ប្រធានមជ្ឈមណ្ឌលសិទ្ធិមនុស្សកម្ពុជា បានទាមទារឲ្យ លោក សម រង្ស៊ី សុំទោសជាសាធារណៈ ឬបកស្រាយឡើងវិញចំពោះការថ្លែងរបស់ខ្លួនដែលបានប្រៀបធៀបថា លោក ហ៊ុន សែន កុំឲ្យអន់ជាងស្រី ដែលពាក្យសម្ដីនេះត្រូវបានចាត់ទុកថាមានចរិតរើសអើងលើស្ត្រីភេទ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍នៅថ្ងៃទី១៣ ធ្នូ ថា លោកស្នើឲ្យ លោក សម រង្ស៊ី មានការបកស្រាយចំពោះការថ្លែងទៅកាន់អ្នកគាំទ្រលោកនៅឯខេត្តសៀមរាប កាលពីថ្ងៃទី១០ ធ្នូ ក្នុងទិវាសិទ្ធិមនុស្សដែលថា កុំឲ្យអន់ជាងស្រីនេះ។ លោកបានអំពាវនាវឲ្យថ្នាក់ដឹកនាំគណបក្សទាំងពីរ គឺគណបក្សកាន់អំណាច និងគណបក្សប្រឆាំង ត្រូវជៀសវាងឲ្យបាននូវការបង្អាប់ស្រី។
«សំឡេង»
ក្នុងការប្រមូលផ្ដុំគ្នាប្រមាណ ២ម៉ឺននាក់ ពីសំណាក់អ្នកគាំទ្រ លោក សម រង្ស៊ី នៅខេត្តសៀមរាប ឱកាសប្រារព្ធទិវាសិទ្ធិមនុស្ស ១០ ធ្នូ លោក សម រង្ស៊ី បានថ្លែងបែបចំអកទៅលោកនាយករដ្ឋមន្ត្រី ហ៊ុន សែន ថាចិត្តមិនសឿងដូចនាយករដ្ឋមន្ត្រីថៃ អ្នកស្រី យីងឡាក់ ស៊ីណាវ៉ាត ដែលហ៊ានសន្យាថាចុះចេញពីតំណែង និងបើកឲ្យមានការបោះឆ្នោតសាជាថ្មី ក្រោយពីមានការតវ៉ាពីក្រុមប្រឆាំង។ លោកបានអំពាវនាវទៅកាន់លោកនាយករដ្ឋមន្ត្រី ហ៊ុន សែន ថាកុំឲ្យអន់ជាងស្រី។
«សំឡេង»
ឆ្លើយតបទៅនឹងការប្រតិកម្មរបស់មន្ត្រីសិទ្ធិមនុស្ស លោក សម រង្ស៊ី បានពន្យល់ថា នេះគឺជាការយល់ខុសស្រឡះ ដែលផ្ទុយទៅវិញលោកគោរព លោកស្ញប់ស្ញែងចំពោះភាពក្លាហាន នឹងសេចក្ដីថ្លៃថ្នូររបស់ អ្នកស្រី យីងឡាក់ ទៅវិញទេ។
«សំឡេង»
យ៉ាងណាក៏ដោយ នៅក្នុងលិខិតចំហរបស់មជ្ឈមណ្ឌលសិទ្ធិមនុស្ស ដែលបានចេញផ្សាយនៅថ្ងៃទី១២ ធ្នូ បានសរសេរថា ប្រសិនជាថ្លែងបែបនេះ គឺមានន័យថា ស្ត្រីមានសមត្ថភាពចាញ់បុរស ដែលនេះជាការពុំទទួលយកបាន។ ប្រការនេះ បង្កឲ្យមានអសមភាពយេនឌ័រ និងការបង្ខូចនូវទំនៀមទម្លាប់ផ្នែកយេនឌ័រ និងជាការប៉ះពាល់ដល់ការអភិវឌ្ឍប្រកបដោយសមភាពនៅកម្ពុជា។ ក្នុងលិខិតដដែលបានកត់សម្គាល់ថា បន្ទាប់ពីការបោះឆ្នោតជ្រើសតាំងតំណាងរាស្ត្រឆ្នាំនេះ មានការធ្លាក់ចុះនូវបេក្ខភាពតំណាងស្ត្រីនៅក្នុងរដ្ឋសភា នៅរយៈពេល ២០ឆ្នាំមកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។