គណបក្សសង្គ្រោះជាតិ ចាត់ទុកការស៊ើបអង្កេតរបស់រាជរដ្ឋាភិបាលអំពីករណីវាយប្រហារលើអ្នកតំណាងរាស្ត្រគណបក្សសង្គ្រោះជាតិ គឺលោក ញ៉យ ចំរើន និងលោក គង់ សភា កាលពីថ្ងៃទី២៦ តុលា មានភាពយឺតយ៉ាវ នៅខណៈដែលជនសង្ស័យត្រូវបានគេថតជាវីដេអូបង្ហោះផ្សព្វផ្សាយពាសពេញនៅក្នុងបណ្ដាញសង្គមហ្វេសប៊ុក (Facebook) ហើយនោះ។ រដ្ឋាភិបាល ថាការស៊ើបអង្កេតករណីនេះ កំពុងធ្វើតាមជំនាញបច្ចេកទេស។
គណបក្សសង្គ្រោះជាតិ ចេញសេចក្ដីថ្លែងការណ៍នៅថ្ងៃទី១ វិច្ឆិកា អំពាវនាវដល់រដ្ឋាភិបាលឲ្យពន្លឿនការស៊ើបអង្កេតឲ្យបានឆាប់ និងមានតម្លាភាព លើករណីវាយប្រហារអ្នកតំណាងរាស្ត្រពីររូបរបស់ខ្លួននោះ។
គណបក្សសង្គ្រោះជាតិ ចាត់ទុកថា ភាពយឺតយ៉ាវក្នុងការស៊ើបអង្កេតរកជនដៃដល់ និងអ្នកនៅពីក្រោយខ្នងនៃអំពើហិង្សា ដែលវាយប្រហារលើអ្នកតំណាងរាស្ត្រគណបក្សសង្គ្រោះជាតិ នោះ ធ្វើឲ្យគណបក្សនេះមានកង្វល់ជាខ្លាំង ព្រោះរយៈពេលច្រើនថ្ងៃកន្លងមកនេះ ការស៊ើបអង្កេតរបស់រាជរដ្ឋាភិបាល នៅតែមិនបានបង្ហាញពន្លឺ និងទំនុកចិត្តណាមួយដល់មហាជនខ្មែរនៅឡើយទេ។
មន្ត្រីគណបក្សសង្គ្រោះជាតិ លោក យ៉ែម បុញ្ញឫទ្ធិ ថ្លែងបញ្ជាក់ថា ការដែលខ្វះទំនុកចិត្តនេះហើយ ដែលធ្វើឲ្យអ្នកតំណាងរាស្ត្រគណបក្សសង្គ្រោះជាតិ នៅតែព្រួយបារម្ភអំពីសុវត្ថិភាព៖ «នៅពេលដែលជនដៃដល់ពុំទាន់ត្រូវបានរកឃើញ បានន័យថា នៅមានសេរីភាពនៅឡើយ។ ដូច្នេះ តំណាងរាស្ត្រគណបក្សសង្គ្រោះជាតិ នៅតែព្រួយបារម្ភអំពីសុវត្ថិភាពរបស់ខ្លួន ក្នុងការបំពេញការងារឲ្យបានពេញលេញ»។
លោកបន្តថា គណបក្សសង្គ្រោះជាតិ នឹងនៅតែបន្តទទូចឲ្យរាជរដ្ឋាភិបាល ស៊ើបអង្កេតករណីនេះឲ្យបានឆាប់រហ័ស និងដោយឯករាជ្យដែលអាចទុកចិត្តបាន។
ឆ្លើយតបនឹងសេចក្ដីថ្លែងការណ៍របស់គណបក្សសង្គ្រោះជាតិ មន្ត្រីនាំពាក្យរាជរដ្ឋាភិបាល លោក ផៃ ស៊ីផាន មានប្រសាសន៍ថា ការស៊ើបអង្កេតរបស់រាជរដ្ឋាភិបាល កំពុងធ្វើគ្រប់សមត្ថកិច្ច តាំងពីនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ដើម្បីចាប់ជនដៃដល់។ លោកថា