បុរស​៣​នាក់​សារភាព​ថា​ជា​អ្នក​បង្ក​របួស​ស្នាម​លើ​តំណាង​រាស្ត្រ​​បក្ស​ប្រឆាំង​២នាក់

ដោយ តាំង សារ៉ាដា និង សុ ជីវី
2015-11-03
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
តំណាងរាស្ត្រ​គណបក្ស​សង្គ្រោះ​ជាតិ ដែល​រង​របួស​ដោយ​ការ​វាយ​ប្រហារ​ពី​មនុស្ស​មួយ​ក្រុម លោក ញ៉យ ចំរើន (ឆ្វេង) និង​លោក គង់ សភា (កណ្ដាល) ត្រូវ​បាន​បញ្ជូន​ចេញ​ពី​ទីស្នាក់ការ​គណបក្ស​ទៅ​ព្យាបាល​នៅ​មន្ទីរពេទ្យ កាល​ពី​ថ្ងៃ​ទី​២៦ តុលា ឆ្នាំ​២០១៥។
តំណាងរាស្ត្រ​គណបក្ស​សង្គ្រោះ​ជាតិ ដែល​រង​របួស​ដោយ​ការ​វាយ​ប្រហារ​ពី​មនុស្ស​មួយ​ក្រុម លោក ញ៉យ ចំរើន (ឆ្វេង) និង​លោក គង់ សភា (កណ្ដាល) ត្រូវ​បាន​បញ្ជូន​ចេញ​ពី​ទីស្នាក់ការ​គណបក្ស​ទៅ​ព្យាបាល​នៅ​មន្ទីរពេទ្យ កាល​ពី​ថ្ងៃ​ទី​២៦ តុលា ឆ្នាំ​២០១៥។
RFA/Brach Chev

សមត្ថកិច្ច​ទីក្រុង​ភ្នំពេញ ឲ្យ​ដឹង​ថា ជន​ដៃ​ដល់​មួយ​ចំនួន​ដែល​បង្ក​របួស​ស្នាម​ធ្ងន់ធ្ងរ​ទៅ​លើ​តំណាង​រាស្ត្រ​គណបក្ស​ប្រឆាំង កាល​ពី​ថ្ងៃ​ទី​២៦ ខែ​តុលា កន្លង​ទៅ បាន​ចូល​សារភាព​ទទួល​ទោស​កំហុស​ចំពោះ​មុខ​ច្បាប់​កាល​ពី​ល្ងាច​ថ្ងៃ​ទី​៣ វិច្ឆិកា។ ជន​រងគ្រោះ​នៃ​អំពើ​ហិង្សា បាន​សាទរ​ចំពោះ​ភាព​ក្លាហាន​របស់​ជន​ដៃ​ដល់ ប៉ុន្តែ​ទាមទារ​ឲ្យ​សមត្ថកិច្ច​បង្ហាញ​មុខ​អ្នក​បញ្ជា​ពី​ក្រោយ។

អ្នក​នាំ​ពាក្យ​ក្រសួង​មហាផ្ទៃ លោក​ឧត្តមសេនីយ៍ ខៀវ សុភ័គ បាន​ប្រាប់​វិទ្យុ​អាស៊ីសេរី តាម​ទូរស័ព្ទ​កាល​ពី​ថ្ងៃ​អង្គារ ទី​៣ វិច្ឆិកា ថា យ៉ាង​ហោច​ណាស់​មាន​ជន​ដៃ​ដល់​ចំនួន​បី​រូប បាន​ចូល​សារភាព​ចំពោះ​មុខ​សមត្ថកិច្ច​ក្រុង​ភ្នំពេញ។ លោក​បន្ត​ថា សមត្ថកិច្ច​នឹង​បញ្ជូន​ខ្លួន​ជន​ដៃ​ដល់​ទាំង​បី​នាក់ ទៅ​តុលាការ​នៅ​ថ្ងៃ​ពុធ ទី​៤ វិច្ឆិកា៖ «ល្ងាច​មិញ​នេះ​ម៉ោង​ប្រហែល​ជិត​ប្រាំ​ទៅ​ហើយ មាន​ជន​ដៃ​ដល់​បី​រូប​ដែល​បាន​បង្ហាញ​ខ្លួន​ចំពោះ​មុខ​គណៈកម្មការ​ស៊ើប​អង្កេត​របស់​ក្រសួង​មហាផ្ទៃ។ ឥឡូវ​នេះ កំពុង​ស្ថិត​ក្រោម​ការ​ឃុំ​គ្រង​របស់​គណៈកម្មការ​យើង​ទេ ដើម្បី​រៀបចំ​សំណុំ​រឿង​បញ្ជូន​ទៅ​តុលាការ​នៅ​ព្រឹក​ស្អែក​នេះ»

