គណបក្សសង្គ្រោះជាតិ បានចេញសេចក្ដីថ្លែងការណ៍មួយនៅថ្ងៃទី២៩ ខែឧសភា នេះថា រដ្ឋសភាគ្មានសិទ្ធិក្នុងការអនុម័តដោយមតិភាគច្រើនដាច់ខាត ឬ ៥០ភាគរយបូក១ ដើម្បីអនុញ្ញាតឲ្យតុលាការបន្តនីតិវិធីចោទប្រកាន់ ចាប់ខ្លួន ឃាត់ខ្លួន ឬឃុំខ្លួនតំណាងរាស្ត្រណាម្នាក់ឡើយ។ ប៉ុន្តែគណបក្សប្រជាជនកម្ពុជា ថានេះជាសិទ្ធិនៃការបញ្ចេញមតិរបស់គណបក្សសង្គ្រោះជាតិ។
សេចក្ដីថ្លែងការណ៍របស់គណបក្សសង្គ្រោះជាតិ នៅពេលនេះ ធ្វើឡើងមុនមួយថ្ងៃនៃកិច្ចប្រជុំគណៈកម្មការអចិន្ត្រៃយ៍នៃរដ្ឋសភា ទាក់ទងសំណុំរឿងលោក កឹម សុខា នៅថ្ងៃទី៣០ ខែឧសភា។ គណបក្សសង្គ្រោះជាតិ ទាមទារឲ្យរដ្ឋសភា ការពារអភ័យឯកសិទ្ធិតំណាងរាស្ត្រ ការពារតម្លៃស្ថាប័ននីតិប្បញ្ញត្តិ។ គណបក្សប្រឆាំងមួយនេះ ថារដ្ឋសភាមិនត្រូវអនុញ្ញាតឲ្យមានការចោទប្រកាន់ និងការចាប់ខ្លួនលោក កឹម សុខា ទេ។
គណបក្សសង្គ្រោះជាតិ សំអាងហេតុផលផ្លូវច្បាប់ថា អភ័យឯកសិទ្ធិរបស់តំណាងរាស្ត្រត្រូវការពារដោយមាត្រា៨០ នៃរដ្ឋធម្មនុញ្ញ។
ឆ្លើយតបនឹងសេចក្ដីថ្លែងការណ៍របស់គណបក្សសង្គ្រោះជាតិ នៅពេលនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា បើតំណាងរាស្ត្រប្រព្រឹត្តបទល្មើសព្រហ្មទណ្ឌជាក់ស្ដែង សមត្ថកិច្ចត្រូវចាប់ខ្លួន។ លោក សុខ ឥសាន បន្តថា បើគណបក្សសង្គ្រោះជាតិ ចង់ឲ្យតុលាការផ្អាកការចោទប្រកាន់ លុះត្រាតែគណបក្សនេះរកសំឡេងបីភាគបួននៃតំណាងរាស្ត្រនៅក្នុងរដ្ឋសភា៖ « មិនមែនបទល្មើសជាក់ស្ដែង លុះត្រាតែមានការបើកផ្លូវឲ្យតុលាការដកអភ័យឯកសិទ្ធិដោយសំឡេងពីរភាគបី។ ចឹងទេ ក្នុងករណីបទល្មើសព្រហ្មទណ្ឌជាក់ស្ដែង លុះត្រាតែរកសំឡេងបីភាគបួនមកទប់មិនឲ្យតុលាការបន្តនីតិវិធី »។
ទោះបីជាយ៉ាងណាក៏ដោយចុះ អ្វីដែលជាចម្ងល់នោះ គឺថាប្រសិនបើលោក កឹម សុខា ប្រព្រឹត្តបទល្មើសជាក់ស្ដែងដូចការចោទរបស់អ្នកនាំពាក្យគណបក្សប្រជាជនកម្ពុជា និងអ្នកនាំពាក្យក្រសួងយុត្តិធម៌ នោះ ហេតុអ្វីបានជាសមត្ថកិច្ចរហូតមកដល់ពេលនេះ មិនចាប់ខ្លួនលោក កឹម សុខា តែម្ដងទៅ ពីព្រោះបើបទល្មើសជាក់ស្ដែង មិនចាំបាច់មានដីកាទេ។ រឹតតែឆ្ងល់ទៀតនោះ បើបទល្មើសជាក់ស្ដែងមែននោះ ហេតុអ្វីបានជាសមត្ថកិច្ចមិនចាប់ខ្លួនលោក កឹម សុខា កាលពីថ្ងៃសុក្រ ទី២៧ ឧសភា នៅពេលកម្លាំងនគរបាលប្រដាប់ដោយអាវុធ ចូលទៅដល់ទីស្នាក់ការគណបក្សសង្គ្រោះជាតិ នោះ។