បញ្ហានេះមិនមែនជាការឈឺចាប់តែខាងគណបក្សសង្គ្រោះជាតិ តែម្ខាងទេ គឺជាការឈឺចាប់របស់ជាតិទាំងមូល ហើយជាបញ្ហាដែលធ្វើឲ្យបាក់មុខមាត់របស់ប្រទេស។ លោកបន្តថា រយៈពេលស៊ើបអង្កេត គឺធ្វើតាមជំនាញរបស់គណៈកម្មការស៊ើបអង្កេត មិនអាចធ្វើបានតាមការចង់បានរបស់គណបក្សសង្គ្រោះជាតិ ទេ៖ «ខ្ញុំបានឮថា គណៈកម្មការហ្នឹងបានទទួលឯកសារភស្តុតាងមួយចំនួនហើយ ប៉ុន្តែជាមួយនោះ ដើម្បីឲ្យសុក្រឹតរក្សាបានយុត្តិធម៌ លោកបានអំពាវនាវជាសាធារណៈថា សាធារណជនណាក៏ដោយ ជនណាក៏ដោយ បើសិនមានភស្តុតាងគ្រប់គ្រាន់ សូមមេត្តាជូនដល់គណៈកម្មការពិសេស»។
លោកបញ្ជាក់បន្ថែមថា រហូតមកដល់ពេលនេះ ខាងគណៈកម្មការស៊ើបអង្កេតបានទទួលឯកសារព័ត៌មានខ្លះហើយ ប៉ុន្តែលោកមិនអាចបរិយាយបានទេ។
ទាក់ទងនឹងបញ្ហានេះដែរ វិទ្យុអាស៊ីសេរី មិនអាចទាក់ទងមន្ត្រីនៃគណៈកម្មការស៊ើបអង្កេតក្រសួងមហាផ្ទៃ បាននៅឡើយទេ នៅល្ងាចថ្ងៃទី១ វិច្ឆិកា ដើម្បីសួរបន្ថែមអំពីការវិវឌ្ឍនៃការស៊ើបអង្កេតនេះ។
នៅថ្ងៃដដែលនេះ អង្គការសង្គមស៊ីវិលចំនួន ២០ បានចេញសេចក្ដីថ្លែងការណ៍រួមមួយ ដោយអំពាវនាវដល់រាជរដ្ឋាភិបាល បញ្ឈប់វប្បធម៌និទ្ទណ្ឌភាពដដែលៗនៅកម្ពុជា និងត្រូវធានាថា ជនប្រព្រឹត្តិរំលោភសិទ្ធិមនុស្ស ត្រូវបាននាំខ្លួនមកផ្ដន្ទាទោស។ អង្គការទាំងនេះ ថ្កោលទោសចំពោះករណីនិទ្ទណ្ឌភាពកើតឡើងដដែល និងកំពុងរាលដាលនៅកម្ពុជា។ ទាំងអង្គការសង្គមស៊ីវិល និងគណបក្សសង្គ្រោះជាតិ ទាមទារឲ្យរដ្ឋាភិបាលធានាការពារសន្តិសុខ សុវត្ថិភាព ដល់អ្នកតំណាងរាស្ត្រ និងពលរដ្ឋខ្មែរទូទៅ។
គណបក្សសង្គ្រោះជាតិ បញ្ជាក់ក្នុងសេចក្ដីថ្លែងការណ៍របស់ខ្លួនថា ការស៊ើបអង្កេតដោយឯករាជ្យដែលអាចទុកចិត្តបាន គឺគណបក្សសង្គ្រោះជាតិ ស្នើសុំឲ្យរាជរដ្ឋាភិបាល អញ្ជើញអង្គការសិទ្ធិមនុស្សឧត្តមស្នងការនៃអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស ចូលរួមក្នុងការស៊ើបអង្កេតនោះ។
លោក ផៃ ស៊ីផាន ឆ្លើយតបថា សំណើសុំបែបនេះ គឺខុសពីដែនសមត្ថកិច្ចក្នុងច្បាប់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។