ជន​ដៃ​ដល់​ទាំង​បី​នាក់​នេះ ទី​មួយ​មាន​ឈ្មោះ ចាយ សារិទ្ធ ភេទ​ប្រុស អាយុ ៣៣​ឆ្នាំ មាន​ទីលំនៅ​នៅ​សង្កាត់​តាខ្មៅ ក្រុង​តាខ្មៅ ខេត្ត​កណ្ដាល។ ទី​២ ឈ្មោះ ម៉ៅ ហឿន ភេទ​ប្រុស អាយុ ៣៤​ឆ្នាំ មាន​ទីលំនៅ​នៅ​ឃុំ​ព្រែកខ្សាយ ស្រុក​ពាមរក៍ ខេត្ត​ព្រៃវែង។ ទី​៣ ឈ្មោះ សុត វណ្ណនី ភេទ​ប្រុស អាយុ ៤៥​ឆ្នាំ មាន​ទីលំនៅ​ក្នុង​សង្កាត់​កំពង់សំណាញ់ ក្រុង​តាខ្មៅ ខេត្ត​កណ្ដាល។

លោក ខៀវ សុភ័គ អះអាង​ថា មនុស្ស​ដែល​ចូល​សារភាព​ទាំង​បី​នាក់​នេះ ជា​ជន​ដៃ​ដល់​ជាង​គេ​ក្នុង​អំពើ​ហិង្សា​ទៅ​លើ​អ្នក​តំណាង​រាស្ត្រ​ពីរ​រូប​របស់​គណបក្ស​សង្គ្រោះ​ជាតិ៖ «តាម​ដែល​បង​ដឹង​មាន​អ្នក​ពាក់​ពួក​ក្រហម​មួយ អ្នក​ដែល​ពាក់​ស្បែក​ជើង​ហ្នឹង​មួយ ហើយ​និង​អ្នក​ទាត់​ហ្នឹង​មួយ។ ហ្នឹង​ជា​អ្នក​ដៃ​ដល់​ជាង​គេ ក្រៅ​ពី​ហ្នឹង​មិន​ដៃ​ដល់​ទេ គ្រាន់​តែ​ហេកហកៗ​នឹង​គេ​នឹង​ឯង​ទេ»

អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ បាន​ជំរុញ​ឲ្យ​ម្ចាស់​ផេក​ហ្វេសប៊ុក (Facebook page) ទាំងឡាយ​ដែល​មាន​ភស្តុតាង​ជា​រូប​ថត ឬ​ជា​វីដេអូ ដែល​ថត​មុខ​ជន​ដៃ​ដល់​ក្នុង​អំពើ​ហិង្សា​ក្បែរ​មន្ទីរ​រដ្ឋសភា មក​ប្រគល់​ឲ្យ​សមត្ថកិច្ច ដើម្បី​កំណត់​មុខ​សញ្ញា​បន្ថែម៖ «ហ្វេសប៊ុក​គេ​ធ្វើ​អី​ក៏​បាន​ដែរ។ ដូច​ឈ្មោះ ក អ៊ីចឹង គេ​សង្ស័យ​ហើយ​ដូរ​ទៅ​ឈ្មោះ ខ វិញ ក៏​មាន​ដែរ។ សមត្ថកិច្ច​អំពាវនាវ​ឲ្យ​ម្ចាស់​ផេក​ទាំងអស់ ដែល​បាន​ថត​ផ្ទាល់​ហ្នឹង សូម​ឲ្យ​វីដេអូ​ដើម​របស់​លោក​យក​មក​ឲ្យ​គណៈកម្មការ​របស់​យើង ដើម្បី​ងាយ​ស្រួល​ក្នុង​ការ​ធ្វើ​ការ​សន្និដ្ឋាន និង​ចោទ​ប្រកាន់​តាម​ផ្លូវ​ច្បាប់»

