អ្នកជំនាញបច្ចេកទេសខាងបោះឆ្នោតមកពីប្រទេសជប៉ុន បានមកជួបតំណាងគណបក្សជាប់ឆ្នោតទាំងពីរ គឺតំណាងគណបក្សសង្គ្រោះជាតិ និងតំណាងគណបក្សប្រជាជនកម្ពុជា នៅថ្ងៃអង្គារ ទី២០ ឧសភា ដើម្បីស្រាវជ្រាវលើការខ្វះខាតលើការបោះឆ្នោត និងការកែទម្រង់លើការបោះឆ្នោតនៅកម្ពុជា នៅពេលខាងមុខ ឲ្យស្របតាមស្តង់ដារអន្តរជាតិ មានយុត្តិធម៌ តម្លាភាព និងទទួលយកបានគ្រប់ភាគី។
ក្រុមមន្ត្រីបច្ចេកទេសបោះឆ្នោតជប៉ុន បានជួបតំណាងគណបក្សទាំងពីរ និងជំរុញឲ្យគណបក្សទាំងពីរឆាប់ត្រូវរ៉ូវគ្នាផ្នែកនយោបាយ ដើម្បីងាយស្រួលដល់ប្រទេសជប៉ុន ក្នុងការជួយលើការកែទម្រង់លើការបោះឆ្នោតនៅកម្ពុជា។
ប្រធានក្រុមបច្ចេកទេស និងជាបេក្ខជនតំណាងរាស្ត្រជាប់ឆ្នោត លោក សុន ឆ័យ ឲ្យដឹងបន្ទាប់ពីជំនួបតំណាងបច្ចេកទេសជប៉ុន ប្រមាណ ៣ម៉ោងនៅព្រឹកថ្ងៃទី២០ ឧសភា នេះថា ភាគីជប៉ុន មកសិក្សាស្រាវជ្រាវអំពីបច្ចេកទេសការបោះឆ្នោត ដូចជា ការចុះបញ្ជីឈ្មោះបោះឆ្នោត ការធ្វើអត្តសញ្ញាណប័ណ្ណ មន្ត្រីក្រសួងពាក់ព័ន្ធធ្វើការមិនបម្រើគណបក្សនយោបាយ និងករណីផ្សេងៗជាច្រើនទៀត។ លោក សុន ឆ័យ អះអាងថា ក្រុមស្រាវជ្រាវជប៉ុន លើកឡើងថា ប្រទេសជប៉ុន មិនចាំបាច់ចុះឈ្មោះបោះឆ្នោតដូចនៅកម្ពុជា ទេ។
«សំឡេង»
លោក សុន ឆ័យ លើកឡើងថា គណបក្សសង្គ្រោះជាតិ បានសំណូមពរឲ្យក្រុមបច្ចេកទេសជប៉ុន ជួយរៀបចំបញ្ជីឈ្មោះបោះឆ្នោតឡើងវិញឲ្យបានត្រឹមត្រូវ កុំឲ្យមានការបោះឆ្នោតជំនួស សុំរៀបចំសិក្ខាសាលាថ្នាក់ជាតិ ដើម្បីប្រមូលមតិយោបល់ក្រុមអង្គការសង្គមស៊ីវិល និងបញ្ហាផ្សេងៗទៀត។ លោក សុន ឆ័យ បញ្ជាក់ថា ក្រុមបច្ចេកទេសជប៉ុន មិនបាននិយាយពីរឿងនយោបាយនោះទេ ដូចជា រឿងជាប់គាំងនយោបាយទេ តែជប៉ុន ក៏បានជំរុញឲ្យគណបក្សទាំងពីរដោះស្រាយរឿងជម្លោះនយោបាយនេះឲ្យបានឆាប់ដែរ ដែលឈរលើការដោះស្រាយជាមួយភាគីខ្មែរ និងខ្មែរ ដើម្បីឈានទៅដល់រដ្ឋាភិបាលជប៉ុន ជួយលើការកែទម្រង់ការបោះឆ្នោតបាន។
ក្រោយពីបានជួបតំណាងក្រុមគណបក្សសង្គ្រោះជាតិ ដែលដឹកនាំដោយ លោក សុន ឆ័យ នោះ ក្រុមបច្ចេកទេសជប៉ុន ប្រមាណ ១០នាក់ ក៏បានជួបតំណាងគណបក្សប្រជាជនកម្ពុជា ទៀតនៅរសៀលថ្ងៃទី២០ ឧសភា ដដែលនេះ។
មន្ត្រីជាន់ខ្ពស់គណបក្សប្រជាជនកម្ពុជា និងជាប្រធានគណៈកម្មការសេដ្ឋកិច្ច និងសវនកម្មនៃរដ្ឋសភា លោកបណ្ឌិតរដ្ឋ ជាម យៀប មានប្រសាសន៍ប្រហាក់ប្រហែល លោក សុន ឆ័យ ដែរថា ក្រុមបច្ចេកទេសជប៉ុន ក៏ជជែកអំពីការស្រាវជ្រាវអំពីបញ្ហាបច្ចេកទេសបោះឆ្នោតរបស់កម្ពុជា។ ហើយក្រោយពីបានប្រមូលព័ត៌មាន និងស្រាវជ្រាវបញ្ចប់ ក្រុមបច្ចេកទេសនេះនឹងធ្វើរបាយការណ៍ទៅរដ្ឋាភិបាលជប៉ុន ថាតើគេនឹងជួយយ៉ាងដូចម្ដេចខ្លះលើការកែទម្រង់ការបោះឆ្នោតនេះ។
«សំឡេង»
ក្រុមអ្នកជំនាញការបោះឆ្នោតជប៉ុន ដែលដឹកនាំដោយ លោក សិនយ៉ា ម៉ូរី (Senya Mori) អគ្គនាយករងនៃអគ្គនាយកដ្ឋានអភិវឌ្ឍន៍ឧស្សាហកម្ម និងគោលនយោបាយសាធារណៈ នៃទីភ្នាក់ងារសហប្រតិបត្តិការអន្តរជាតិជប៉ុន ចៃកា (JICA) នោះនឹងនៅកម្ពុជា រហូតដល់ថ្ងៃទី២៣ ឧសភា។ ហើយនៅថ្ងៃទី២១ ឧសភា នេះ ក្រុមអ្នកជំនាញនេះនឹងជួបតំណាងក្រសួងមហាផ្ទៃ និងជួបតំណាងគណៈកម្មាធិការជាតិរៀបចំការបោះឆ្នោត (គ.ជ.ប) ទៀត ដើម្បីស្រាវជ្រាវអំពីបច្ចេកទេសការបោះឆ្នោតនេះ។
ប្រធានគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា លោកបណ្ឌិត ហង្ស ពុទ្ធា មានប្រសាសន៍ថា នេះជាជំហានល្អមួយដែលក្រុមអ្នកជំនាញជប៉ុន មកស្រាវជ្រាវពីបច្ចេកទេសការបោះឆ្នោត តែលោកបញ្ជាក់ថា ជប៉ុន ត្រូវតែឲ្យភាគីទាំងពីរឯកភាពគ្នាលើការកែទម្រង់ការបោះឆ្នោត និងធ្វើឲ្យច្បាស់លាស់ ដើម្បីជៀសវាងការនូវភាពអយុត្តិធម៌នៃការបោះឆ្នោត នឹងមិនធ្វើឲ្យប៉ះពាល់ដល់កេរ្តិ៍ឈ្មោះប្រទេសជប៉ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។