នៅមុនពិធីបុណ្យចូលឆ្នាំថ្មីប្រពៃណីជាតិ ដែលនឹងប្រព្រឹត្តទៅចាប់ពីថ្ងៃទី១៤ ដល់ទី១៦ មេសា ខាងមុខ ថ្នាក់ដឹកនាំនយោបាយខ្មែរមកពីគណបក្សប្រជាជនកម្ពុជា និងគណបក្សសង្គ្រោះជាតិ សុទ្ធតែបានផ្ញើសារជូនពរដល់ប្រជាពលរដ្ឋខ្មែរទូទៅ។ សម្រាប់ឆ្នាំនេះ អ្នកនយោបាយសម្ដែងការជឿជាក់ថា ប្រទេសកម្ពុជា នឹងមានលក្ខណៈល្អប្រសើរជាងឆ្នាំមុនៗ ហើយការល្អប្រសើរនេះ គឺកើតឡើងដោយសារតែមានវប្បធម៌សន្ទនារវាងថ្នាក់ដឹកនាំគណបក្សទាំង២។
នៅរៀងរាល់ពិធីបុណ្យធំៗម្ដង មិនថាបុណ្យនោះជាបុណ្យអន្តរជាតិ ឬជាបុណ្យប្រពៃណីជាតិរបស់ខ្មែរនោះទេ អ្នកនយោបាយតែងតែបញ្ចេញនូវសារលិខិតផ្ញើទៅកាន់អ្នកគាំទ្ររបស់ខ្លួន ឬទៅកាន់ពលរដ្ឋទូទៅ។ ការបញ្ចេញសារក្នុងពិធីបុណ្យម្តងៗ គឺជាឱកាសមួយសម្រាប់អ្នកនយោបាយដើម្បីលើកឡើងនូវកង្វល់របស់ពួកគេចំពោះប្រទេសជាតិ ហើយសម្រាប់រដ្ឋាភិបាលវិញ វាជាឱកាសសម្រាប់ពួកគេអួតអាងអំពីសមិទ្ធផលនានា ដែលសម្រេចបានក្នុងពេលកន្លងមក និងដើម្បីបង្ហាញផែនការអនុវត្តសម្រាប់ថ្ងៃខាងមុខ។
ដោយឡែកសម្រាប់ឆ្នាំនេះ ក្នុងពេលដែលអ្នកនយោបាយខ្មែរកំពុងមានភាពល្អូកល្អិនជាមួយគ្នានោះ ពួកគេបង្ហាញសុទិដ្ឋិនិយមថា ឆ្នាំថ្មីឆ្នាំនេះនឹងមានលក្ខណៈល្អប្រសើរជាងឆ្នាំកន្លងទៅសម្រាប់សង្គមជាតិកម្ពុជា។
ក្នុងសារជូនពរចុះថ្ងៃទី១១ មេសា ប្រធានគណបក្សសង្គ្រោះជាតិ និងជាប្រធានក្រុមតំណាងរាស្ត្រភាគតិចក្នុងរដ្ឋសភា លោក សម រង្ស៊ី បង្ហាញក្តីសង្ឃឹមថា ព្រឹត្តិការណ៍នយោបាយថ្មីៗ ក្នុងរយៈពេលប៉ុន្មានសប្ដាហ៍ចុងក្រោយនេះ ហាក់រៀបចំឲ្យប្រទេសកម្ពុជា ឈានចូលក្នុងយុគសម័យថ្មីមួយបន្ទាប់ពីពិធីបុណ្យចូលឆ្នាំថ្មីនេះ។
លោក សម រង្ស៊ី ដែលគេដឹងថា នឹងទៅចូលរួមក្នុងពិធីអង្គរសង្ក្រាន្តនៅខេត្តសៀមរាប ជាមួយលោកនាយករដ្ឋមន្ត្រី ហ៊ុន សែន ក្នុងពេលខាងមុខថ្លែងថា វប្បធម៌មួយដែលលោក និងលោក ហ៊ុន សែន ចាប់យកមកអនុវត្តជាមួយគ្នាចាប់ពីពេលនេះតទៅ នោះគឺវប្បធម៌សន្ទនា ព្រោះលោកយល់ថា វាជាវប្បធម៌សន្តិភាព វប្បធម៌ប្រជាធិបតេយ្យ ដែលផ្ទុយស្រឡះពីវប្បធម៌សង្គ្រាម វប្បធម៌ហិង្សា និងវប្បធម៌ប្រើប្រាស់អំណាចផ្ដាច់ការ។
លោក សម រង្ស៊ី ក៏បានអំពាវនាវឲ្យពលរដ្ឋខ្មែរមកពីគ្រប់និន្នាការនយោបាយប្រកាន់ខ្ជាប់នូវវប្បធម៌សន្ទនា ហើយមិនត្រូវចាត់ទុកខ្មែរដូចគ្នាជាសត្រូវឡើយ។ ក្នុងពេលជាមួយគ្នា លោកក៏មិនភ្លេចលើកឡើងអំពីលទ្ធផលថ្មីៗដែលទទួលបានពីវប្បធម៌សន្ទនា។ លោកថា ដោយសារតែមានវប្បធម៌សន្ទនានេះហើយ ទើប គ.ជ.ប ថ្មីត្រូវបានបង្កើតឡើង ហើយដែលលោកជឿជាក់ថា គ.ជ.ប ថ្មីនេះ នឹងធ្វើឲ្យការបោះឆ្នោតនៅកម្ពុជា ក្នុងពេលខាងមុខមានលក្ខណៈសេរី ត្រឹមត្រូវ និងយុត្តិធម៌។ រីឯលទ្ធផលមួយទៀត ដែលទទួលបានពីវប្បធម៌សន្ទនាដែរនោះ គឺការជំរុញឲ្យមានការលើកលែងទោស និងការដោះលែងចេញពីពន្ធនាគារពលរដ្ឋដែលរងការចោទប្រកាន់ពាក់ព័ន្ធទៅនឹងព្រឹត្តិការណ៍នយោបាយក្រោយការបោះឆ្នោតឆ្នាំ២០១៣។