ទោះ​ជា​យ៉ាង​ណា កន្លង​មក​គេ​ឃើញ​ក្រសួង​មហាផ្ទៃ ចាត់​ការ​ចាប់​ខ្លួន​មនុស្ស​មួយ​ចំនួន​ភ្លាមៗ​ដាក់​ពន្ធនាគារ ដោយ​ប្រើប្រាស់​សារ និង​រូបភាព​ដែល​ជន​សង្ស័យ​បាន​បង្ហោះ​នៅ​តាម​បណ្ដាញ​សង្គម​ហ្វេសប៊ុក។ ករណី​ទាំង​នោះ​រួម​មាន អ្នក​សរសេរ​សារ​គំរាម​សម្លាប់ លោក សុខ ទូច សាស្ត្រាចារ្យ​វិទ្យាសាស្ត្រ​នយោបាយ និង​អ្នក​សរសេរ​គំរាម​សម្លាប់ លោក ស ខេង រដ្ឋមន្ត្រី​ក្រសួង​មហាផ្ទៃ។

ជុំវិញ​ការ​ចូល​សារភាព​របស់​ជន​ដៃ​ដល់​ទាំង​នេះ លោក ញ៉យ ចំរើន ដែល​ជា​ជន​រងគ្រោះ​នៃ​អំពើ​ហិង្សា​របស់​ក្រុម​បាតុករ ដែល​គាំទ្រ​គណបក្ស​ប្រជាជន​កម្ពុជា បាន​សម្ដែង​ការ​កោត​សរសើរ​ដល់​ភាព​ក្លាហាន​របស់​ជន​ដៃ​ដល់ ប៉ុន្តែ​លោក​ជំរុញ​ឲ្យ​សមត្ថកិច្ច​វែក​មុខ​អ្នក​បញ្ជា​ឲ្យ​មាន​អំពើ​ហិង្សា​នេះ​កើត​ឡើង៖ «អរគុណ​ណាស់ ហ្នឹង​យើង​សរសើរ​ដែល​ក្លាហាន​ហ៊ាន​មក​សារភាព​ហ្នឹង តើ​ខ្ញុំ​ចង់​ដឹង​ថា តើ​មាន​អ្នក​ណា​នៅ​ពី​ក្រោយ​រឿង​ហ្នឹង? ខ្ញុំ​មិន​ជឿ​ថា​អ្នក​ទាំងអស់​ហ្នឹង​សុខៗ​មាន​អ៊ីចឹង​កើត​ឡើង​ទេ ព្រោះ​យើង និង​ក្រុម​បី​នាក់​ហ្នឹង មិន​ដែល​មាន​ទំនាស់​អ្វី​ជាមួយ​គ្នា​ទេ ហើយ​សឹង​ថា​មក​សម្លាប់​យើង​ទៅ​ហើយ។ ដូច្នេះ ខ្ញុំ​សង្ស័យ​ថា វា​មាន​អ្នក​នៅ​ពី​ក្រោយ​ហ្នឹង​ទៅ​ទៀត។ អ៊ីចឹង ខ្ញុំ​ចង់​ដឹង​ថា តើ​មាន​អ្នក​ណា​នៅ​ពី​ក្រោយ​ហ្នឹង ហើយ​ចាប់​យក​មក​កាត់​ទោស​តាម​ផ្លូវ​ច្បាប់»

