ការបោះឆ្នោតរើសសមាជិកក្រុមប្រឹក្សារាជធានី ខេត្ត ក្រុង ខណ្ឌ ស្រុក បានចប់ និងប្រកាសលទ្ធផលទៅហើយ។ មកដល់ពេលនេះ គឺជាដំណាក់កាលប្រកាសសុពលភាពសមាជិកក្រុមប្រឹក្សាជាប់តំណែង និងចូលធ្វើការ។
ប៉ុន្តែ មានការខ្វែងគំនិតគ្នារវាងមន្ត្រីគណបក្សនយោបាយ២ ទាក់ទងនឹងទីកន្លែង និងការរៀបចំប្រកាសសុពលភាពមន្ត្រីក្រុមប្រឹក្សាជាប់ឆ្នោត។ គណបក្សនយោបាយទាំង២ ដែលមានទំនាស់គ្នានោះ គឺគណបក្សប្រជាជនកម្ពុជា និងគណបក្សសង្គ្រោះជាតិ។
មន្ត្រីគណបក្សសង្គ្រោះជាតិ បានធ្វើសេចក្តីថ្លែងការណ៍ជំទាស់ការរៀបចំប្រកាសសុពលភាពរបស់ក្រុមប្រឹក្សារាជធានី ខេត្ត និងក្រុមប្រឹក្សា ក្រុង ស្រុក ខណ្ឌ នៅផ្ទះឯកជន ឬមន្ទីរបក្ស។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ មានប្រសាសន៍នៅថ្ងៃទី៥ មិថុនា ថា ការប្រកាសសុពលភាពក្រុមប្រឹក្សានៅទីកន្លែងដែលមិនត្រឹមត្រូវ មិនអាចទទួលយកបានទេ ហើយសមាជិកក្រុមប្រឹក្សាខេត្ត ក្រុង ស្រុក ខណ្ឌ មកពីគណបក្សសង្គ្រោះជាតិ មិនចូលរួមទេ៖ «ពីព្រោះជាគោលការណ៍ជាច្បាប់ សាលាខេត្ត និងសាលាស្រុក ជាសេនាធិការរបស់ក្រសួងមហាផ្ទៃ ដូច្នេះការប្រកាសសុពលភាពក្រុមប្រឹក្សាស្រុក ក្រុមប្រឹក្សាខេត្ត ត្រូវធ្វើនៅសាលាស្រុក ឬសាលាខេត្ត មិនមានហេតុផលទៅធ្វើនៅគណបក្សទីស្នាក់ការបក្សទេ ពីព្រោះក្រុមប្រឹក្សាស្រុក និងខេត្ត ជាមន្ត្រីរបស់ជាតិ មិនមែនជាមន្ត្រីរបស់បក្សនេះទី១។ ទី២ បើទៅធ្វើផ្ទះឯកជន វាកាន់តែធ្ងន់ធ្ងរទៅទៀត ថាតើមានសិទ្ធិឯណា? មានច្បាប់ឯណា ដែលចែងថា ត្រូវប្រកាសសុពលភាពនៅផ្ទះឯកជននោះបាទ?»។
លោក យ៉ែម បុញ្ញឫទ្ធិ មានប្រសាសន៍បន្ថែមឲ្យដឹងថា ការប្រកាសសុពលភាពរបស់ក្រុមប្រឹក្សាខេត្ត ក្រុង ស្រុក ខណ្ឌ នៅទីកន្លែងឯកជននេះមិនទាន់កើតមានទេ ប៉ុន្តែមានដំណឹងពីសមាជិកបក្សបានឲ្យដឹងថា នៅស្រុកមួយចំនួន មានគម្រោងធ្វើពិធីប្រកាសសុពលភាពក្រុមប្រឹក្សានេះនៅផ្ទះអភិបាលស្រុក និងមន្ទីរបក្ស៖ «យើងទប់ស្កាត់ ពីព្រោះព័ត៌មានមក ឧទាហរណ៍ ពីស្រុកកែវសីមា មណ្ឌលគិរី មានព័ត៌មានមកថា បម្រុងទៅប្រកាសព័ត៌មាននៅផ្ទះចៅហ្វាយស្រុក។ តែឥឡូវ យើងមិនទាន់បានទទួលព័ត៌មានមកថា ទៅធ្វើនៅទីណាទេ?»។
