នាយកសមាគមសិល្បៈ ចាវ៉ា អាត (Java Art) លោកស្រី ដាណា ឡេនឃ្វីស (Dana Langlois) បានឲ្យលោក ឱម ឧត្ដម អ្នកយកព័ត៌មានវិទ្យុអាស៊ីសេរីដឹង នៅថ្ងៃទី៣១ ខែសីហា ថា មានសមាគម និងអង្គការក្រៅរដ្ឋាភិបាលចំនួន ១០ ដែលនឹងដាក់តាំងបង្ហាញស្នាដៃសិល្បៈរបស់ខ្លួន នៅខែកញ្ញា ឆ្នាំ២០១០នេះ។
លោកស្រី ដាណា ឡេនឃ្វីស បានថ្លែងបន្តថា ការដាក់តាំងបង្ហាញស្នាដៃសិល្បៈរបស់សមាគម និងអង្គការទាំងនោះ គឺធ្វើឡើងនៅក្នុងឱកាស ទិវាទីក្រុងយើង ដែលជាពិធីបុណ្យមួយដែលតែងតែរៀបចំធ្វើជារៀងរាល់ឆ្នាំ។
លោកស្រី ដាណា ឡេនឃ្វីស នាយកសមាគមសិល្បៈ ចាវ៉ា អាត ឲ្យដឹងទៀតថា ទិវាទីក្រុងយើង ដែលបានចាប់ផ្ដើមប្រារព្ធធ្វើដំបូង នៅឆ្នាំ២០០៨មកនោះ គឺក្នុងគោលបំណងបង្ហាញអំពីការអភិវឌ្ឍរាជធានីភ្នំពេញ នៅក្នុងពេលបច្ចុប្បន្ននេះ៕