ក្រុម​បាតុករ​ដែល​មាន​និន្នាការ​គាំទ្រ​គណបក្ស​កាន់​អំណាច កាល​ពី​ថ្ងៃ​ច័ន្ទ ទី​២៦ ខែ​តុលា បាន​នាំ​គ្នា​ស្រែក​ទាមទារ​ឲ្យ​ដក​អនុប្រធាន​គណបក្ស​សង្គ្រោះ​ជាតិ លោក កឹម សុខា ចេញ​ពី​តំណែង​អនុប្រធាន​ទី​១ រដ្ឋសភា។ ក្រុម​បាតុករ បាន​ចាប់​អូស​តំណាង​រាស្ត្រ​គណបក្ស​សង្គ្រោះ​ជាតិ ពីរ​រូប គឺ​លោក គង់ សភា និង​លោក ញ៉យ ចំរើន ចេញ​ពី​រថយន្ត ហើយ​ព្រួត​គ្នា​ចោមរោម​វាយ​ទាត់​ធាក់​យ៉ាង​សាហាវ បណ្ដាល​ឲ្យ​រង​របួស​ជា​ទម្ងន់ ហើយ​ដួល​សន្លប់​នៅ​ហ្នឹង​កន្លែង។

បាតុកម្ម​ហិង្សា​នេះ ធ្វើ​ឡើង​បន្ទាប់​ពី លោក ហ៊ុន សែន ថ្លែង​ទៅ​កាន់​ក្រុម​អ្នក​គាំទ្រ​របស់​លោក​ក្នុង​ប្រទេស​បារាំង កាល​ពី​ថ្ងៃ​អាទិត្យ ថា បាតុកម្ម​ប្រឆាំង​នឹង​រូប​លោក​នៅ​បារាំង គឺ​ជា​សិទ្ធិ​របស់​ពលរដ្ឋ ចំណែក​បាតុកម្ម​ប្រឆាំង លោក កឹម សុខា នៅ​ភ្នំពេញ ក៏​ជា​សិទ្ធិ​របស់​ពលរដ្ឋ​ដូច​គ្នា។

មជ្ឈដ្ឋាន​សាធារណៈ​ជាតិ និង​អន្តរជាតិ ចាត់​ទុក​សម្ដី​របស់ លោក ហ៊ុន សែន ថា​អាច​ជា​ការ​បញ្ឆេះ​កំហឹង​ញុះញង់​ឲ្យ​ប្រព្រឹត្ត​ហិង្សា។

ជុំវិញ​ការ​ចូល​សារភាព​របស់​ជន​ដៃ​ដល់​ដែល​បង្ក​របួស​ស្នាម​ធ្ងន់ធ្ងរ​ដល់​អ្នក​តំណាង​រាស្ត្រ​គណបក្ស​សង្គ្រោះ​ជាតិ នេះ​ដែរ អ្នក​ស៊ើប​អង្កេត​របស់​អង្គការ​ការពារ​សិទ្ធិ​មនុស្ស​លីកាដូ (LICADHO) លោក អំ សំអាត អះអាង​ថា គ្មាន​អ្វី​ចម្លែក​នោះ​ទេ​ចំពោះ​ការ​ចូល​សារភាព​របស់​ជន​ដៃ​ដល់​នៅ​ពេល​នេះ ដោយសារ​គណៈកម្មការ​ស៊ើប​អង្កេត​របស់​ក្រសួង​មហាផ្ទៃ បាន​ទុក​លទ្ធភាព​ឲ្យ​ពួក​គេ​ចូល​បង្ហាញ​ខ្លួន ជា​ជាង​ធ្វើ​ការ​ចាប់​ខ្លួន​តែ​ម្តង៖ «គណៈកម្មការ​នេះ​បាន​ប្រកាស​ជា​បន្តបន្ទាប់​ថា​ពិបាក​ក្នុង​ការ​ស៊ើប​អង្កេត ហើយ​សូម​ឲ្យ​បង​ប្អូន​ប្រជាពលរដ្ឋ​ហ្នឹង​ចូលរួម​ផ្តល់​ភស្តុតាង។ ទីបំផុត យើង​ឃើញ​ថា ជន​ពាក់ព័ន្ធ​បាន​ចូល​សារភាព ហើយ​មិន​បាន​ទៅ​ណា​ឆ្ងាយ​ទេ បើ​យើង​មើល​ទៅ។ អ៊ីចឹង​ហើយ ដែល​យើង​អាច​មើល​ឃើញ​ថា ជា​ការ​ទុក​លទ្ធភាព​ឲ្យ​អ្នក​ហ្នឹង​ចូល​សារភាព។ បើ​សិន​ជា​យើង​គិត​លើ​ឆន្ទៈ​ក្នុង​ការ​ស៊ើប​អង្កេត​ពិត​ប្រាកដ អ្នក​ទាំងអស់​គ្នា​ហ្នឹង គឺ​រយៈពេល​មួយ​អាទិត្យ​មិន​បាច់​ចូល​សារភាព ក៏​គណៈកម្មការ​គេ​ចាប់​បាន​ដែរ»

