មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ បានថ្លែងនៅថ្ងៃច័ន្ទ ទី២២ កក្កដា ថា គណបក្សសង្គ្រោះជាតិ មិនទាន់ទទួលបានការបំភ្លឺណាមួយពីសមត្ថកិច្ចច្បាស់លាស់នៅឡើយទេ ជុំវិញករណីបាញ់ប្រហារលើទីស្នាក់ការគណបក្សសង្គ្រោះជាតិ នៅខណ្ឌទួលគោក កាលពីព្រឹកថ្ងៃទី២០ កក្កដា នោះ។
លោកបានបន្តថា គណបក្សសង្គ្រោះជាតិ កំពុងរង់ចាំការបកស្រាយពីមន្ត្រីប៉ូលិសរបស់ក្រសួងមហាផ្ទៃ ប៉ុន្តែពេលនេះ គណបក្សសង្គ្រោះជាតិ គ្រាន់តែបានទទួលរបាយការណ៍តូចមួយច្បាប់ ដែលបញ្ជាក់ថា ក្រុមអ្នកស៊ើបអង្កេតកំពុងតាមដានរឿងនេះ៖ «គាត់គ្រាន់តែជូនលិខិតមកខាងគណបក្សសង្គ្រោះជាតិ ធ្វើជារបាយការណ៍ទេ របាយការណ៍ដ៏ខ្លីមួយប៉ុណ្ណឹងទេ ដោយប្រាប់ថា គាត់កំពុងធ្វើការស៊ើបអង្កេតតែប៉ុណ្ណឹងឯង»។
មន្ត្រីជាន់ខ្ពស់គណបក្សសង្គ្រោះជាតិ បានថ្លែងថា សមត្ថកិច្ចគួរតែធ្វើការស្រាវជ្រាវឲ្យបានដិតដល់ និងត្រឹមត្រូវ ដើម្បីបញ្ជាក់អំពីគោលបំណងនៃជនល្មើសដែលបានប្រព្រឹត្តបទល្មើសនេះ។
ឆ្លើយតបនឹងបញ្ហានេះ មន្ត្រីប៉ូលិសសង្កាត់បឹងកក់២ ខណ្ឌទួលគោក លោក ខាន់ ខុនទិត្យ បានបញ្ជាក់ថា លោកមិនបានដឹងអំពីដំណើរការនីតិវិធីនៃការស៊ើបអង្កេតដល់ណានោះទេ ប៉ុន្តែលោកបានឆ្លើយថា មន្ត្រីថ្នាក់លើនៃក្រសួងមហាផ្ទៃ កំពុងស៊ើបអង្កេត៖ «បញ្ហាផ្ទុះអាវុធនៅស្នាក់ការគណបក្សសង្គ្រោះជាតិ ហ្នឹង រឿងហ្នឹង គេកំពុងតែស្រាវជ្រាវហើយ ខាងក្រសួងមហាផ្ទៃ កំពុងស្រាវជ្រាវរឿងហ្នឹងបន្តទៀត។ ខ្ញុំអត់ហ៊ានមានមតិអ្វីទេ គ្រាន់តែដឹងថា គេកំពុងស្រាវជ្រាវបន្ត»។
រហូតមកទល់ពេលនេះ វិទ្យុអាស៊ីសេរី មិនអាចទាក់ទងមន្ត្រីអ្នកនាំពាក្យរបស់ក្រសួងមហាផ្ទៃ លោក ខៀវ សុភ័គ និង លោក ជួន ណារិន្ទ ស្នងការរងនគរបាលរាជធានីភ្នំពេញ ដើម្បីសុំការបញ្ជាក់អំពីបញ្ហានេះបានទេ ដោយលោកប្រាប់ថា កំពុងជាប់ប្រជុំ។
