ការកោះអញ្ជើញមន្ត្រីរដ្ឋាភិបាលរបស់គណៈកម្មការទី១ និងគណៈកម្មការទី១០ នៃរដ្ឋសភា មកឆ្លើយបំភ្លឺនៅក្នុងខែឧសភា នេះ មិនបានជោគជ័យឡើយ។ បញ្ហានេះ ភាគីទាំងពីរមានហេតុផលសំអាងរៀងៗខ្លួន ដោយមួយផ្អែកទៅលើនីតិវិធីនៃបទបញ្ជាផ្ទៃក្នុងនៃរដ្ឋសភា និងម្ខាងទៀតសំអាងលើមាត្រាមួយចំនួនក្នុងរដ្ឋធម្មនុញ្ញ។
ប្រធានគណៈកម្មការទី១០នៃរដ្ឋសភា នឹងលើកយកករណីលិខិតឆ្លើយតបពីរដ្ឋមន្ត្រីក្រសួងមហាផ្ទៃ និងក្រសួងសុខាភិបាល ដែលខកខានមិនបានឲ្យមន្ត្រីក្រោមឱវាទរបស់ខ្លួនមកឆ្លើយបំភ្លឺនោះ ទៅពិភាក្សាក្នុងកិច្ចប្រជុំគណៈអចិន្ត្រៃយ៍នៃរដ្ឋសភា ពិចារណានៅពេលឆាប់ៗខាងមុខនេះ។
ប្រធានគណៈកម្មការទី១០នៃរដ្ឋសភា លោក ហូរ វ៉ាន់ មានប្រសាសន៍នៅថ្ងៃទី២៨ ឧសភា ថា លោកបានកោះហៅអភិបាលស្រុកល្វាឯម ខេត្តកណ្ដាល មកបំភ្លឺនៅរដ្ឋសភា តាមរយៈក្រសួងមហាផ្ទៃ កាលពីថ្ងៃទី៧ ឧសភា ទាក់ទងនឹងពាក្យបណ្ដឹងរបស់អ្នកភូមិ ស្ដីពីការលក់បឹងធម្មជាតិ និងមានអំពើពុករលួយ ប៉ុន្តែការកោះអញ្ជើញនេះមិនដំណើរការទៅបានទេ ដោយត្រូវរដ្ឋមន្ត្រីក្រសួងនេះ គឺលោក ស ខេង បដិសេធកាលពីថ្ងៃទី២៦ ឧសភា និងសុំឲ្យគណៈកម្មការទី១ និងគណៈកម្មការទី១០នៃរដ្ឋសភា ពិចារណាដោយយោងតាមមាត្រា១២១ថ្មី នៃរដ្ឋធម្មនុញ្ញ ដែលចែងថា សមាជិកទាំងឡាយនៃរដ្ឋាភិបាលទទួលខុសត្រូវរួមចំពោះរដ្ឋសភា អំពីនយោបាយទូទៅរបស់រាជរដ្ឋាភិបាល។
ចំណែកការកោះអញ្ជើញមន្ត្រីសុខាភិបាលខេត្តសៀមរាប ដែលកោះហៅមកបំភ្លឺនៅថ្ងៃទី២៨ ឧសភា នៅរដ្ឋសភានោះ ក៏មិនបានជោគជ័យដែរ ដោយលោករដ្ឋមន្ត្រី ម៉ម ប៊ុនហេង សុំលើកពេលចូលបំភ្លឺករណីបណ្ដឹងបុគ្គលិកនៃមន្ទីរពេទ្យបង្អែកខេត្តសៀមរាប ទៅពេលក្រោយ ដោយក្រសួងរង់ចាំសេចក្តីជូនដំណឹងរបស់ទីស្ដីការគណៈរដ្ឋមន្ត្រី និងសារាចរណែនាំរបស់រដ្ឋសភា។
ប្រធានគណៈកម្មការទី១០នៃរដ្ឋសភា លោក ហូរ វ៉ាន់ ក៏មានសំអាងដែរ ដោយយោងតាមបទបញ្ជាផ្ទៃក្នុងរបស់រដ្ឋសភា និងសេចក្តីសម្រេចស្ដីពីតួនាទី និងភារកិច្ចរបស់គណៈកម្មការទី១០នៃរដ្ឋសភា កាលពីឆ្នាំ២០១៤ ដែលផ្ទុយពីមាត្រា១២១ នៃរដ្ឋធម្មនុញ្ញ៖ «ចំណុចទី២ មាត្រា៣ តាមដាន និងពិនិត្យការអនុវត្តច្បាប់ពាក់ព័ន្ធនឹងការទទួលខុសត្រូវរបស់គណៈកម្មការផ្អែកតាមរដ្ឋធម្មនុញ្ញ និងគោលនយោបាយរបស់រាជរដ្ឋាភិបាលឲ្យមានប្រសិទ្ធភាព ឥស្សរជន ឬតំណាងស្ថាប័នពាក់ព័ន្ធដើម្បីចូលរួមបំភ្លឺរឿងអ្វីមួយដែលពាក់ព័ន្ធ។ អ៊ីចឹងយើងទទួលខុសត្រូវរឿងពុករលួយ ហើយគេប្ដឹងរឿងពុករលួយ យើងត្រូវមានតួនាទីអញ្ជើញអភិបាលស្រុកហ្នឹងមួយ ព្រោះគេមិននិយាយតែរដ្ឋមន្ត្រីឯណា?»។
