ហេតុការណ៍បាញ់គំរាមសកម្មជនគណបក្សនេះ បានកើតឡើងនៅថ្ងៃទី២០ សីហា ឆ្នាំ២០១៣ ក្នុងភូមិជ័យសុខសាន្ត ឃុំត្រពាំងព្រីង ស្រុកតំបែរ ខេត្តកំពង់ចាម។
អនុប្រធានប្រតិបត្តិគណបក្សសង្គ្រោះជាតិ ឃុំត្រពាំងព្រីង លោក ជន ហ៊ីង បានរៀបរាប់អោយដឹងនៅថ្ងៃទី២១ សីហា ថា នៅវេលាម៉ោងប្រមាណជា ៧ និង ៤០នាទីយប់ ថ្ងៃទី២០ សីហា មានជនមិនស្គាល់មុខមិនដឹងថាមានគ្នាប៉ុន្មាននាក់នោះទេ ជិះឡានពណ៌សគ្មានស្លាកលេខ បានមកឈប់នៅមុខផ្ទះរបស់លោក ហើយក៏បានដកកាំភ្លើងបាញ់បង្ហោះលើដំបូលផ្ទះរបស់លោកចំនួន ៣គ្រាប់។ បន្ទាប់ពីបាញ់រួច ជនមិនស្គាល់មុខនោះបានបើករថយន្តគេចចេញទៅភ្លាម៖ «ពេលដែលបាញ់រួចអត់មានបើកភ្លើងទេ ទៅបានប្រហែលជា ២០០ ឬ ៣០០ម៉ែត្រ ទើបបើកភ្លើងវិញ»។
លោក ជន ហ៊ីង បន្តថា តាំងពីដើមមក លោកពុំដែលមានគំនុំជាមួយពលរដ្ឋណាម្នាក់នៅក្នុងឃុំត្រពាំងព្រីង ឡើយ។ លោកថា ការដែលជនមិនស្គាល់មុខមកឈប់រថយន្ត ហើយបាញ់បង្ហើរលើដំបូលផ្ទះរបស់លោកនេះ គឺជាការគំរាមផ្នែកនយោបាយ ដោយសារលោកគឺជាសកម្មជនរបស់គណបក្សសង្គ្រោះជាតិ ហើយក្នុងមួយរយៈពេលចុងក្រោយនេះ ពិសេសក្នុងពេលឃោសនាបោះឆ្នោត លោកបានចូលរួមសកម្មភាពជាច្រើនជាមួយគណបក្សប្រឆាំង។ តែលោកថា តាំងពីដើមមក លោកមិនដែលត្រូវបានជនណាម្នាក់សម្ដែងសកម្មភាពគំរាមកំហែងដូច្នេះទេ៖ «ក្រោយដែលហេតុការណ៍កើតឡើងហើយ ខ្ញុំរៀបចំពាក្យបណ្ដឹងចូលរដ្ឋបាលឃុំ ដើម្បីអោយគេវែកមុខរកជនល្មើស។ ចុះស្រាវជ្រាវរកមុខជនល្មើសនេះអោយឃើញ ដើម្បីកុំអោយថ្ងៃក្រោយប្រព្រឹត្តតទៅទៀត»។
ប្រធានគណៈកម្មការប្រតិបត្តិគណបក្សសង្គ្រោះជាតិ ខេត្តកំពង់ចាម លោក សេង ឈាងលី បាននិយាយនៅថ្ងៃទី២១ សីហា ថា ការបាញ់ដោយជនមិនស្គាល់មុខលើដំបូលផ្ទះរបស់សកម្មជនគណបក្សសង្គ្រោះជាតិ គឺជាសកម្មភាពគំរាមកំហែងផ្នែកនយោបាយ ក្នុងគោលបំណងបំបាក់ស្មារតីសកម្មជន និងអ្នកគាំទ្របក្សប្រឆាំងនៅមូលដ្ឋាន។ លោកថា នេះមិនមែនជាលើកទីមួយទេ ដែលសកម្មជនគណបក្សសង្គ្រោះជាតិ នៅខេត្តកំពង់ចាម ត្រូវបានគេគំរាមកំហែង បន្ទាប់ពីការបោះឆ្នោត ហើយពីមុនមក ក៏ធ្លាប់មានការគំរាមកំហែងដោយប្រើរូបភាពផ្សេងៗដែរ។
លោក សេង ឈាងលី៖ «មានករណីបីបួនករណីហើយ ខ្លះមានរហូតដល់មានលួចដុតផ្ទះក៏មាន ខ្លះទៅមានករណីគំរាមកំហែងជាពាក្យសម្ដីក៏មាន សកម្មភាពដែលមកគំរាមថា ប្រយ័ត្នបាត់ខ្លួន ប្រយ័ត្នគេបាញ់ចោល អាហ្នឹងសុទ្ធតែជាពាក្យសម្ដីគំរាមកំហែងទាំងអស់»។
លោក សេង ឈាងលី បន្តថា លោក និងក្រុមការងារគណបក្សសង្គ្រោះជាតិ នឹងរៀបចំពាក្យបណ្ដឹងដាក់ជូនមេប៉ុស្តិ៍នគរបាលរដ្ឋបាល និងមេឃុំត្រពាំងព្រីង ព្រមទាំងបានជូនដំណឹងដល់អង្គការក្រៅរដ្ឋាភិបាលមួយចំនួនអោយបានដឹងរួចហើយដែរ។
ទាក់ទងនឹងសកម្មភាពបាញ់គំរាមលើសកម្មជនគណបក្សសង្គ្រោះជាតិ នៅភូមិត្រពាំងព្រីង កាលពីយប់ថ្ងៃទី២០ សីហា មេប៉ុស្តិ៍នគរបាលរដ្ឋបាលឃុំត្រពាំងព្រីង លោក ម៉ឺង ធី និងមេឃុំត្រពាំងព្រីង លោក មុំ សាប៊ុន បាននិយាយនៅថ្ងៃទី២១ សីហា ថា ពួកគាត់ពុំទាន់បានទទួលដំណឹងនៃការបាញ់នេះនៅឡើយ។ ពួកគាត់ថា សកម្មជនគណបក្សសង្គ្រោះជាតិ ដែលថាត្រូវបានជនមិនស្គាល់មុខបាញ់គំរាមនោះ មិនបានផ្តល់ដំណឹងអោយពួកគាត់បានដឹងនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។