មន្ត្រីក្រសួងមហាផ្ទៃ៖ ករណីជួញដូរស្ត្រីនិងកុមារមានការថយចុះ

ដោយ មុំ សុផុន

2008-07-06

មន្ត្រីក្រសួងមហាផ្ទៃ បានមានប្រសាសន៍នៅថ្ងៃសៅរ៍ ៥ កក្កដានេះថា ការជួញដូរស្ត្រីនិងកុមារក្នុងរយៈពេល ៦ខែ ដើមឆ្នាំ២០០៨នេះ មានការថយចុះបើប្រៀបធៀបទៅនឹងចំនួនករណី ដែលកើតមានក្នុងរយៈពេលដូចគ្នា នាឆ្នាំ២០០៧ ។

លោក ប៊ិត គឹមហុង ប្រធាននាយកដ្ឋានប្រឆាំងការជួញដូរមនុស្សនៃក្រសួងមហាផ្ទៃ បានមានប្រសាសន៍បញ្ជាក់ថា ការធ្លាក់ចុះនេះគឺដោយសារកិច្ចខិតខំប្រឹងប្រែងរបស់ក្រុមនគរបាលនិងមន្ត្រីដែលពាក់ព័ន្ធក្នុងការបង្ក្រាបនិងការអនុវត្តច្បាប់ ។

លោក ប៊ិត គឹមហុង មានប្រសាសន៍ថា ៖ «ថយចុះ គឺទីមួយ ដោយសារការខិតខំប្រឹងប្រែងរបស់យើងក្នុងការទប់ស្កាត់ ហើយទីពីរគឺដោយសារកិច្ចប្រតិបត្តិការរបស់យើងធ្វើសកម្មភាពខ្លាំង ទីបី ដោយសារការផ្ដន្ទាទោសបានអនុវត្តត្រឹមត្រូវតាមច្បាប់ ។ ខ្ញុំសង្ឃឹមថា នឹងថយចុះទៀតដោយសារការខិតខំប្រឹងប្រែងរបស់ក្រុមការងារថ្នាក់ជាតិចង្អុលដឹកនាំដល់សមត្ថកិច្ចគ្រប់ជាន់ថ្នាក់» ។

មន្ត្រីអង្គការក្រៅរដ្ឋាភិបាល ដែលបំពេញការងារទាក់ទងនឹងការទប់ស្កាត់ការជួញដូរស្ត្រីនិងកុមារ បានទទួលស្គាល់ថា ថ្មីៗនេះ មានការបង្រ្កាបនិងកាត់ទោសករណីជាច្រើន ដែលទាក់ទងនឹងការជួញដូរមនុស្ស ៕

បោះពុម្ព អ៊ីម៉េល