ក្រុមមន្ត្រីមូលនិធិសង្គ្រោះជាតិខ្មែរ ដែលមានមូលដ្ឋានក្នុងសហរដ្ឋអាមេរិក អះអាងថា ក្រុមរបស់ខ្លួននឹងធ្វើបន្តកិច្ចការឆ្ពោះទៅមុខ សម្រាប់ការងារមនុស្សធម៌ និងសង្គមកិច្ចប្រកបដោយតម្លាភាព គណនេយ្យភាព និងឯករាជ្យភាព។
មូលនិធិសង្គ្រោះជាតិខ្មែរ ដែលមានមូលដ្ឋានក្នុងសហរដ្ឋអាមេរិក បដិសេធចំពោះដំណឹងដែលថា មូលនិធិនេះបានបិទទ្វារលែងដំណើរការ។ ក្រៅពីការបដិសេធនេះ មូលនិធិសង្គ្រោះជាតិ ក៏បានបង្កើនសកម្មភាពការងាររបស់ខ្លួនទៅមុខលើសដើម។
ប្រធានមូលនិធិសង្គ្រោះជាតិខ្មែរ លោក ទូច វិបុល មានប្រសាសន៍ថា ក្រុមរបស់លោកមានគម្រោងធ្វើសកម្មភាពចំនួនបួនធំៗនៅពេលខាងមុខ គឺចុះអប់រំពលរដ្ឋខ្មែរទូទៅ ឲ្យបានយល់អំពីសារសំខាន់នៃកិច្ចព្រមព្រៀងសន្តិភាពទីក្រុងប៉ារីស ការជួយជ្រោមជ្រែងដល់ក្រុមអ្នកច្បាប់ ក្នុងដំណើរការប្ដឹងលោកនាយករដ្ឋមន្ត្រី ហ៊ុន សែន ទៅតុលាការឧក្រិដ្ឋកម្មអន្តរជាតិ ការបង្កើតគេហទំព័រដាច់ដោយឡែកមួយ ដើម្បីផ្សព្វផ្សាយឯកសារអំពីបញ្ហាព្រំដែនសម្រាប់ការសិក្សាស្រាវជ្រាវរបស់មហាជន និងការចុះបណ្តុះបណ្តាលយុវជនក្នុងប្រទេសកម្ពុជា ឲ្យយល់ដឹងអំពីភាពជាអ្នកដឹកនាំ។
លោក ទូច វិបុល បញ្ជាក់ថា បើទោះបីជាកន្លងមក មូលនិធិនេះបានជួយឧបត្ថម្ភថវិកាដល់គណបក្សសង្គ្រោះជាតិ នៅកម្ពុជា ក៏ពិតមែន ក៏ដោយសារតែគណបក្សប្រឆាំងមួយនេះមាននិន្នាការទៅរកលទ្ធិប្រជាធិបតេយ្យ។ លោកបន្តថា ក្រុមរបស់លោកមិនត្រឹមតែឧបត្ថម្ភដល់ក្រុមប្រជាធិបតេយ្យប៉ុណ្ណោះទេ ប៉ុន្តែក៏បានជួយដល់ក្រុមជនរងគ្រោះពីបញ្ហាដីធ្លី គ្រោះមហន្តរាយធម្មជាតិ ឬក្រុមយុវជនដែលធ្វើកិច្ចការអំពីបញ្ហាព្រំដែន។
លោក ទូច វិបុល អះអាងថា មូលនិធិរបស់លោកធ្វើការបែងចែកថវិកាប្រកបដោយតម្លាភាព និងស្របតាមច្បាប់របស់សហរដ្ឋអាមេរិក៖ «យើងធ្វើកិច្ចការដើម្បីគណនេយ្យភាព និងតម្លាភាពក្នុងការគ្រប់គ្រងមូលនិធិយើងឲ្យបានច្បាស់លាស់។ ហើយមួយទៀត មូលនិធិយើងទទួលយល់ស្របដោយ អាយអអែស (IRS) របស់សហរដ្ឋអាមេរិក ហើយយើងបានបំពេញកាតព្វកិច្ចរបស់យើង។ យើងបានឲ្យគ្រប់គណនេយ្យ ស៊ីភីអេ (CPA) ត្រួតពិនិត្យទៅលើផ្នែកហិរញ្ញវត្ថុរបស់យើង ដើម្បីដាក់របាយការណ៍ប្រចាំឆ្នាំទៅឲ្យ អាយអអែស។ អ៊ីចឹងទាំងអស់នេះហើយ ដែលយើងធ្វើឆ្លើយតបទៅនឹងការស្រពិចស្រពិលពីបងប្អូននានា។ យើងត្រូវធ្វើកិច្ចការឲ្យបានច្បាស់លាស់ទៅតាមផ្លូវច្បាប់។ ហើយរឿងនេះសំខាន់ ហើយប្អូនដែលជាម្ចាស់ជំនួយនានា គាត់ជួយគឺថាគាត់ចង់ដឹងថវិការបស់គាត់ហ្នឹង យកទៅចាយវាយលើអ្វីខ្លះ។ ដូច្នេះហើយ បានជាយើងធ្វើកាតព្វកិច្ចរបស់យើងទៅតាមច្បាប់ទម្លាប់ ដើម្បីឲ្យបងប្អូនរបស់យើងមានការកក់ក្តៅចំពោះការគ្រប់គ្រងថវិការបស់គាត់»។
រចនាសម្ព័ន្ធរបស់មូលនិធិសង្គ្រោះជាតិ មានការបែងចែកចេញជាទីប្រឹក្សាភិបាល ក្រុមប្រឹក្សាភិបាល ប្រធាន អនុប្រធាន និងក្រុមអ្នកតំណាង។