ស្របពេលគ្នានេះដែរ ក្រសួងមហាផ្ទៃ ក៏បានស្នើឲ្យគណៈកម្មការទី១នៃរដ្ឋសភា ពិចារណាទៅលើការកោះអញ្ជើញអភិបាលខេត្តក្រចេះ មកឆ្លើយបំភ្លឺចំពោះការដោះស្រាយបញ្ហាជម្លោះដីធ្លីនៅខេត្តនេះដែរ ដោយយោងទៅលើមាត្រា១២១ ដូចគ្នា។
មន្ត្រីនាំពាក្យនៃក្រសួងមហាផ្ទៃ លោក ខៀវ សុភ័គ មានប្រសាសន៍ថា ពាក់ព័ន្ធបញ្ហានេះ លោកមិនអត្ថាធិប្បាយវែងឆ្ងាយទេ ដោយសាររឿងនេះពាក់ព័ន្ធនឹងទិដ្ឋភាពច្បាប់ ប៉ុន្តែលោកគិតថា ច្បាប់រដ្ឋធម្មនុញ្ញជាច្បាប់កំពូលដែលគ្រប់គ្នាត្រូវអនុវត្ត៖ «សមាជិករដ្ឋាភិបាលទទួលខុសត្រូវចំពោះមុខសភា ហើយសភាចង់សួរអីកោះអញ្ជើញសមាជិករដ្ឋាភិបាលទៅ មិនត្រូវអញ្ជើញអភិបាលខេត្ត អភិបាលស្រុកគ្នាដឹងអី? ព្រោះគ្នានៅក្រោមរដ្ឋាភិបាល»។
លោករំពឹងទៀតថា ដើម្បីស្រាយបំភ្លឺលើរឿងនេះ រដ្ឋាភិបាល និងប្រធានរដ្ឋសភា នឹងមានសេចក្តីណែនាំមួយនៅពេលឆាប់ៗខាងមុខនេះ។
ទាក់ទងបញ្ហានេះ ប្រធានក្រុមស៊ើបអង្កេតនៃសមាគមអាដហុក (adhoc) លោក នី ចរិយា មានប្រសាសន៍ថា បើមន្ត្រីរដ្ឋាភិបាលចង់ដោះស្រាយជូនពលរដ្ឋ ហើយបើមន្ត្រីថ្នាក់ក្រោមមិនអាចមកបំភ្លឺបាន អ្នកគ្រប់ភាគីខាងលើបន្តបន្ទាប់នោះអាចចូលមកបំភ្លឺបាន៖ «និយាយទៅការកោះហៅហ្នឹងមិនខុសពេកទេ ព្រោះសភាបានកោះហៅតាមរយៈសមាជិករដ្ឋាភិបាល បើសិនជាសមាជិករដ្ឋាភិបាលយល់ថាមន្ត្រីក្រោមឱវាទខ្លួនមិនឲ្យមកឆ្លើយបំភ្លឺ មកឆ្លើយខ្លួនឯងក៏បានដែរ រឿងតែប៉ុណ្ណឹងទេ»។
ទោះយ៉ាងណា ប្រធានគណៈកម្មការទី១នៃរដ្ឋសភា លោក អេង ឆៃអ៊ាង ដែលខកខានមិនកោះហៅអភិបាលខេត្តក្រចេះ លោក សរ ចំរ៉ុង មកបំភ្លឺពាក់ព័ន្ធជម្លោះដីធ្លីនៅតំបន់នោះ លោកនឹងបង្វែរទៅកោះហៅរដ្ឋមន្ត្រីនៃក្រសួង ឬស្ថាប័នដែលពាក់ព័ន្ធតែម្តងនៅពេលខាងមុននេះ មានដូចជាក្រសួងមហាផ្ទៃ ក្រសួងដែនដី នគរូបនីយកម្ម និងសំណង់ និងប្រធានគណៈកម្មការដោះស្រាយវិវាទដីធ្លី ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។