្រៅប្រទេស។
រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ គ្រោងនឹងបង្កើតអោយមានក្រុមអធិការកិច្ចការងារដែលនឹងចុះត្រួតពិនិត្យការអនុវត្តច្បាប់របស់ក្រុមហ៊ុននាំពលករខ្មែរទៅធ្វើការនៅក្រៅប្រទេស។
លោក អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ មានប្រសាសន៍ថា ការបង្កើតអធិការកិច្ចនឹងធានាទប់ស្កាត់បញ្ហាមួយចំនួន ដែលកើតឡើងដោយសារក្រុមហ៊ុនដែលខ្វះវិជ្ជាជីវៈពិតប្រាកដ។
លោក អ៊ិត សំហេង បន្តថា បញ្ហាទាំងនោះរួមមានការបើកក្រុមហ៊ុន ដើម្បីបើកផ្លូវអោយអ្នកម៉ៅតូចៗរត់ការបន្ត ដែលអាចនឹងឈានដល់ការបោកប្រាស់ពលករជាដើម។ ស្របគ្នានេះប្រសិនបើក្រុមហ៊ុនណាមួយធ្វើមិនត្រឹមត្រូវតាមច្បាប់ ក្រសួងនឹងដាក់ទណ្ឌកម្មទៅក្រុមហ៊ុននោះ៖ «កាលណាក្រុមហ៊ុននាំពលករហើយធ្វើមិនបានត្រឹមត្រូវ ឬមួយក៏បង្កអោយមានភាពរងគ្រោះទៅដល់ពលករ ក្រសួងនឹងដាក់ទណ្ឌកម្មទៅលើក្រុមហ៊ុននោះតាំងពីការដកអាជ្ញាប័ណ្ណ ក៏ដូចជាចាត់វិធានការតាមច្បាប់»។
លោក អ៊ិត សំហេង ពុំបានបញ្ជាក់អោយបានច្បាស់លាស់ទេថា តើការចុះអធិការកិច្ចនឹងចាប់ផ្ដើមនៅពេលណា ហើយក៏បានស្នើអោយក្រុមហ៊ុនដែលនាំពលករទៅក្រៅប្រទេសត្រូវចូលជាសមាជិកសមាគមទីភ្នាក់ងារជ្រើសរើសពលករកម្ពុជា ហៅកាត់ថា អាក្រា (ACRA) ដែលក្រសួងបានទទួលស្គាល់។
តំណាងក្រុមហ៊ុន ថប មែនផៅវ័រ (Top Manpower Co., Ltd) លោក អន ប៊ុនហាក់ មានប្រសាសន៍ថា ក្រុមហ៊ុនសង្ឃឹមថា វិធីសាស្ត្រថ្មីនេះនឹងជួយសម្រួលការងារគ្រប់ភាគី ហើយក្រុមហ៊ុនបានត្រៀមខ្លួនរួចរាល់ហើយដែរ៖ «ចំពោះក្រុមហ៊ុនយើងពុំមានការព្រួយបារម្ភអីទេ ពីព្រោះយើងបានត្រៀមលក្ខណៈរួចរាល់ហើយក្នុងការសុំអាជ្ញាប័ណ្ណប្រកបនូវវិជ្ជាជីវៈក្នុងការផ្ដល់នូវសេវាកម្មនេះ។ យើងគិតថា វាជាចំណុចមួយល្អ ហើយចំណុចនេះគួរតែចាប់ផ្ដើមធ្វើអោយបានរហ័ស»។
មន្ត្រីកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក ហ៊ុយ ពេជ្រសុវណ្ណ ថ្លែងសាទរចំពោះផែនការរបស់ក្រសួងការងារ ប៉ុន្តែបានស្នើអោយក្រសួងគួរតែចាប់ផ្ដើមបំពេញការងារអោយបានត្រឹមត្រូវជាជាងមានតែការសន្យា៖ «យើងរង់ចាំមើលវិធានការរបស់គាត់ ពីព្រោះមានមន្ត្រីរដ្ឋាភិបាលច្រើនណាស់ ដែលគាត់តែងតែនិយាយថា រដ្ឋាភិបាល ឬក្រសួងនឹងធ្វើនេះនឹងធ្វើនោះ ប៉ុន្តែកន្លងមកឃើញថា ច្រើនតែនិយាយ យើងអត់សូវបានឃើញសាច់ការ មិនសូវបានឃើញការអនុវត្តជាក់ស្ដែង។ ប្រសិនបើជាមានដូចប្រសាសន៍របស់លោកនាយករដ្ឋមន្ត្រីមែន យើងស្វាគមន៍ យើងនឹងរៀបចំសហការជាមួយក្រសួងដែរ»។
តួលេខពីក្រសួងការងារនិងបណ្ដុះបណ្ដាលវិជ្ជាជីវៈ អោយដឹងថា នៅកម្ពុជាមានក្រុមហ៊ុនចំនួន ៤៣ កំពុងផ្ដល់សេវាកម្មជាភ្នាក់ងារបញ្ជូនពលករខ្មែរទៅធ្វើការនៅក្រៅប្រទេស។ មកដល់ពេលនេះមានពលករខ្មែរចំនួន ១៧ម៉ឺននាក់កំពុងធ្វើការនៅក្រៅប្រទេសមួយចំនួន ក្នុងនោះរួមមាន ប្រទេសថៃ កូរ៉េ ជប៉ុន និងម៉ាឡេស៊ីជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។