លោក​បន្ត​ថា ការ​ចូល​សារភាព​របស់​ជន​ដៃ​ដល់ អាច​ធ្វើ​ទៅ​បាន គឺ​ដោយសារ​ការ​ប្រកាស​របស់​លោក​នាយក​រដ្ឋមន្ត្រី ហ៊ុន សែន កាល​ពី​ថ្ងៃ​ទី​២៨ ខែ​តុលា កន្លង​ទៅ ក្រោយ​ពេល​លោក​វិល​ត្រឡប់​ពី​ប្រទេស​បារាំង។

កន្លង​ទៅ​មាន​ជន​ដៃ​ដល់​មួយ​ចំនួន បាន​ចូល​ខ្លួន​សារភាព​ចំពោះ​មុខ​សមត្ថកិច្ច​ទីក្រុង​ភ្នំពេញ ចំពោះ​អំពើ​ហិង្សា​ដែល​ពួក​គេ​បាន​ប្រព្រឹត្ត​ល្មើស​ច្បាប់ ក្រោយ​ពី​មាន​បញ្ជា​របស់ លោក ហ៊ុន សែន ដូចជា​ករណី លោក​ឧកញ៉ា សុខ ប៊ុន បង្ក​របួស​ស្នាម​លើ កញ្ញា សាសា និង​ករណី លោក ឈូក បណ្ឌិត ដែល​បាន​បាញ់​កម្មការិនី​បី​នាក់​ឲ្យ​របួស​ធ្ងន់​នៅ​ខេត្ត​ស្វាយរៀង ជាដើម។

ទោះ​ជា​យ៉ាង​ណា ផ្អែក​តាម​សាក្សី​សុំ​មិន​បញ្ចេញ​ឈ្មោះ ដែល​ជា​អ្នក​បើក​រថយន្ត​ដឹក​កង​អង្គរក្ស លោក ហ៊ុន សែន ពី​ខេត្ត​កណ្តាល ក្រុម​អង្គរក្ស​របស់​នាយក​រដ្ឋមន្ត្រី​ប្រមាណ ២០០​នាក់ បាន​ចូលរួម​ក្នុង​បាតុកម្ម​បណ្ដេញ លោក កឹម សុខា ពី​តំណែង ហើយ​រូបភាព​វីដេអូ​ផ្សាយ​ពាស​ពេញ​នៅ​ក្នុង​បណ្ដាញ​សង្គម​ហ្វេសប៊ុក បង្ហាញ​ថា ជន​ដៃ​ដល់​មាន​គ្នា​ច្រើន​លើស​ពី ៣​នាក់។