អ្នកច្បាប់និយាយថា ប្រសិនបើបទល្មើសជាក់ស្ដែងកំពុងប្រព្រឹត្ត សមត្ថកិច្ចមិនអាចចាប់ខ្លួនបានទេ បើកន្លងផុតមួយរយៈ វាក្លាយជាលែងជាក់ស្ដែងហើយ។
មាត្រា៨០ នៃរដ្ឋធម្មនុញ្ញ ចែងថា ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកណាមួយនៃរដ្ឋសភា នឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍របស់រដ្ឋសភាក្នុងចន្លោះសម័យប្រជុំនៃរដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្ដែង។ ក្នុងករណីខាងក្រោយនេះ ក្រសួងមានសមត្ថកិច្ច ត្រូវធ្វើសេចក្ដីរាយការណ៍ជូនរដ្ឋសភា ឬជូនគណៈកម្មាធិការអចិន្ត្រៃយ៍របស់រដ្ឋសភាជាបន្ទាន់ ដើម្បីសម្រេច។
សេចក្ដីសម្រេចរបស់គណៈកម្មាធិការអចិន្ត្រៃយ៍របស់រដ្ឋសភា ត្រូវដាក់ជូនសម័យប្រជុំរដ្ឋសភាខាងមុខ ដើម្បីអនុម័តតាមមតិភាគច្រើនពីរភាគបីនៃសមាជិករដ្ឋសភាទាំងមូល។ក្នុងករណីទាំងអស់ខាងលើនេះ ការឃុំខ្លួន ការចោទប្រកាន់តំណាងរាស្ត្រណាមួយ ត្រូវផ្អាក ប្រសិនបើរដ្ឋសភាបានបញ្ចេញមតិឲ្យផ្អាកតាមមតិភាគច្រើនបីភាគបួននៃចំនួនសមាជិករដ្ឋសភាទាំងមូល។
រឿងអភ័យឯកសិទ្ធិតំណាងរាស្ត្រនៃមាត្រា៨០ នៃរដ្ឋធម្មនុញ្ញ ត្រូវបានគណបក្សទាំងពីរបកស្រាយខុសគ្នា។
ទាក់ទងរឿងនេះដែរ លោកមេធាវី គង់ សំអុន លើកឡើងថា ច្បាប់មិនបាននិយាយថា សមាជិកសភាចំនួន ៥០ភាគរយបូក១ អាចស្នើឲ្យតុលាការបន្តនីតិវិធីនោះទេ ប៉ុន្តែច្បាប់មានចែងថា សមាជិកសភា ៣ភាគ៤ អាចស្នើឲ្យតុលាការផ្អាកនីតិវិធី។ លោកថា ក្នុងករណីបទល្មើសជាក់ស្ដែង តុលាការ ឬសមត្ថកិច្ច ត្រូវអនុវត្តការងាររបស់ខ្លួនរួចហើយ ទើបជូនដំណឹងមករដ្ឋសភា៖ « ច្បាប់គេមិននិយាយសំដៅទៅលើរដ្ឋសភាធ្វើការចោទប្រកាន់ទៅលើតំណាងរាស្ត្រណាមួយទេ ប៉ុន្តែច្បាប់និយាយការមិនយល់ស្របរដ្ឋសភា អាចមិនស្របចំពោះការចោទប្រកាន់ប្រើសំឡេងបីភាគបួន »។
សាលាដំបូងរាជធានីភ្នំពេញ បានដាក់លិខិតទៅប្រធានរដ្ឋសភា រាយការណ៍អំពីការចោទប្រកាន់លោក កឹម សុខា ដែលមិនចូលខ្លួនទៅបំភ្លឺតាមការកោះហៅចំនួនពីរលើក។ លោក កឹម សុខា ត្រូវសមត្ថកិច្ចដេញប្រមាញ់តាមចាប់ខ្លួនកាលពីថ្ងៃទី២៦ ខែឧសភា។ ចាប់ពីពេលនោះមក លោក កឹម សុខា មិនបានចេញពីទីស្នាក់ការកណ្ដាលគណបក្សសង្គ្រោះជាតិទេ។ គណបក្សនេះព្រមានធ្វើមហាបាតុកម្ម បើមានការចាប់ខ្លួនលោក កឹម សុខា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។