សមាជិកទីប្រឹក្សាភិបាលរបស់មូលនិធិសង្គ្រោះជាតិ លោក តាន់ វិបុល មានប្រសាសន៍ថា មូលនិធិសង្គ្រោះជាតិ ជាក្រុមមួយដែលធ្វើកិច្ចការរបស់ខ្លួនប្រកបដោយគណនេយ្យភាព និងការទទួលខុសត្រូវខ្ពស់៖ «បាទ! ចំពោះខ្ញុំ ខ្ញុំជួយតាមដាននៅក្នុងរឿងហ្នឹងជារឿយៗ។ ពួកគាត់បានប្រាប់ខ្ញុំថា អ្វីៗមានតម្លាភាព ហើយខ្ញុំពិនិត្យមើលទៅក៏ឃើញអ៊ីចឹងដែរ។ ហើយជម្រាបម្តងទៀត គណនេយ្យរបស់យើងតែងមានការឆែកឆេរ»។
មូលនិធិសង្គ្រោះជាតិខ្មែរ បង្កើតឡើងនៅក្នុងឆ្នាំ២០១២ ក្រោយពេលមេដឹកនាំគណបក្សប្រឆាំងពីររួមមាន គណបក្ស សម រង្ស៊ី និងគណបក្ស សិទ្ធិមនុស្ស ព្រមព្រៀងគ្នាបង្កើតគណបក្សសង្គ្រោះជាតិ។ ក្នុងអំឡុងពេលយុទ្ធនាការឃោសនាបោះឆ្នោតឆ្នាំ២០១៣ មូលនិធិនេះបានជួយថវិកាប្រមាណ ៥សែនដុល្លារសហរដ្ឋអាមេរិក ដល់គណបក្សសង្គ្រោះជាតិ ដើម្បីប្រកួតប្រជែងជាមួយគណបក្សប្រជាជនកម្ពុជា។
ប្រធានក្រុមប្រឹក្សាភិបាលនៃមូលនិធិសង្គ្រោះជាតិខ្មែរ លោក ព្រំ សៅរ៍នរ៉ា មានប្រសាសន៍ថា រាល់ចំណូលចំណាយរបស់មូលនិធិសង្គ្រោះជាតិ ត្រូវបានផ្សព្វផ្សាយជាសាធារណៈលើគេហទំព័ររបស់មូលនិធិនេះ ដែលគ្មានអ្វីលាក់កំបាំងនោះឡើយ៖ «ការចាត់ចែងរបស់យើងហ្នឹង ដូចយើងបានដឹងហើយ យើងមានវេបសាយ (website) របស់យើង គឺថាអ្នកដែលចូលមកប៉ុន្មាន យើងនឹងផ្សាយអំពីចំណូល និងចំណាយរបស់យើង ដោយសារយើងជាអង្គការមិនមែនរដ្ឋាភិបាល ហើយមាន 501C3។ ដូច្នេះអស់លោកដែលចូលមកហ្នឹង គឺអាចកាត់តាក់ (TAX) បាន។ ដូច្នេះហ្នឹង តម្លាភាព គឺ១០០%»។
លោកបន្តថា បច្ចុប្បន្នថវិកាសរុបរបស់មូលនិធិសង្គ្រោះជាតិ មានប្រហែល ៥ពាន់ដុល្លារសហរដ្ឋអាមេរិកប៉ុណ្ណោះ ហើយក្រុមរបស់លោកនឹងធ្វើការរៃអង្គាសថវិកាឲ្យបាន ១សែន ៥ម៉ឺនដុល្លារក្នុងមួយឆ្នាំ ដើម្បីអនុវត្តគម្រោងចំនួនបួនធំៗរួមមាន ការអប់រំពលរដ្ឋខ្មែរអំពីសារសំខាន់នៃកិច្ចព្រមព្រៀងសន្តិភាពទីក្រុងប៉ារីស ការជួយជ្រោមជ្រែងដល់ក្រុមមេធាវីអន្តរជាតិដែលកំពុងដំណើរការប្ដឹង លោក ហ៊ុន សែន ទៅតុលាការឧក្រិដ្ឋកម្មអន្តរជាតិ អាយស៊ីស៊ី (ICC) ការប្រមូលភស្តុតាងអំពីការរំលោភបូរណភាពទឹកដីពីសំណាក់ប្រទេសជិតខាង និងការរៀបចំបណ្ដាញយុវជនឲ្យបាន ៣លាននាក់ ដើម្បីបង្ហាត់បង្ហាញពួកគេឲ្យយល់ដឹងអំពីភាពជាអ្នកដឹកនាំសាមគ្គីភាព និងភាពជាខ្មែរ។
ជាងនេះទៅទៀត ប្រធានមូលនិធិសង្គ្រោះជាតិ លោក ទូច វិបុល មានប្រសាសន៍ថា បើទោះបីជាគណបក្សប្រឆាំង បានចូលបំពេញកិច្ចការរបស់ខ្លួនក្នុងរដ្ឋសភា ជាមួយគណបក្សប្រជាជនកម្ពុជា ក៏ដោយ ប៉ុន្តែក្រុមមូលនិធិនេះនៅតែជំរុញឲ្យគណបក្សសង្គ្រោះជាតិ ទាមទារឲ្យមានការបោះឆ្នោតឡើងវិញ ការកែទម្រង់ គ.ជ.ប និងការបកស្រាយអំពីការបោះឆ្នោតមិនប្រក្រតី ដែលគណបក្សប្រឆាំង និងបក្សកាន់អំណាចត្រូវតែធ្វើការបកស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។