កាលពីថ្ងៃទី៤ មិថុនា គណបក្សសង្គ្រោះជាតិ បានចេញសេចក្តីប្រកាសព័ត៌មានមួយ បដិសេធមិនចូលរួមការប្រកាសសុពលភាពក្រុមប្រឹក្សាខេត្ត ក្រុង ស្រុក ខណ្ឌ នៅផ្ទះឯកជន និងមន្ទីរបក្សទេ ហើយសុំឲ្យក្រសួងមហាផ្ទៃ ចាត់វិធានការ ឬអនុវត្តតាមច្បាប់កំណត់ជាធរមាន។
ទាក់ទងបញ្ហានេះ លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា ក្រសួងបានណែនាំទៅថ្នាក់ក្រោម ឲ្យរៀបចំការធ្វើពិធីប្រកាសសុពលភាពក្រុមប្រឹក្សានេះ នៅកន្លែងធ្វើការ។ ប៉ុន្តែនៅតំបន់ និងខេត្តខ្លះ សាលាស្រុកគ្មានសាលប្រជុំរួមទេ ដូច្នេះវាមានការពិបាកដែរ ដូចជានៅខេត្តរតនគិរី និងមណ្ឌលគិរី ជាដើម៖ «យើងបានណែនាំឲ្យធ្វើនៅកន្លែងធ្វើការ សាលាស្រុក។ ប៉ុន្តែស្រុកខ្លះគ្នាគ្មាន ធ្វើម៉េច? លក្ខណៈជាក់ស្តែងរបស់ស្រុកយើងវាអ៊ីចឹង។ កន្លែងខ្លះ សាលាស្រុកអត់មានកន្លែងខ្លះវាមានសាលាស្រុក និងមន្ទីរបក្សនៅជាមួយគ្នាតែម្តង។ យើងមើលនៅរតនគិរី និងមណ្ឌលគិរី ហើយបើគាត់មិនចូលស្រេចតែគាត់ទៅ យើងមិនអាចបង្ខំគាត់បានទេ»។
ការប្រកាសសុពលភាពក្រុមប្រឹក្សានេះ កើតមានបញ្ហាម្តងរួចទៅហើយនៅខេត្តប៉ៃលិន កាលពីថ្ងៃទី៣១ ឧសភា កន្លងទៅ។ ប៉ុន្តែមិនមែនបញ្ហាទីកន្លែងទេ គឺបញ្ហាសមាជិកក្រុមប្រឹក្សាខេត្តមកពីគណបក្សសង្គ្រោះជាតិ ២រូប មិនត្រូវបានគេអញ្ជើញឲ្យចូលរួមប្រជុំក្នុងពិធីប្រកាសសុពលភាពនោះ។
លោកស្រី វ៉ែន តារា សមាជិកក្រុមប្រឹក្សាខេត្តប៉ៃលិន មកពីគណបក្សសង្គ្រោះជាតិ បានហៅការខកខានមិនបានចូលរួមប្រជុំប្រកាសសុពលភាពនោះថា ជាការរើសអើងគណបក្សនយោបាយ និងជាចេតនារបស់មន្ត្រីសាលាខេត្តប៉ៃលិន មិនចង់ឲ្យសមាជិកក្រុមប្រឹក្សាមកពីគណបក្សសង្គ្រោះជាតិ ចូលរួម៖ «ហៅខ្ញុំឲ្យទៅចូលរួម ប៉ុន្តែខ្ញុំនៅចម្ការអូររអិល ហើយបើច្បាប់រដ្ឋបាលវាអត់ត្រូវធ្វើអ៊ីចឹងទេ ត្រូវប្រាប់បីថ្ងៃមុន យើងអត់ប្រកាន់ទេបើមិនបានបីថ្ងៃមុន ៦ម៉ោងមុនអីក៏យើងទទួលយកបាន»។
ការបោះឆ្នោតរើសសមាជិកក្រុមប្រឹក្សា ខេត្ត ក្រុង ស្រុក ខណ្ឌ បានប្រព្រឹត្តទៅកាលពីថ្ងៃទី១៨ ឧសភា កន្លងទៅ មានគណបក្សនយោបាយចំនួន៥ ចូលរួម ហើយមានបេក្ខជនចំនួន ៣៩៣នាក់ ជាប់ឆ្នោតជាសមាជិកក្រុមប្រឹក្សារាជធានីខេត្ត និងបេក្ខជនចំនួន ២.៩៣១នាក់ ជាប់ឆ្នោតជាសមាជិកក្រុមប្រឹក្សាក្រុងស្រុកខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។