កម្ពុជានឹងចូលរួមក្នុងប្រព័ន្ធត្រៀមបម្រុងរបស់អ.ស.ប., លក់អង្ករឲ្យប្រទេសហ្គីណេ ១២ម៉ឺនតោន

ដោយ ម៉ៅ សុធានី

2008-06-19

កម្ពុជាបានសម្រេចចិត្តចូលរួមក្នុងប្រព័ន្ធត្រៀមបម្រុងរបស់អង្គការសហប្រជាជាតិ (អ.ស.ប.) ដើម្បីទទួលភារកិច្ចធ្វើការដោះមីននិងសាងសង់ ។

ប្រសាសន៍អះអាងរបស់លោកនាយករដ្ឋមន្រ្តី ហ៊ុន សែន នេះ បានធ្វើឡើងក្នុងឱកាសបើកឲ្យប្រើប្រាស់ជាផ្លូវការនូវស្ពានគុណគ្រូ ស្ពានត្រពាំងខ្យង និងផ្លូវលេខ៤១ ផ្លូវអង្គមេត្រី ផ្លូវលេខ៤១ ពីថ្នល់ទទឹងទៅផ្លូវជាតិលេខ៣ ក្នុងពិធីដែលប្រារព្ធធ្វើនៅគល់ស្ពានគុណគ្រូ ក្នុងខេត្តកំពង់ស្ពឺ កាលពីព្រឹកថ្ងៃទី១៨ ខែមិថុនា ម្សិលមិញនេះ ។

លោកនាយករដ្ឋមន្ត្រី ហ៊ុន សែន បានថ្លែងថា លោកបានសម្រេចដាក់ទាហាន ៥០០នាក់ ត្រៀមសម្រាប់ចូលរួមប្រព័ន្ធត្រៀមបម្រុងរបស់អ.ស.ប. តែមិនមែនជាទាហានស៊ីឈ្នួលធ្វើសង្គ្រាមនោះទេ ៖ «ខ្ញុំព្រះករុណាខ្ញុំបានសម្រេចចិត្តក្នុងរយៈកាលពីរសប្ដាហ៍នេះ លើចំណុចទាក់ទិននឹងគោលនយោបាយការបរទេសរបស់យើង ។ ទីមួយ ក្រៅពីបន្តបញ្ជូនកម្លាំងទៅផ្លាស់វេននៅប្រទេសស៊ូដង់ យើងសម្រេចចិត្តនឹងចូលរួមក្នុងប្រព័ន្ធត្រៀមបម្រុងរបស់អង្គការសហប្រជាជាតិ ដែលកម្លាំងរៀបរយប្រមាណ ៥០០នាក់ ត្រៀមបម្រុងទុកក្នុងដៃ នៅពេលដែលអង្គការសហប្រជាជាតិត្រូវការឲ្យយើងបញ្ជូនទៅប្រទេសណាមួយ ដែលយើងយល់ថា គួរបញ្ជូនទៅ មិនមែនជាទាហានស៊ីឈ្នួលច្បាំងនោះទេ យើងទៅធ្វើត្រឹមតែជាអ្នកដោះមីន ឬក៏ជាអ្នកសាងសង់ យើងអាចទៅខាងផ្នែកសាងសង់ ព្រោះដោះមីននិងសាងសង់ ខាងវិស្វកម្មមានជំនាញហ្នឹង ចូលទៅក្នុងប្រព័ន្ធនៃការបម្រុងទុករបស់អង្គការសហប្រជាជាតិ» ។

ក្រៅពីនេះ លោកនាយករដ្ឋមន្ត្រីខ្មែរក៏បានថ្លែងឲ្យដឹងថែមទៀតថា កម្ពុជានឹងលក់អង្ករឲ្យប្រទេសហ្គីណេ នៅទ្វីបអាហ្វ្រិក ចំនួន ១២ម៉ឺនតោន ព្រមទាំង នឹងផ្តល់ទីប្រឹក្សាខាងបច្ចេកទេសដាំស្រូវដល់ប្រទេសនេះផង តាមការស្នើសុំរបស់លោកនាយករដ្ឋមន្ត្រី ហ្គីណេ ។

លោក ហ៊ុន សែន មានប្រសាសន៍ថា កម្ពុជានឹងបញ្ជូនអ្នកជំនាញការខ្មែរ ខាងកសិកម្ម ដែលចេះនិយាយភាសាបារាំង ហើយបើបានចេះទាំងភាសាបារាំង ទាំងអង់គ្លេសផង កាន់តែប្រសើរ ។

លោកថា បើសិនជាចាំបាច់ ត្រូវចំណាយប្រាក់គាំទ្រកម្មវិធីនេះ ដោយកម្ពុជាខ្លួនឯង ក៏រដ្ឋាភិបាលលោកយល់ព្រមដែរ ៖ «ទោះបីត្រូវរ៉ាប់រងការចំណាយសម្រាប់ទីប្រឹក្សារបស់យើងដោយខ្លួនឯង ក៏យើងត្រូវបញ្ជូនទៅប្រទេសហ្គីណេ នេះជាតួនាទីអន្តរជាតិរបស់កម្ពុជាដែលត្រូវធ្វើក្នុងគោលនយោបាយការបរទេសទៅទ្វីបអាហ្រ្វិកតែម្ដង» ។

សូមរំឭកថា កាលពីថ្ងៃអាទិត្យទី៨ ដើមខែមិថុនា កន្លងមកនេះ កម្ពុជាទើបនឹងបានបញ្ជូនក្រុមអ្នកបោសសម្អាតមីនទៅកាន់ប្រទេសស៊ូដង់ ជាលើកទី៣ ដើម្បីចូលរួមចំណែកក្នុងបេសកកម្មរក្សាសន្តិសុខនៃអង្គការសហប្រជាជាតិ ៕

បោះពុម្ព អ៊ីម៉េល