ការអះអាងរបស់លោក សម រង្ស៊ី បែបនេះ គឺស្របពេលដែលសកម្មជនដីធ្លីសហគមន៍បឹងកក់ និងព្រះសង្ឃខ្មែរក្រោមមួយអង្គត្រូវបានព្រះមហាក្សត្រព្រះរាជទានការលើកលែងទោសកាលពីថ្ងៃទី១១ មេសា។
ក្រៅតែពីមានវប្បធម៌សន្ទនាជាមួយលោក ហ៊ុន សែន លោក សម រង្ស៊ី ក៏បានបង្ហាញកាយវិការជិតស្និទ្ធជាមួយថ្នាក់ដឹកនាំគណបក្សប្រជាជនកម្ពុជា ២រូបផ្សេងទៀត គឺលោក ជា ស៊ីម និងលោក ហេង សំរិន ផងដែរ។
ជាក់ស្ដែង នៅថ្ងៃទី១២ មេសា លោក សម រង្ស៊ី និងភរិយា ព្រមទាំងសមាជិកសភាមកពីគណបក្សសង្គ្រោះជាតិមួយចំនួនទៀត បានធ្វើដំណើរទៅផ្ទះរបស់លោក ហេង សំរិន ដើម្បីជូនពរប្រធានសភារូបនេះនៅក្នុងឱកាសបុណ្យចូលឆ្នាំថ្មី។ កាលពីពេលថ្មីៗកន្លងទៅ លោក សម រង្ស៊ី ក៏បានទៅសួរសុខទុក្ខលោក ជា ស៊ីម ដល់ផ្ទះម្ដងរួចហើយដែរ។
ស្រដៀងនឹងលោក សម រង្ស៊ី លោក ហ៊ុន សែន ក៏បានសរសេរលើទំព័រហ្វេសប៊ុក (Samdech Hun Sen, Cambodian Prime Minister) របស់លោកថា ការសម្រេចបាន គ.ជ.ប ថ្មី គឺដោយសារតែគណបក្សទាំង២ បានតម្កល់ផលប្រយោជន៍ជាតិ និងពលរដ្ឋជាធំ។ លោកថា នេះគឺជាសក្ខីភាពជោគជ័យនៃវប្បធម៌សន្ទនាដែលបញ្ជាក់ថា ខ្មែរមានលទ្ធភាពដោះស្រាយបញ្ហារបស់ខ្លួនគ្រប់គ្រាន់ដោយខ្លួនឯងដោយគ្មានការជ្រៀតជ្រែកពីខាងក្រៅ។ លោក ហ៊ុន សែន បញ្ជាក់ថា នេះគឺជាទិសដៅនៃវប្បធម៌សន្ទនាសម្រាប់ដោះស្រាយបញ្ហាជាតិគ្រប់កម្រិតទាំងអស់។ លើសពីនេះ លោក ហ៊ុន សែន កាលពីថ្ងៃទី៩ មេសា ក៏បានប្រកាសក្នុងរដ្ឋសភាបញ្ចប់នូវវប្បធម៌ទឹកឡើងត្រីស៊ីស្រមោចទឹកហោចស្រមោចស៊ីត្រីផងដែរ។
យ៉ាងណាក៏ដោយ គេនៅចាំបានថា នៅមុនពេលសមាជិក គ.ជ.ប ថ្មី ត្រូវបានរដ្ឋសភាបោះឆ្នោតផ្ដល់សេចក្ដីទុកចិត្តនៅថ្ងៃទី៩ មេសា លោក ហ៊ុន សែន បានដំឡើងសំឡេងខ្លាំងៗ ដាក់លោក កឹម សុខា ជុំវិញការទាមទាររបស់អនុប្រធានបក្សប្រឆាំងរូបនេះឲ្យដោះលែងលោក មាជ សុវណ្ណារ៉ា នៅមុនពេលចូលឆ្នាំខ្មែរ។ លោក កឹម សុខា ផ្ទាល់ក៏ត្រូវបានតំណាងមហាអយ្យការអមសាលាដំបូងរាជធានីភ្នំពេញ កោះហៅដើម្បីសាកសួរស្ទើរពេញមួយថ្ងៃពាក់ព័ន្ធទៅនឹងសកម្មភាពរបស់លោកនៅក្រោយការបោះឆ្នោតឆ្នាំ២០១៣។ ប៉ុន្តែក្រោយពី គ.ជ.ប ថ្មីត្រូវបានបង្កើត គេសង្កេតឃើញថា ការដំឡើងសំឡេងដាក់គ្នារបស់អ្នកនយោបាយហាក់ថមថយជាងមុន។
ទោះជាយ៉ាងណារហូតមកទល់ពេលនេះ លោក មាជ សុវណ្ណារ៉ា និងសកម្មជនបក្សសង្គ្រោះជាតិ មួយចំនួនមិនត្រូវបានគេដោះលែងឲ្យមានសេរីភាពនោះទេ។ ការចាប់ខ្លួនមន្ត្រី និងសកម្មជនបក្សប្រឆាំងទាំងនេះ ត្រូវបានអង្គការសង្គមស៊ីវិលជាតិ និងអន្តរជាតិ ចាត់ទុកថា ជារឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។