អំពើ​និទ្ទណ្ឌភាព​មាន​កម្រិត​ខ្ពស់​នៅ​កម្ពុជា ក្នុង​នោះ​មាន​ករណី​ជាច្រើន​ដែល​ជន​ដៃ​ដល់​មិន​ត្រូវ​បាន​វែក​មុខ​ដោយ​អាជ្ញាធរ​មាន​សមត្ថកិច្ច។ ករណី​ទាំង​នោះ​រួម​មាន ឃាតកម្ម​លើ​មេ​ដឹក​នាំ​សហជីព​សេរី​កម្មករ លោក ជា វិជ្ជា ឆ្នាំ​២០០៤ ករណី​សម្លាប់​រង្គាល​កងទ័ព​រាជា​និយម​ហ៊្វុនស៊ិនប៉ិច ករណី​អ្នក​បញ្ជា​ឲ្យ​បោក​គ្រាប់​បែក​មុខ​រដ្ឋសភា កាល​ពី​ឆ្នាំ​១៩៩៧ ការ​បាញ់​សម្លាប់​តារា​ភាពយន្ត អ្នកស្រី ពិសិដ្ឋ ពិលីកា ការ​បាញ់​ប្រហារ​តារា​ចម្រៀង កញ្ញា ទូច ស៊ុននិច ការ​សម្លាប់​ព្រះសង្ឃ សំ ប៊ុនធឿន ការ​ជះ​ទឹក​អាស៊ីត​លើ អ្នកស្រី តាត ម៉ារីណា ការ​សម្លាប់​អ្នក​កាសែត ឬ​សកម្មជន​ការពារ​ព្រៃ​ឈើ លោក ឈុត វុទ្ធី ជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (10)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

To me arresting the attackers is as important as arresting the masterminds

Nov 04, 2015 09:26 PM

អនាមិក

ពី កណ្ដាល

មានពលរដ្ឋទាមទារ ឲ្យបង្ហាញរូប និងធ្វើត្រាប់អាកប្បកិរិយាវាយ ធាក់ ផងដើម្បីពលរដ្ឋដែលគេមានរូបថតជាក់ស្ដែង គេអាចផ្ទៀងមើលផង។ គេចង់ឃើញអាជ្ញាធរបំរើរាស្ដ្រ បំរើសច្ចធម៍ សមជាខ្មែរបេះដូងខ្មែរ ខួក្បាលខ្មែរ។

Nov 04, 2015 04:03 AM

អ្នក​អាន​អនាមិក

I am a strong man as you know,so you have to come to confess what you did to my congressmen.Are you sure you did or just paid by some one to confess because $50,000 you cannot make it for 10 years,so just confess stay in prison free food and a money to my wife.

Nov 03, 2015 11:38 PM

True Story

ពី PP

ល្អណាស់ ដែលពួកគាត់ចេញមកសារភាព។ តាមការបញ្ជាក់របស់ស្នងការពីលើកមុន ថាលោក ចាយ សារិទ្ធ​ មិនមែនជាកងកំលាំងប្រដាប់អាវុធទេ ព្រោះគ្មានឈ្មោះក្នុងបញ្ជី។
ដូចនេះ គាត់ត្រូវមានទោសកំហុសធំ 2ករណី៖
1- ទោសកំហុសដោយចេតនា ក្នុងការវាយធ្វើបាបតំណាងរាស្ត្រដែលច្បាប់ហាមឃាត់ដោយអភ័យឯកសិទ្ឋិ
2- បង្កើតកងកំលាំងប្រដាប់អាវុធ លានដ្ឋានហ្វឹកហាត់កណ្តាលទីក្រុងតាខ្មៅ។ នេះជាទោសឧក្រិដ្ឋកម្មសង្គ្រាម ដែលមិនអាចលើកលែងបាន
3-តុលាការ មិនត្រូវបង្វែរករណីនេះឲ្យទៅជាទោសរដ្ឋបវេណី ឬព្រហ្មទណ្ឌកំរិតស្រាល បានឡើយ។
បើធៀបជាមួយលោក សុខហួរ គឺធ្ងន់ជាង ១០០ ដង ។ ត្រូវវាយខ្នោះដៃ ខ្នោះជើង និង ក។

Nov 03, 2015 09:50 PM

អ្នក​អាន​អនាមិក

Without technology, security cameras, these two opposition lawmakers would have been treated in Prey Sar! The CPP would accuse the lawmakers of attacking those gang protests, and they fought back in self defense. So, the security cameras got credit for this, not the Cambodian security officials.

It has been almost half a century, the CPP has failed to make the Cambodian people feel safe, not to mention about employment. Let the Cambodian people decide if they want to see change or continue to be misled.

Nov 03, 2015 06:49 PM

មើល​មតិ​ទាំង​អស់.

គេហទំព័រ​ទាំងមូល