ចំណែកអង្គការសង្គមស៊ីវិលវិញ បានចាត់ទុកថា ករណីនេះគឺជារូបភាពមិនល្អមួយដែលមិនគួរមាន ហើយប្រសិនបើសមត្ថកិច្ចមិនបានពន្លឿននីតិវិធីដោះស្រាយទេ អាចធ្វើឲ្យមានការភិតភ័យដល់ប្រជាជនទូទៅក្នុងការបញ្ចេញសកម្មភាពក្នុងពេលយុទ្ធនាការឃោសនា និងការសម្រេចចិត្តបោះឆ្នោតជ្រើសតាំងតំណាងរាស្ត្រនាពេលខាងមុខនេះ។
លោក នី ចរិយា ប្រធានផ្នែកស៊ើបអង្កេតនៃសមាគមអាដហុក (ADHOC) បានថ្លែងថា មន្ត្រីប៉ូលិសគួរតែពន្លឿននីតិវិធីក្នុងការស៊ើបអង្កេតឲ្យបានឆាប់រហ័ស ដើម្បីបញ្ជាក់អំពីសមត្ថភាពក្នុងការពង្រឹងច្បាប់របស់ក្រសួងមហាផ្ទៃ។ លោកបានបន្តថា រដ្ឋាភិបាលគួរតែពង្រឹងច្បាប់ក្នុងការប្រើប្រាស់អាវុធជាតិផ្ទុះឲ្យបានរឹងមាំ ដើម្បីបញ្ចៀសនូវបញ្ហាដែលកើតឡើង ជាឧទាហរណ៍ជាក់ស្តែងដូចការបាញ់បោះមួយ កាលពីយប់ថ្ងៃទី៥ ខែកក្កដា នៅសង្កាត់ផ្សារដើមថ្កូវ និងការបាញ់ទៅលើទីស្នាក់ការសង្រ្គោះជាតិ កាលពីព្រឹកថ្ងៃទី២០ កក្កដា។
លោក នី ចរិយា៖ «អាជ្ញាធរគួរតែបង្ហាញអំពីកម្រិតនៃការធ្វើកិច្ចការងាររបស់យើង ថាតើយើងបានវិវឌ្ឍន៍ទៅដល់កម្រិតណាហើយ ក្នុងការស៊ើបអង្កេតហ្នឹង ព្រោះថា យើងឃើញមានរឿងខ្លះហាក់បីដូចជាលឿនណាស់ គ្រាន់តែក្រសួងប្រកាសថ្ងៃហ្នឹង ស្អែកចាប់បានមនុស្សភ្លាមក៏មានដែរ ដូចជាទាក់ទងទៅនឹងការចាប់ខ្លួនអ្នកណាដែលក្លែងបន្លំការស្ទង់មតិរបស់វិទ្យាស្ថានអាយ.អ.អាយ (IRI) ជាដើម ហើយរឿងនេះជារឿងកំប៉ិកកំប៉ុកសោះ ប៉ុន្តែហាក់ដូចជាមានយុទ្ធនាការតាមចាប់គគ្រឹកគគ្រេង ដូចជារឿងសន្តិសុខជាតិធ្ងន់ធ្ងរណាស់ ក៏ប៉ុន្តែផ្ទុយទៅវិញ នៅពេលដែលមានព្រឹត្តិការណ៍កើតឡើងរហូតដល់មានការបាញ់បោះចូលទីស្នាក់ការកណ្ដាលគណបក្សសង្គ្រោះជាតិ ហាក់មិនមានការចាប់អារម្មណ៍ពីសមត្ថកិច្ចទៅវិញ»។
ទោះបីជាយ៉ាងណាក្តី គេសង្កេតឃើញថា ល្បឿននៃការស៊ើបអង្កេតរឿងក្តីណាមួយនោះ វាអាស្រ័យទៅលើគំនាបពីរដ្ឋាភិបាលទៅលើមន្ត្រីប៉ូលិសជំនាញ ដែលជាប់ពាក់ព័ន្ធនឹងបញ្ហានោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។